আহত বনৰীয়া পশু-পক্ষী, সাপ আদি উদ্ধাৰ কৰাৰ লগতে সেইবোৰৰ সৈতে্ বিৰল আত্মীয়তা গঢ়ি বিস্মিত কৰা প্ৰকৃতিপ্ৰেমী মনোজ গগৈলৈ আগ বঢ়োৱা হৈছে এই বছৰৰ India Star Passion Award 2019.
এই বঁটাটো আগ বঢ়াইছে ইণ্ডিয়া ষ্টাৰ বুক অব ৰেকৰ্ডছ নামৰ এটা নৱীন প্ৰতিষ্ঠানে। ইয়াৰ মুখ্য কাৰ্য্যালয় আছে উত্তৰ প্ৰদেশৰ বেৰিলিত।
প্ৰতিষ্ঠানটোৱে যোৱা চাৰি বছৰ ধৰি বিভিন্ন ক্ষেত্ৰৰ মৌলিক গুণ-প্ৰতিভা থকা লোকক এইদৰে বঁটা প্ৰদান কৰি উৎসাহ প্ৰদান কৰি আহিছে।
“প্ৰত্যেকৰ কিবা নহয় কিবা প্ৰতিভা আছে” এই নীতিত বিশ্বাস ৰখা নতুন প্ৰতিষ্ঠানটোৰ প্ৰথম তথা বৰ্তমানৰো সম্পাদক বীণা আগৰৱাল।
লগতে পঢ়ক প্ৰকৃতিৰে কথা পতা মানুহজন: বিশ্বৰ শ্ৰেষ্ঠ শাখাত মনোজ গগৈ বিষয়ক অসমৰ চুটি ছবি
মুঠ ১৬টা শাখাত মনোজ গগৈৰ উপৰি ভাৰতৰ বিভিন্ন স্থানৰ অভিলেখকাৰী, সমাজকৰ্মী, সমাজ সংগঠক, শিক্ষাবিদ, সাংবাদিক, কলাকাৰ আদিকে ধৰি মুঠ ২০০জনক ২০১৯ চনৰ বাবে নিৰ্বাচন কৰিছে।
নৰ্থ-ইষ্ট নাওৰ তৰফৰ পৰা যোগাযোগ কৰাত মনোজ গগৈৰ নামটো জনৈক লক্ষীনাথ শৰ্মাই প্ৰস্তাৱ কৰিছিল বুলি জানিবলৈ দিয়ে।
বঁটাত এখন মানপত্ৰ, এটা মেডেল আৰু বেজ থাকিব। নগদ ধন আদি নাথাকে। বঁটা প্ৰাপকে প্ৰতিষ্ঠানটোৰ কাৰ্য্যালয়লৈ গৈ নিজে এয়া সংগ্ৰহ কৰিব পাৰে, অথবা কুৰিয়াৰ যোগেও লাভ কৰিব পাৰিব, জনালে প্ৰতিষ্ঠানটোৰ কৰ্তৃপক্ষই।
উল্লেখ কৰিব পাৰি যে মনোজ গগৈৰ এই ব্যতিক্ৰমী প্ৰকৃতিপ্ৰেম আৰু বনৰীয়া জীৱ-জন্তুৰ সৈতে থকা তেওঁৰ আত্মীয়তাক লৈ এখন চুটি ছবিও নিৰ্মাণ হৈছে, যিখনে ৰাষ্ট্ৰীয় আৰু আন্তঃৰাষ্ট্ৰীয় পৰ্য্যায়ত বঁটা লাভ কৰিছিল।
https://www.facebook.com/indiastarawards/photos/a.710936239074013/1290288897805408/?type=3&theater
