ব্যয় সংকোচনৰ কথা কোৱা সৰ্বানন্দ সোণোৱাল নেতৃত্বাধীন ৰাজ্যৰ বিজেপি চৰকাৰৰ অতি ব্যয়বহুল বিজ্ঞাপনৰ এক তথ্য প্ৰকাশ পাইছে। সংবাদ মাধ্যমত বিজ্ঞাপনৰ নামত বিগত তিনিবছৰে কিমান টকা খৰচ কৰিলে আপুনি জানেনে?
তিনিটা বছৰত বিজ্ঞাপন দিয়াৰ বাবদ ৰাজ্যৰ তথ্য ও জনসংযোগ বিভাগে খৰচ কৰিছে কোটি কোটি টকা। প্ৰত্যেক দিনাই প্ৰায় ৮ লাখ টকা টেলিভিচন, ৰেডিঅ’ৰ বিজ্ঞাপনৰ নামত ব্যয় কৰে বিভাগটোৱে।
দুৰ্নীতি বিৰোধী যুৱ শক্তি, অসমে দাখিল কৰা আৰ টি আই আবেদনৰ উত্তৰত বিভাগটোৱে নিজেই প্ৰদান কৰিছে এই তথ্য।
দেওবাৰে দিচপুৰ প্ৰেছ ক্লাৱত এক সংবাদমেলত ৰাজ্যৰ তথ্য ও জনসংযোগ সঞ্চালকালয়ৰ তৰফৰ পৰা প্ৰদান কৰা তথ্য দাঙি ধৰি সংগঠনটোৰ সভাপতি ধৰ্মকান্ত গগৈয়ে কয় যে বিজ্ঞাপনৰ বাবদ যোৱা ৩টা বছৰত জনসংযোগ বিভাগে খৰচ কৰিছে ৭৬ কোটি ২৮ লাখ ১০ হাজাৰ ৯৩১ টকা।
ইয়াৰে ২০১৬-১৭ বৰ্ষত ২৬,৮৭,৫১,৪৩৬ টকা, ২০১৭-১৮ বৰ্ষত ১৬,৭৮,৬৯,৭৯৯ টকা আৰু ২০১৮-১৯ বৰ্ষত ৩২,৬১,৮৯,৬৯৬ টকা খৰচ কৰা হৈছে।
গগৈয়ে জনোৱা মতে প্ৰভাৱশালী মন্ত্ৰী হিমন্ত বিশ্ব শৰ্মাৰ পত্নীৰ মালিকানাধীন টিভি চেনেল নিউজ লাইভক বিজ্ঞাপনৰ বাবদ সৰ্বাধিক ৪০,৯১,৬৪৭ টকা প্ৰদান কৰাৰ বিপৰীতে ৰেডিঅ’ মিৰ্চিক প্ৰদান কৰা হৈছে সৰ্বনিম্ন ১৫,৩৪০ টকা।
‘যি সময়ত মুখ্য মন্ত্ৰীয়ে কৈ আছে যে বানত ক্ষতিগ্ৰস্ত লোকক সহায় কৰিবলৈ চৰকাৰৰ পুঁজিৰ অভাৱ, সেই সময়তে চৰকাৰে কৰিছে বিজ্ঞাপন বিলাসিতা। বানাক্ৰান্তক সহায় কৰিবলৈ পুঁজি নথকা চৰকাৰখনে কেনেকৈ বিজ্ঞাপনৰ নামত ধন পাইছে?’ – গগৈৰ প্ৰশ্ন।
সোণোৱাল চৰকাৰক বিজ্ঞাপন বিলাসিতা পৰিত্যাগ কৰিবলৈ দাবী জনাই গগৈয়ে লগতে কয়, ‘যিখিনি প্ৰয়োজনীয় বিজ্ঞাপন তাৰ নামতহে ধন খৰচ কৰক। দৈনিক বিজ্ঞাপনৰ নামত ৮ লাখ টকাকৈ ব্যয় হৈ আছে, যিখিনি ধনেৰে দৈনিক দুজনকৈ নিবনুৱা যুৱকক কৰ্ম সংস্থাপন দিব পাৰে।‘
ইপিনে, প্ৰদান কৰা আৰ টি আই তথ্যত বিভাগটোৰ অতিৰিক্ত সঞ্চালকে হিচাপৰ গুৰুতৰ ভূল কৰিছিল। মুঠ খৰচত ৭৬,২৮,১০,৯৩১ টকাৰ সলনি বিভাগটোৱে মাত্ৰ ৪৯,৪০,৫৯,৪৯৫ টকা দেখুৱাইছিল। পাছত দুৰ্নীতি বিৰোধী যুৱ শক্তিৰ সভাপতিয়ে বিভাগটোৰ সৈতে যোগাযোগ কৰি হিচাপটো শুধৰাই দিয়ে বুলি সংবাদমেলত গগৈয়ে কয়।
