অহা ৩ আৰু ৪ ফ্ৰেব্ৰুৱাৰীত অসম চৰকাৰৰ উদ্যোগত আয়োজিত হ’বলগীয়া এডভাণ্টেজ আচামৰ বিৰোধিতা কৰি আজি মহানগৰীৰ গান্ধীবস্তিস্থিত কৃষক মুক্তি সংগ্ৰাম সমিতিৰ কাৰ্যালয়ত কৃষক নেতা অখিল গগৈয়ে এখন সংবাদমেল আয়োজন কৰে।
বিজেপি চৰকাৰে এডভাণ্টেজ আচামৰ জৰিয়তে অসমক পুঁজিপতিৰ হাতত গতাবলৈ বিচৰা সিদ্ধান্তক চৰকাৰৰ এক ষড়যন্ত্ৰ বুলি আজিৰ সংবাদমেলত কৃষক নেতাজনে সদৰি কৰে। এডভাণ্টেজ আচাম নামৰ বিনিয়োগ মেলাৰ জৰিয়তে অসমক পুঁজিপতিৰ হাতত বিক্ৰী কৰিব বিচাৰিছে বুলি কটাক্ষ কৰি কৃষক নেতাজনে কয় যে অসমৰ সম্পদৰাজি আৰু ৰাজকোষৰ ধন পুঁজিপতিক গতাবৰ বাবে এনেধৰণৰ বিনিয়োগ মেলাৰ আয়োজন কৰিছে বিজেপি চৰকাৰে।
কৃষক মুক্তি সংগ্ৰাম সমিতিয়ে কৰা অভিযোগ অনুসৰি অসম চৰকাৰৰ এই পদক্ষেপ পুঁজিপতিসকলক ৰঙা দলিছা পৰাই নহয়, বৰঞ্চ পুঁজিপতিৰ ওচৰত অসমক বিক্ৰী কৰাৰ নামান্তৰ মাত্ৰ।
কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে আজিৰ সংবাদমেলত কিছু তথ্য প্ৰকাশ কৰি উল্লেখ কৰে যে ‘অসম ইণ্ডাষ্ট্ৰিজ(টেক্স ৰিইমবাৰ্চমেন্ট ফৰ ইলিজিবল ইউনিট) ২০১৭’’ অনুসৰি মধ্যমীয়া আৰু বৃহৎ উদ্যোগৰ নিৰ্ধাৰিত মূলধন বিনিয়োগৰ ওপৰত ১৫০ শতাংশ আৰু মেগা উদ্যোগৰ নিৰ্ধাৰিত মূলধন বিনিয়োগৰ ওপৰত ২০০ শতাংশ কৰ পাঁচ বছৰৰ বাবে ৰেহাই দিয়া হ’ব। কিন্তু এই ব্যৱস্থাৰ দ্বাৰা অসমৰ থলুৱা ক্ষুদ্ৰ উদ্যোগসমূহে ৰাজসাহায্য লাভ কৰাৰ পৰা বঞ্চিত হ’ব বুলি সংবাদমেলত সদৰি কৰে।
আনহাতে বিজেপি নেতৃত্বাধীন অসম চৰকাৰে এই ব্যৱস্থাৰ জৰিয়তে অসমৰ থলুৱা কুটীৰ উদ্যোগসমূহক ধ্বংশ কৰাৰ ষড়যন্ত্ৰত লিপ্ত হোৱাৰ এক অভিযোগ তোলে সংগঠনটোৰ উপদেষ্টা অখিল গগৈয়ে। তেওঁ উল্লেখ কৰা অনুসৰি মাত্ৰ ১০ কোটি টকা খৰচ কৰিলেই কামৰূপৰ চেনীকল আৰু মাত্ৰ ১০০ বা ২০০ কোটি টকা খৰট কৰিলে জাগীৰোড আৰু কাছাৰৰ কাগজকলটো মুকলি হ’লহেঁতেন।
উল্লেখযোগ্য যে এই কৰ নীতিৰ দ্বাৰা অতি কমেও ২,২৫০ কোটি টকা ব্যয় হ’ব বুলি অখিল গগৈয়ে এক তাৎপৰ্য্যপূৰ্ণ মন্তব্য কৰে। এই প্ৰসংগত তেওঁ ইমান টকাৰ বিনিয়োগ কৰাৰ ফলত অসমৰ কি কি লাভ হ’ব বুলি অসম চৰকাৰৰ বিত্ত বিভাগৰ প্ৰতি এক প্ৰশ্ন উত্থাপন কৰে। গগৈৰ মতে এই পুঁজিৰে এক লাখ টকাকৈ দি ৰাজ্যৰ মুঠ ২ লাখ ৫০ হাজাৰ নিবনুৱাক চৰকাৰে সংস্থাপন দিব পাৰিলেহেঁতেন।
আনহাতে এনে উদ্যোগসমূহে ঘোষিত নীতিতকৈ দহ গুণ কম হাৰত নিযুক্তি প্ৰদান কৰি ৰাজসাহায্য লাভ কৰিছে বুলি কৃষক নেতাজনে উক্ত সংবাদমেলত মন্তব্য কৰে। অসম চৰকাৰৰ শ্ৰম বিভাগৰ পৰা লাভ কৰা এখন তালিকা প্ৰকাশ কৰি কৃষক নেতাজনে কয় ‘’মেগা উদ্যোগ হিচাপে স্বীকৃতি লাভ কৰা টপচেম চিমেন্টে মাত্ৰ ৮৬ জন আৰু ষ্টাৰ চিমেন্টে ১৩৭ জন লোককহে কৰ্ম সংস্থাপন দিবলৈ সক্ষম হৈছে।
কৃষক নেতা গগৈৰ মতে ২,২৫০ কোটি টকা খৰচ কৰি ৪,৫০০ জন নিবনুৱাই কোনোপধ্যেই চাকৰি লাভ নকৰে। আনহাতে এই ২,২৫০ কোটি টকা পুঁজিপতি উদ্যোগপতিৰ হাতত গতাই নিদি অসমীয়া নিবনুৱাক ২ লাখ টকাকৈ ব্যক্তিগত হিতাধিকাৰী হিচাপে প্ৰদান কৰি ১ লাখ ১২ হাজাৰ ৫০০ জন নিবনুৱাক আত্মসংস্থাপন প্ৰদান কৰাৰ এক উপদেশ আগবঢ়ায়।
উল্লেখযোগ্য যে চৰকাৰে কৰা ঘোষণা অনুসৰি গুৱাহাটীৰ পৰা পাঠশালা, বকো আৰু জাগীৰোডলৈ ৰাষ্ট্ৰীয় ঘাইপথৰ দুয়োকাষৰ প্ৰায় ১৮০ বৰ্গ কিলোমিটাৰ মাটি ইণ্ডাষ্ট্ৰিয়েল কৰিডৰৰ অন্তৰ্ভূক্ত হ’ব। এই সংক্ৰান্তত গগৈয়ে মত প্ৰকাশ কৰে যে পুঁজিপতিসকলে বিনামূলীয়াকৈ চৰকাৰৰ পৰা এই মাটি লাভ কৰিব। তাৰ বিপৰীতে ১,২৬,০৬১ বিঘা কৃষিভূমি উদ্যোগ স্থাপনৰ নামত পুঁজিপতিৰ হাতত চৰকাৰে গতাই দিব। এনেকুৱা ধৰণৰ ব্যৱস্থা গ্ৰহণ কৰিলে কৃষক মুক্তি সংগ্ৰাম সমিতিৰ উদ্যোগত বিশাল প্ৰতিবাদী কাৰ্য্যসূচী ৰূপায়ন কৰাৰ হুংকাৰ প্ৰদান কৰে কৃষক নেতাজনে।
এই সংবাদমেলতে তেওঁ মত প্ৰকাশ কৰে যে এই বৃহৎ পৰিমাণৰ ভূমিৰ প্ৰত্যেক বিঘা মাটি যদি একো একোটা ভূমিহীন পৰিয়ালক প্ৰদান কৰে তেন্তে ১,২৬,০৬১ টা পৰিয়ালে সংস্থাপন লাভ কৰিব পাৰিব।
জাতি-মাটি ভেটিক ৰক্ষা কৰাৰ প্ৰতিশ্ৰুতিৰে শাসনৰ গাদী দখল কৰা বিজেপি চৰকাৰখনে বৰ্তমান কেন্দ্ৰীয় চৰকাৰক অনুকৰণ কৰি অসমক বিক্ৰী কৰাৰ ষড়যন্ত্ৰত লিপ্ত হোৱা বুলি সৰ্বানন্দ সোণোৱাল চৰকাৰক কটাক্ষ কৰে অখিল গগৈয়ে।
তদুপৰি কৃষক নেতাজনে অসম বিক্ৰী কৰিবলৈ প্ৰস্তুতি চলোৱা এডভাণ্টেজ আচাম অনুষ্ঠানত অসমবাসীক সহযোগিতা প্ৰদান নকৰিবৰ বাবে আহ্বান জনায়।
