দীৰ্ঘদিনৰ পৰা প্ৰাক্তন মন্ত্ৰী ৰকিবুল হুছেইনৰ সৈতে সংঘাতত লিপ্ত হৈ অহা কংগ্ৰেছ নেতা দুলু আহমেদ অৱশেষত নিলম্বনৰ সন্মুখীন হ’ব লগীয়া হ’ল।
প্ৰদেশ কংগ্ৰেছৰ এজন সাধাৰণ সম্পাদক হিচাপে দায়িত্বত থকা আহমেদক আজি দলীয় অনুশাসন ভংগৰ অভিযোগত নিলম্বন কৰা হয়।
আহমেদক নিলম্বন কৰি জাৰি কৰা জাননীখনত হাজো ব্লক কংগ্ৰেছ কমিটিৰ অভিযোগ পত্ৰ, কংগ্ৰেছ সদস্য বাপুকণ আলীৰ অভিযোগ পত্ৰ, বাপুকণ আলীৰ বিৰুদ্ধে দুলু আহমেদৰ অভিযোগপত্ৰ, বাপুকণ আলী আৰু দুলু আহমেদে দিয়া কাৰণ প্ৰদৰ্শনৰ জাননীৰ উত্তৰ, দুলু আহমেদৰ ২৬ জুলাইৰ ফে’চবুক পোষ্ট আৰু তাৰ প্ৰতিক্ৰিয়া হিচাপে বিভিন্ন কংগ্ৰেছ সদস্যই দিয়া ফে’চবুক পোষ্ট আৰু মন্তব্যৰ আধাৰত এই নিলম্বনৰ সিদ্ধান্ত লোৱা হৈছে বুলি জনোৱা হৈছে।
“দুলু আহমেদৰ ফে’চবুক আপডেইটৰ পৰা এইটো স্পষ্ট হয় যে তেওঁ ইচ্ছাকৃতভাৱে ভাৰতীয় জাতীয় কংগ্ৰেছৰ সংবিধানৰ অনুচ্ছেদ XIX (f) (v)-ৰ অধীনৰ নিয়ম 4 (e) আৰু অসম প্ৰদেশ কংগ্ৰেছে কোনো কংগ্ৰেছ কৰ্মীকে দলৰ ক্ষতি হ’ব পৰা মতামত আৰু মন্তব্য ছপা, ইলেকট্ৰনিক আৰু সামাজিক মাধ্যমত প্ৰকাশ নকৰিবলৈ জাৰি কৰা নিয়মাৱলী উলংঘা কৰিছে।”, নিলম্বন পত্ৰখনত এইদৰে কোৱা হৈছে।
জাননীখনত উল্লেখ কৰা মতে, কাৰণ প্ৰদৰ্শনৰ জাননীত আহমেদে দিয়া উত্তৰ “সন্তোষজনক” নহয়।
“গতিকে দলত অনুশাসন বৰ্তাই ৰখাৰ স্বাৰ্থত অসম প্ৰদেশ কংগ্ৰেছ কমিটীৰ সাধাৰণ সম্পাদক দুলু আহমেদক তৎতকালীনভাৱে কাৰ্য্যকৰী হোৱাকৈ, পৰৱৰ্তী নিৰ্দেশ নিদিয়া পৰ্য্যন্ত নিলম্বন কৰা হ’ল”, সাধাৰণ সম্পাদক ৰঞ্জন বৰা স্বাক্ষৰিত জাননীখনত কোৱা হয়। লগতে ইয়াক অসম প্ৰদেশ কংগ্ৰেছ কিমিটীৰ সভাপতিৰ অনুমোদনক্ৰমে বুলিও লিখা হৈছে।
উল্লেখ কৰিব পাৰি, যোৱা ২৬ জুলাইত এটা ফে’চবুক পোষ্টত কংগ্ৰেছ নেতাজনে প্ৰাক্তন মন্ত্ৰী ৰকিবুল হুছেইনক গঁড় হত্যাকাৰী বুলিও অভিযোগ কৰাই নহয়, তেওঁৰ দেউতাক বাংলাদেশী আছিল, গতিকে তেৱোঁ বাংলাদেশী বুলি অভিহিত কৰিছিল।
“সকলো কংগ্ৰেছ কৰ্মীয়ে খবৰ কৰক।নগাওঁৰ গঁড় হত্যাকাৰী জনৰ পিতৃ বাঙলাদেশৰ ঢাকাৰ হয়।পিতৃ যদি বাংলাদেশী, পুত্ৰ কি?দলৰ কথা কি চিন্তা কৰিব”, এয়া আছিল দুলু আহমেদৰ ২৬ জুলাইৰ বিতৰ্কিত পোষ্টটো।
আনহাতে দুলু আহমেদে নিজৰ নিলম্বনৰ বিষয়ে জানিব পাৰি আজি এটা ফে’চবুক পোষ্ট দিয়ে, য’ত তেওঁ হাজো সমষ্টিৰ কংগ্ৰেছ কৰ্মীসকলক নতুন নেতৃত্বৰ অধীনত আগুৱাই যাবলৈ আহ্বান জনোৱাৰ লগতে, তেওঁৰ নেতৃত্বৰ প্ৰতি অসন্তুষ্ট হৈ আঁতৰি থকাসকলৰ ওচৰত ক্ষমা বিচাৰে।
প্ৰদেশ কংগ্ৰেছে আজি হাজো সমষ্টিৰ কংগ্ৰেছ কৰ্মী বাপুকণ আলীকো নিলম্বন কৰে।
