শদিয়াৰ ন-তৰাণী গাঁৱত শনিবাৰে সংঘটিত হোৱা এটা কৰুণ ঘটনাই সমগ্ৰ শদিয়াতে শোকৰ ছাঁ পেলাইছে।
তৰাণী গাঁৱৰ চন্দ্ৰ গগৈ আৰু নমি গগৈয়ে পুৱাতে পুত্ৰ অচ্যুত গগৈ (৫) আৰু কন্যা গুণিমা গগৈ (৯)ক ঘৰতে থৈ খেতিৰ কৰিবলৈ পথাৰলৈ গুচি গৈছিল।
আৰু দুপৰীয়া ভাগত ঘৰলৈ উভতি আহি দুয়োকে প্রত্যক্ষ নকৰাত ঘৰখনত হুৱা-দুৱা শৃষ্টি হয় আৰু পিছত গাঁৱৰ ৰাইজৰ সৈতে কেইবা ঘণ্টা ধৰি দুয়োৰে সন্ধান উলিয়াবলৈ চেষ্টা কৰে।
ইয়াৰ পিছতে ৰাইজে চন্দ্ৰ গগৈৰ ঘৰৰ পিছফালে থকা পুখুৰীত এটা মৃত চৰাই প্রত্যক্ষ কৰে আৰু সন্দেহৰ ভিত্তিত পুখুৰীটোত সন্ধান চলাই দুই কণমানিক মৃত অৱস্থাত প্ৰত্যক্ষ কৰি মৃতদেহ উদ্ধাৰ কৰে।
ৰাইজৰ সন্দেহ, দুই কণমানিয়ে পুখুৰীটোত প্ৰত্যক্ষ কৰা মৃত চৰাইটো আনিব যাওঁতে উক্ত ঘটনা সংঘটিত হয়। সাঁতুৰিব নাজানি সম্ভৱতঃ ইজনে আনজনক বচাবলৈ গৈ মৃত্যুমুখত পৰে।
উক্ত ঘটনাৰ বাবে অভিভাৱকৰ লগতে গাঁওখনৰ সকলো লোক ভাগি পৰিছে আৰু মৃতদেহ কেইটা চাপাখোৱাৰ অসামৰিক চিকিৎসালয়লৈ প্ৰেৰণ কৰি মৰণোত্তৰ পৰীক্ষাৰ ব্যৱস্থা কৰা হৈছে।
