অসমৰ চৰকাৰী কৰ্মচাৰীসকলৰ সংগঠন সদৌ অসম কৰ্মচাৰী পৰিষদে সোমবাৰে গোৱালপাৰাত ঘোষণা কৰে যে তেওঁলোকে নাগৰিকত্ব (সংশোধনী) বিধেয়ক সন্দৰ্ভত ইয়াৰ স্থিতি সলনি কৰিবই পাৰে।
‘’নাগৰিকত্ব (সংশোধনী) বিধেয়কক সমৰ্থন জনোৱা দলটোকে অসমৰ জনসাধাৰণে নিৰংকুশ ৰায় প্ৰদান কৰাৰ পাছত সদৌ অসম কৰ্মচাৰী পৰিষদেও ইয়াৰ বিধেয়ক বিৰোধী স্থিতি সলনি কৰিব পাৰে,’’-সদৌ অসম কৰ্মচাৰী পৰিষদৰ সভাপতি বাসৱ কলিতাই কয়।
অৱশ্যে, কলিতাই পৰিষদে কেতিয়ালৈ চৰকাৰী পক্ষৰ স্থিতিক সমৰ্থন জনাব সেয়া স্পষ্ট কৰা নাই। গোৱালপাৰা চহৰত অনুষ্ঠিত হোৱা সোমবাৰে সামৰণি পৰা সদৌ অসম কৰ্মচাৰী পৰিষদৰ তিনিদিনীয়া ৰাজ্যিক অধিৱেশনৰ সময়তে কলিতাই এইদৰে কয়।
কৰ্মচাৰী সংগঠনটোৱে গ্ৰহণ কৰা তেওঁলোকৰ এই স্থিতিয়ে চৰকাৰক এক ডাঙৰ সকাহ দিয়াটো নিশ্চিত কৰিছে যদিও ইয়াৰ বিপৰীতে পৰিষদৰ তিনিদিনীয়া এই অধিৱেশনত অসম চৰকাৰৰ কোনো মন্ত্ৰী উপস্থিত নাথাকিল। মুখ্য মন্ত্ৰী সোমবাৰে মুকলি সভাত উপস্থিত থকাৰ কথা আছিল যদিও নাহিল।
আনহাতে, অভ্যৰ্থনা সমিতিৰ ফালৰ পৰা হোৱা ব্যৱস্থাপনাহীনতাৰ বাবে অধিৱেশনত উপস্থিতিৰ সংখ্যা তাকৰ দেখা গ’ল আৰু আনকি মুকলি অধিৱেশনতো তাৰ প্ৰভাৱ স্পষ্ট হৈ পৰিল। মুকলি সভাত অন্যান্য সকলৰ উপৰি অসম সাহিত্য সভাৰ সভাপতি ড০ পৰমানন্দ ৰাজবংশী আৰু সদৌ অসম ছাত্ৰ সন্থাৰ সভাপতি দীপাংক নাথে ভাষণ দিয়ে।
