ৰাজ্যসভাত মুছলমানসকলৰ বিবাহ বিচ্ছেদ বিষয়ক তিনি তালাক বিধেয়ক গৃহীত হোৱাৰ পাছত বিজেপি নেতৃত্বাধীন কেন্দ্ৰীয় চৰকাৰৰ বিৰুদ্ধে সমালোচনাত সৰৱ হৈ পৰিছে ইছলাম ধৰ্মালম্বী বিভিন্ন দল-সংগঠন সমূহ।
লোকসভাৰ সাংসদ তথা এ আই য়ু ডি এফ প্ৰধান বদৰুদ্দিন আজমলেও তিনি তালাক বিধেয়কখনৰ বিৰোধিতা কৰি এই আইনক কেতিয়াও সমৰ্থন নকৰো বুলি মন্তব্য কৰে।
হোজাইত সংবাদ মাধ্যমৰ আগত তিনি তালাক সম্পৰ্কে মত প্ৰকাশ কৰি আজমলে হিন্দু সমাজৰ মাজত তালাক প্ৰক্ৰিয়া মুছলমান সমাজতকৈ বেছি বুলি কয়।
আনহাতে, নৰেন্দ্ৰ মোদী নেতৃত্বাধীন চৰকাৰখনক মুছলমান বিৰোধী আখ্যা দি আজমলে বিজেপিয়ে মুছলমান বিৰোধী বিধেয়ক আনিবই আৰু ইয়াক গৃহীত কৰিবৰ বাবে চেষ্টা কৰিবই কিন্তু এনে মৌলিক অধিকাৰ ভংগ কৰিব পৰা আইন মুছলমান সমাজে কেতিয়াও স্বীকাৰ নকৰে বুলি উল্লেখ কৰে।
লগতে পঢ়ক : ৰাজ্যসভাত গৃহীত তিনি তালাক বিধেয়ক; ঐতিহাসিক আখ্যা অসমৰ সাংসদ বীৰেন্দ্ৰ প্ৰসাদ বৈশ্যৰ
তদুপৰি ইছলাম ধৰ্মত তিনি তালাক বহু দূৰৰ কথা এক তালাককে বেয়া কাম বুলি কোৱা হয় বুলিও সাংসদগৰাকীয়ে মন্তব্য কৰে।
উল্লেখযোগ্য যে, বিজেপি চৰকাৰৰ দ্বিতীয়টো কাৰ্য্যকালৰ বাবে ক্ষমতালৈ অহাৰ পাছতে লোকসভাত তিনি তালাক বিধেয়কখন গৃহীন কৰা হৈছিল আৰু ৰাজ্যসভাৰ অনুমোদনৰ বাবে পঠোৱা হৈছিল।
বিগত সপ্তাহত ৰাজ্যসভাতো বিধেয়কখন গৃহীত হয় আৰু ৰাষ্ট্ৰপতিৰ অনুমোদন লাভৰ বাবে বিধেয়কখন ৰাষ্ট্ৰপতিৰ ওচৰলৈ পঠোৱা হৈছে। ৰাষ্ট্ৰপতিৰ অনুমোদন লাভৰ পাছতে তিনি তালাক বিধেয়ক আইনত পৰিণত হ’ব।
তিনি তালাক বিধেয়ক আইনত পৰিণত হ’লে তিনিবাৰ তালাক বুলি উচ্চাৰণ কৰি বিবাহ বিচ্ছেদ দিয়া অভিযুক্তসকলক তিনি বছৰলৈ কাৰাদণ্ড বিহা হ’ব।
