মাজুলীত আভ্যন্তৰীণ জলপৰিবহন বিভাগ (আই ডব্লিউ টি)ৰ দ্বাৰা পৰিচালিত মাজুলী-যোৰহাট সংযোগী ফেৰীসেৱাত যাত্ৰীৰ সুৰক্ষাক লৈ অলপো গাফিলতীৰ সুৰুঙা নাৰাখিবলৈ বিভাগীয় বিষয়া-কৰ্মচাৰীক কঠোৰ নিৰ্দেশ দিছে মাজুলীৰ উপায়ুক্ত দেৱপ্ৰসাদ মিশ্ৰই।
আজি উপায়ুক্তৰ কাৰ্যালয়ত আয়োজিত এখন পৰ্যালোচনা সভাত জিলা প্ৰশাসনৰ মূৰব্বীগৰাকীয়ে এতিয়াৰ পৰা ফেৰীসেৱাত যাত্ৰীৰ সুৰক্ষা বিষয়ক নীতি-নিয়ম ভংগকাৰী বিভাগীয় তথা ব্যক্তিগত ফেৰীৰ স্বত্বাধিকাৰী-কৰ্মচাৰীৰ লগতে দায়িত্বত থকা আই ডব্লিউ টিৰ বিষয়া-কৰ্মচাৰীৰ বিৰুদ্ধে প্ৰশাসনে এজাহাৰ দাখিল কৰিব বুলি সতৰ্কবাণী শুনায়।
জিলাখনৰ অতিৰিক্ত উপায়ুক্তদ্বয় নৰেণ দাস আৰু চিন্ময় নাথ উপস্থিত থকা উক্ত বৈঠকত আই ডব্লিউ টিৰ ডিব্ৰুগড় সংমণ্ডলৰ কাৰ্যবাহী বিষয়া মতীন্দ্ৰ বিশ্ব শৰ্মাৰ নেতৃত্বত বিভাগটোৰ কনিষ্ঠ অভিযন্তা আৰু পাৰঘাট পৰিচালনাকাৰী কৰ্মচাৰীয়ে ভাগ লয়। বৈঠকত উপায়ুক্তই শেহতীয়াকৈ মাজুলীৰ পৰা যোৰহাটৰ নিমাতীঘাট সংযোগী ব্ৰহ্মপুত্ৰৰ দুয়োটা জলপথৰ ফেৰী সেৱাতে অনুমোদিত বহন ক্ষমতাতকৈ অতিৰিক্তভাৱে যাত্ৰী আৰু বাহন উঠোৱাকে ধৰি যাত্ৰী সুৰক্ষাৰ ক্ষেত্ৰত একাধিক গুৰুতৰ বিসংগতি ঘটাৰ ৰাজহুৱা অভিযোগক অতি গুৰুত্বসহকাৰে লৈ বিভাগটোৰ পৰা কৈফিয়ৎ তলৱ কৰে।
তেওঁ লগতে কয় যে ৰাজ্য চৰকাৰৰ আভ্যন্তৰীণ জলপৰিবহন বিভাগে নিৰ্ধাৰণ কৰা নীতি-নিয়ম কোনো ব্যক্তিগত ফেৰীৰ দ্বাৰা ভংগ কৰাৰ প্ৰামাণিক অভিযোগ লাভ কৰিলে এতিয়াৰ পৰা জিলা প্ৰশাসনে তেনে ফেৰীৰ কৰ্মচাৰী-স্বত্বাধিকাৰীৰ বিৰুদ্ধ আৰক্ষীৰ ওচৰত এজাহাৰ দাখিল কৰাৰ লগতে এনে ফেৰী তাৎক্ষণিক ভাৱে মাজুলী-নিমাতীঘাট ফেৰীসেৱাৰ পৰা বাহিৰ কৰি দিব।
এইক্ষেত্ৰত বিভাগটোৰ বিষয়া-কৰ্মচাৰী জড়িত থকাটো ধৰা পৰিলে তেওঁলোকৰ বিৰুদ্ধেও নিয়মানুসৰি বিভাগীয় শাস্তিমূলক ব্যৱস্থা গ্ৰহণৰ বাবেও জিলা প্ৰশাসনে আই ডব্লিউ টিক পত্ৰ প্ৰেৰণ কৰিব বুলি তেওঁ কয়।
ইফালে, কমলাবাৰী-নিমাতীঘাট আৰু অফলামুখ নিমাতীঘাট ফেৰীসেৱাৰ অধীনত চলাচল কৰা বিভাগীয় আৰু ব্যক্তিগত মালিকানাধীন প্ৰতিখন ফেৰীতেই এতিয়াৰ পৰা যাত্ৰীয়ে স্পষ্টকৈ দেখা পোৱাকৈ ফেৰীৰ যাত্ৰী আৰু বাহন পৰিবহন ক্ষমতা লিপিৱদ্ধ কৰি আঁৰি ৰাখিব লাগিব বুলিও বৈঠকত উপায়ুক্তগৰাকীয়ে বিভাগীয় কাৰ্যবাহী অভিযন্তাক নিৰ্দেশ দিয়ে।
তদুপৰি এতিয়াৰ পৰা ফেৰীৰ ভিতৰত টিকট দিয়াটো সম্পূৰ্ণ নিষিদ্ধ কৰি কেৱল পাৰঘাটত থকা টিকট কাউণ্টাৰতহে যাত্ৰীক টিকট প্ৰদান কৰিব লাগিব বিভাগটোৱে। এইক্ষেত্ৰত হীন-দেৰী ঘটিলে পাৰঘাটৰ দায়িত্বত থকা বিভাগীয় বিষয়া-কৰ্মচাৰী দায়বদ্ধ হ’ব বুলি উপায়ুক্ত গৰাকীয়ে সকীয়াই দিয়ে।
