বাঙালী যুৱ ছাত্ৰ ফেডাৰেইশ্যনে আজি এখন সংবাদমেলত অসমৰ বাঙালীসকলে “ডি ভোটাৰ আৰু আপত্তি-অভিযোগ”ৰ অগ্নিপৰীক্ষাৰ সন্মুখীন হ’ব লগীয়া হৈছে বুলি কয়।
এই প্ৰক্ৰিয়াত আপত্তি-অভিযোগ দাখিল কৰাসকল শুনানিত অনুপস্থিত থকাৰ বিপৰীতে ভুক্তভোগী বাঙালী লোকে ১৪-১৫বাৰকৈ এনআৰচি সেৱা কেন্দ্ৰলৈ তাঁতবাটি কৰিব লগীয়া হৈছে বুলি অভিযোগ কৰে সংগঠনটোৱে।
পূৰ্বে চাৰিটা ভাগত ভাগ ভাগ হৈ পৰা বাঙালী যুৱ ছাত্ৰ ফেডাৰেইশ্যনৰ তিনিটা গোটে আজি একেলগে দিচপুৰ প্ৰেছ ক্লাবত সংবাদমেল সম্বোধন কৰে।
সংগঠনটোৰ অভিযোগ ডিটেনশ্যন কেম্পত ভাৰতীয় বাঙালীকো হাৰাশাস্তি কৰা হৈছে।
আনহাতে বাঙালী লোকসকলৰ এই যন্ত্ৰণাৰ প্ৰতি সংবেদনহীন হৈ পৰা বুলি বাঙালী মন্ত্ৰী-বিধায়ক, বিশেষকৈ শিলাদিত্যক কঠোৰ সমালোচনা কৰে সংগঠনটোৱে।
বাঙালী মন্ত্ৰী-বিধায়কক “নিৰ্লজ্জ” আখ্যা দি সংগঠনটোৰ এটা গোটৰ সভাপতি কমল চৌধুৰীয়ে কয়, “ঠায়ে ঠায়ে বাঙালী লোকে এন আৰ চিৰ নামত আত্মহত্যা কৰিছে। বৰ্তমানলৈকে প্ৰায় ৩৫জনে আত্মহত্যা কৰিছে। কিন্তু সংবাদ মাধ্যমৰ সন্মুখত হিন্দু বাঙালীৰ কথা কৈ থকা বাঙালী বিধায়কসকলৰ সময় নাই এই পৰিয়ালবোৰৰ খবৰ লোৱাৰ বাবে। বিধায়ক শিলাদিত্যই এন আৰ চি সন্দৰ্ভত প্ৰচাৰ মাধ্যমৰ আগত যিদৰে কয়, তাৰ পৰিৱৰ্তে যদি আত্মহত্যা কৰা লোকৰ পৰিয়ালৰ ওচৰলৈ গৈ ঘটনাৰ বুজ লৈ সংবাদমেল সম্বোধন কৰা হেঁতেন আমি সুখী হ’লো হেঁতেন।”
আনহাতে, ১৯৭১-ৰ পূৰ্বে অহা বাঙালী লোকক ডিটেনশ্যন কেম্পৰ পৰা মুকলি কৰি দিলে নাগৰিকত্ব সংশোধনী বিধেয়কৰ মুকলিকৈ বিৰোধিতা কৰিব বুলি বাঙালী যুৱ ছাত্ৰ ফেডাৰেশ্যনে স্পষ্ট কৰি দিয়ে।
“১৯৭১ চনৰ আগত অহা হিন্দু বাঙালী লোকসকলক ডি-ভোটাৰৰ নামত বা ডিটেনশ্যন কেম্পত ৰাখি থৈছে, যি হাৰাশাস্তি চলাই আছে, সেইবোৰ বন্ধ কৰি দিয়ক, -এই মঞ্চৰ পৰাই কৈছো তেতিয়া আমি মুকলিকৈ নাগৰিকত্ব সংশোধনী বিধেয়কৰ বিৰোধিতা কৰিম। আমি ১৯৭১ চনৰ পাছত অসমলৈ অহা কোনো বিদেশীৰে বোজা লোৱাটো নিবিচাৰো।” সংবাদমেলত ঘোষণা আন এটা গোটৰ সভাপতি মহানন্দ সৰকাৰ দত্তৰ।
উল্লেখযোগ্য যে, ১৯৯০ চনত গঠিত বাঙালী যুৱ ছাত্ৰ ফেডাৰেইশ্যন কেইবছৰমান পূৰ্বে চাৰিটাকৈ ভাগত বিভক্ত হৈছিল। ইয়াৰে তিনিটা গোটে কালি এক বৈঠকত মিলিত হৈ পুনৰ একত্ৰিত হৈ বাঙালী লোকক সু-সংবদ্ধ কৰাৰ বাবে সিদ্ধান্ত গ্ৰহণ কৰে। সেই উদ্দেশ্যে তিনিটা গোটৰ সভাপতি ক্ৰমে মহানন্দ চৰকাৰ দত্ত, কমল চৌধুৰী আৰু উৎপল সৰকাৰে যৌথভাৱে আজিৰ সংবাদমেলখন সম্বোধন কৰে।
