মণিপুৰৰ ছৈখম মীৰাবাই চানু আৰু লাংপক্লাকপাম সুবাদনি দেৱীলৈ আগবঢ়োৱা ২০১৮পদ্মশ্ৰী বঁটাৰ বাবে শুকুৰবাৰে মণিপুৰৰ মুখ্য মন্ত্ৰী এন বীৰেন সিঙে দুয়োগৰাকীকে শুভেচ্ছা জ্ঞাপন কৰিছে।
ছৈখম মীৰাবাই চানু আৰু লাংপক্লাকপাম সুবাদনি দেৱীয়ে ভাৰতৰ আটাইতকৈ সন্মানীয় বঁটাটো লাভ কৰাৰ বাবে সমগ্ৰ মণিপুৰবাসীয়ে গৌৰাৱাণ্বিত অনুভৱ কৰিছে বুলি মুখ্য মন্ত্ৰীয়ে শুভেচ্ছা বাৰ্তাৰ জৰিয়তে কয়।
উল্লেখযোগ্য যে ২০১৭ চনত আমেৰিকা যুক্তৰাষ্ট্ৰৰ আনাহেয়েমত অনুষ্ঠিত হোৱা চিনিয়ৰ বিশ্ব ভাৰত্তোলন প্ৰতিযোগিতাৰ ৪৮ কিলোগ্ৰাম শাখাত ছৈখম মীৰাবাই চানুৱে স্বৰ্ণ পদক বুটলিবলৈ সক্ষম হৈছিল। দুটা দশকৰ পিছত স্বৰ্ণ পদক অৰ্জন কৰি এনে কৃতিত্ব লাভ কৰা ছৈখম মীৰাবাই চানুৱে হৈছে প্ৰথম ভাৰতীয় মহিলা ভাৰত্তোলক।
৪৮ কিলোগ্ৰাম শাখাৰ বিশ্ব চেম্পিয়ন ছৈখম মীৰাবাই চানু সম্প্ৰতি ভাৰতীয় ৰে’লৱে বিভাগত কৰ্মৰত।
আনহাতে বোৱাকটা শিপিনী লাংপক্লাকপাম সুবাদনি দেৱীকো শুভেচ্ছাবাৰ্তাৰ জৰিয়তে মুখ্য মন্ত্ৰীয়ে শুভেচ্ছা জ্ঞাপন কৰে। শুভেচ্ছা বাৰ্তাত উল্লেখ কৰে যে হস্ততাঁত শিল্পক উদগণি জনোৱা আৰু পৰম্পৰাগত ভাবে তৈয়াৰী কাপোৰ সংৰক্ষিত কৰাৰ যি নিৰন্তৰ প্ৰচেষ্টা কৰি আছে, তাৰ বাবে এই শিপিনীগৰাকীয়ে ‘সন্ত কবিৰ’ বঁটাৰ লগতে বহুতো সন্মানীয় বঁটা পাবলৈও সক্ষম হৈছে।
পৰম্পাৰাগত মহিলা পোচাক ‘ৱাংখেই ফি’ত নিজৰ উদ্ভাৱণী ‘লামথাং খুঠাট’ ডিজাইন প্ৰস্তুত কৰাৰ বাবে ১৯৯৩ চনতে ৰাষ্ট্ৰীয় পৰ্যায়ৰ বঁটা পোৱা সুবাদনি দেৱীয়ে ১৯৯২ চনত মণিপুৰ ৰাজ্যিক মেৰিট এৱাৰ্ডো লাভ কৰিছিল।
এই বঁটাৰ জৰিয়তে মহিলা দুগৰাকীয়ে পুনৰ প্ৰমাণ কৰি দিলে যে মণিপুৰ কলা আৰু সংস্কৃতিৰ ক্ষেত্ৰত বহু আগবঢ়া আৰু ইতিমধ্যে দেশৰ ভিতৰতে মণিপুৰ শক্তিশালী ক্ৰিড়া ৰাজ্য হিচাপে প্ৰতিষ্ঠিত হৈছে।
ভৱিষ্যতত মণিপুৰক গৌৰাৱাণ্বিত কৰা এই দুগৰাকী মহিলাই নিজৰ জীৱনত আৰু অধিক সফলতা কঢ়িয়াই আনক তাৰ বাবেও শুভেচ্ছা প্ৰদান কৰে।
শুকুৰবাৰে টুইটযোগে মুখ্য মন্ত্ৰীয়ে কয়, ‘ছৈখম মীৰাবাই চানু আৰু লাংপক্লাকপাম সুবাদনি দেৱীয়ে ২০১৮পদ্মশ্ৰী বঁটা লাভ কৰি আমাক গৌৰাৱাণ্বিত কৰা বাবে তেওঁলোকক শুভেচ্ছা আৰু অভিবাদন জ্ঞাপন কৰিলো’।
ক্ৰীড়া আৰু হস্ততাঁত ক্ষেত্ৰত আগবঢ়োৱা বৰঙণিৰ স্বীকৃতি হিচাপে কেন্দ্ৰীয় চৰকাৰে মণিপুৰৰ ছৈখম মীৰাবাই চানু আৰু লাংপক্লাকপাম সুবাদনি দেৱীক পদ্মশ্ৰী সন্মানেৰে সন্মানিত কৰিব।
