অলপ বৰষুণতে কৃত্ৰিম বানত ডুব যোৱা দ্বিতীয় গুৱাহাটী মহানগৰত পৰিণত হৈছে গোলাঘাটৰ সৰু চহৰ বোকাখাত।
মাত্ৰ চাৰিটা ৱাৰ্ডৰ বোকাখাত পৌৰসভাৰ বিভিন্ন স্থানত বাৰিষাৰ স্বাভাৱিক নেৰানেপেৰা বৰষুণত সৃষ্ট কৃত্ৰিম বানপানীয়ে বাসিন্দাসকলক জ্বলা-কলা দেখুৱাইছে।
পৌৰসভাখনৰ চাৰি নম্বৰ ৱাৰ্ডৰ অধিকাংশই এতিয়া জলমগ্ন৷ বাট-পথৰ লগতে ৱাৰ্ডটোৰ বহু লোকৰ বাসগৃহো এতিয়া পানীৰ তলত৷
অতীষ্ঠ স্থানীয় ৰাইজে মঙলবাৰে পুৱা কৃত্ৰিম বানৰ তাৎক্ষণিক সমাধান বিচাৰি ৰাষ্ট্ৰীয় পথ অৱৰোধ কৰিবলৈ ওলোৱাত ততাতৈয়াকৈ ঘটনাস্থলীত বোকাখাতৰ মহকুমা দণ্ডাধীশ, ৰাজহ চক্ৰ বিষয়া, পৌৰপতি, উপ পৌৰপতি আৰু ৱাৰ্ড সদস্য সকলো উপস্থিত হৈ ৰাষ্ট্ৰীয় পথতে নলা খান্দি পানী উলিওৱাৰ ব্যৱস্থা কৰিবলৈ বাধ্য হয়৷
কিন্তু বোকাখাত পৌৰসভাক হাত দাঙিবলৈ বাধ্য কৰা এই বানৰ কাৰণ কি? স্থানীয় লোকৰ অভিযোগ, বুঢ়াজান নামৰ এটা ঐতিহ্যমণ্ডিত প্ৰাকৃতিক জুৰিটোৰ অপমৃত্যুয়েই সৰু চহৰখনৰ এই কৃত্ৰিম বানৰ প্ৰধান কাৰণ৷
চাৰি নম্বৰ ৱাৰ্ড হৈ যোৱা এই বুঢ়াজানটো একাংশ লোকে বাসগৃহ নিৰ্মাণ বা অনান্য কাৰণত পুতি পেলোৱাৰ বাবেই এতিয়া নৰক যন্ত্ৰণাত ভুগিব লগা হৈছে চহৰখন।
এই জানটোৰ পূৰ্বে অঞ্চলটোৰ পুৰণি বিল টিমবিলখনো ধ্বংসৰ গৰাহত পৰিছিল।
এতিয়া বোকাখাত পৌৰ প্ৰশাসনে মঙলবাৰে চাৰি নম্বৰ ৱাৰ্ডৰ আবদ্ধ পানী উলিওৱাৰ বাবে ৩৭নং ৰাষ্ট্ৰীয় পথৰ কাষৰ ষ্টে’ট বেঙ্কৰ সন্মুখত এক্সকেভেটৰেৰে নলা খান্দি পানী যোৱাৰ ব্যৱস্থা কৰিছে৷
কিন্তু একাংশ স্থানীয় ৰাইজৰ প্ৰশ্ন, প্ৰাচীন বুঢ়াজানক উদ্ধাৰ নকৰি এইদৰে সমস্যাৰ সমাধান হ’বনে?
কাৰণ ইয়াৰ পূৰ্বেও বহু টকা ব্যয় কৰি নিৰ্মাণ কৰা নগৰৰ এটা নলাৰেও আজি পানী নাযায়। যাৰ পৰিণামত এতিয়া ৰাষ্ট্ৰীয় পথত নলা খান্দি পানী উলিয়াব লগা হৈছে পৌৰসভাই৷
সাময়িকভাৱে কৃত্ৰিম বান সমস্যাৰ সমাধানৰ সলনি বুঢ়াজান বেদখলমুক্ত কৰি খান্দিবৰ বাবে বোকাখাতৰ মহকুমা প্ৰশাসনক ৰাইজে অনুৰোধ কৰিছে৷
