বাক্সা জিলাৰ তামুলপুৰ মহকুমাৰ অধীনৰ নাগ্ৰীজুলি উন্নয়ন খণ্ডৰ অন্তৰ্গত নাগ্ৰীজুলি- কাউলী-কুমাৰীকাটা পথৰ মাজেৰে বৈ যোৱা মটঙা নদীৰ জলপৃষ্ঠ বৃদ্ধি হোৱাত বহিঃৰাজ্যৰ লগত অঞ্চলটোৰ হেজাৰ হেজাৰ লোকৰ সংযোগ বিচ্ছিন্ন হৈ জিয়াতু ভুগিব লগীয়া হৈছে।
আনহাতে নাগ্ৰীজুলি-কাউলী-কুমাৰীকাটা সংযোগী গঢ়কাপ্তানী মূল পথৰ কোনো উন্নয়ন সাধন নোহোৱাত আৰু পথত প্ৰকাণ্ড প্ৰকাণ্ড গাঁতৰ সৃষ্টি হোৱাত সৰ্বসাধাৰণ কৃষিজীৱী লোকৰ উপৰিও জীয়াতু ভুগিব লগা হৈছে বিদ্যালয়- মহাবিদ্যালয়ৰ ছাত্র-ছাত্ৰীসকলে।
নাগ্ৰীজুলি উন্নয়ন খণ্ডৰ অন্তৰ্গত বৃহত্তৰ কৃষিপ্ৰধান নাগ্ৰীজুলি আৰু কাউলী অঞ্চলৰ প্ৰায় ৩৫ হেজাৰৰো অধিক লোকে ব্যৱহাৰ কৰা সদাব্যস্ত তথা গুৰুত্বপূৰ্ণ নাগ্ৰীজুলি-কাউলি-কুমাৰীকাটা পথটোৰ উন্নয়নৰ ক্ষেত্ৰত চৰকাৰ তথা বিভাগীয় কৰ্তৃপক্ষই আজিলৈকে কোনো ব্যৱস্থা গ্ৰহণ কৰা নাই।
তাৰোপৰি নাগ্ৰীজুলি-কাউলি-কুমাৰীকাটা পথটোৰ মাজ মজিয়াৰে বৈ যোৱা মটঙা নৈৰ ওপৰত আজিলৈকে এখনো দলং নিৰ্মাণ নকৰাত বাৰিষা আহিলেই অঞ্চলটোৰ স্থানীয় ৰাইজে জ্বলা-কলা খাব লগীয়া হয়।
বিগত বৰ্ষৰ দৰে এইবাৰে ভূটানৰ পাহাৰৰ পৰা বৈ অহা পানীয়ে ঠায়ে ঠায়ে প্ৰবল গৰাখহনীয়া সৃষ্টি কৰি আহিছে। শ শ কৃষকৰ কৃষি ভূমি নদীৰ বুকুত জাহ গৈছে।
বিপজ্জনকভাৱে নিজৰ জীৱন হাতৰ মুঠিত লৈ স্থানীয় ৰাইজে মটৰচাইকেল ঠেলি ঠেলি বা কান্ধত তুলি ভৰা নদী পাৰ হ’ব লগা শিহৰণকাৰী দৃশ্যই সকলোৰে বুকু কঁপাই তোলে।
উল্লেখযোগ্য যে দলং নিৰ্মাণৰ নাত বিটিচি প্ৰধান হাগ্ৰামা মহিলাৰীয়ে আধাৰশিলা স্থাপন কৰাৰ পিছত নৈৰ খনৰ মাজত ২০১৪ চনতে কেইটামান খুঁটাৰ নিৰ্মাণৰ কাম আৰম্ভ কৰি ৰহস্যজনকভাৱে বন্ধ কৰি ৰাখে দলং নিৰ্মাণৰ কাম।
ফলত নাগ্ৰীজুলি বিটিচি পৰিষদীয় সমষ্টিৰ নাগ্ৰীজুলি-কাউলী-কুমাৰীকাটা ৰাইজৰ একমাত্ৰ গুৰুত্বপূৰ্ণ পথটোৰ উন্নয়ন সাধন কৰিবলৈ আৰু শীঘ্ৰে মটঙা নৈৰ ওপৰত এখন পকী দলং নিৰ্মাণ কৰিবলৈ ৰাইজে দাবী জনাইছে।
