অসমৰ ৰাজ্যসভাৰ সাংসদ ভুৱনেশ্বৰ কলিতাই সোমবাৰে আচম্বিতে সাংসদ পদৰ পৰা পদত্যাগ কৰে।
ভুৱনেশ্বৰ কলিতাৰ পদত্যাগৰ পাছতে তেওঁৰ পদত্যাগক লৈ চৰ্চা আৰম্ভ হৈছে।
প্ৰকৃততে কলিতাই পদত্যাগ কৰিলে কিয়? নিজৰ টুইটত পদত্যাগৰ কথা ঘোষণা কৰিলেও তেওঁ পদত্যাগৰ কাৰণ উল্লেখ কৰা নাই।
তাৎপৰ্যপূৰ্ণভাৱে, আজি পুৱাৰ ভাগত জম্মু-কাশ্মীৰ প্ৰসংগত ৰাজ্যসভাত আন দুগৰাকী কংগ্ৰেছ সাংসদ গোলাম নবী আজাদ, অম্বিকা ছোনীৰ সৈতে ভুৱনেশ্বৰ কলিতায়ো সভাস্থগিত প্ৰস্তাৱৰ জাননী দিছিল।
কিন্তু ইয়াৰ পাছতে সাংসদগৰাকীয়ে কি কাৰণে পদত্যাগ কৰিলে?
সাংসদ কলিতাই কাশ্মীৰ প্ৰসংগত নে আন কোনো ইচ্ছ্যুৰ বাবে সাংসদ পদ ত্যাগ কৰিলে সেয়া বিচাৰ্যৰ বিষয়।
বৰ্তমান ৬৮ বছৰীয়া ভুৱনেশ্বৰ কলিতাই ১৯৭২ চনৰ পৰাই কংগ্ৰেছ দলৰ সৈতে জড়িত হৈ আহিছে।
১৯৮৩-৮৫’ত তেওঁ অসম প্ৰদেশ যুৱ কংগ্ৰেছৰ সভাপতি হৈছিল। ইয়াৰ পাছত ২০০৪ চনত তেওঁ অসম প্ৰদেশ কংগ্ৰেছ কমিটিৰ সভাপতি নিৰ্বাচিত হয়।
তদুপৰি, তেওঁ প্ৰদেশ কংগ্ৰেছৰ উপ সভাপতি(১৯৯৫-৯৬), ভাৰতীয় যুৱ কংগ্ৰেছৰ সাধাৰণ সম্পাদক (১৯৮৪-৮৭), নিখিল ভাৰত কংগ্ৰেছ কমিটিৰ যুটীয়া সম্পাদক (১৯৮৭-৯২) আৰু নিখিল ভাৰত কংগ্ৰেছ কমিটিৰ সম্পাদক (১৯৯৯-২০০২) আদি পদতো কাৰ্যনিৰ্বাহ কৰি আহিছে।
১৯৮৪ চনত তেওঁ ৰাজ্যসভাৰ সদস্য হিচাপে নিৰ্বাচিত হয়। ইয়াৰ পাছত তেওঁ ১৯৯০ চনত পুনৰ ৰাজ্যসভালৈ নিৰ্বাচিত হৈছিল।
১৯৯৮ত তেওঁ লোকসভালৈ নিৰ্বাচিত হয়। ২০০১ ত তেওঁ ৰাজ্য বিধানসভালৈ নিৰ্বাচিত হৈ কেবিনেট মন্ত্ৰী হয়।
কলিতা ২০০৪ চনৰ পৰা ২০১৪ চনলৈকে অসম প্ৰদেশ কংগ্ৰেছ কমিটিৰ সভাপতি আছিল। তেওঁৰ সভাপতিত্বৰ কালতে অসমত কংগ্ৰেছে দীঘলীয়া সময়ৰ বাবে শাসনত থকাৰ সুযোগ লাভ কৰিছিল।
২০১৪ চনত তেওঁ পুনৰ কংগ্ৰেছৰ পৰা ৰাজ্যসভাৰ সাংসদ হিচাপে নিৰ্বাচিত হয়।
ভুৱনেশ্বৰ কলিতাই কংগ্ৰেছৰ শাসনকালত কেন্দ্ৰীয় চৰকাৰৰ বিভিন্ন সমিতিৰ অধ্যক্ষ তথা সদস্য হিচাপে কাৰ্যনিৰ্বাহ কৰিছিল।
চাবলৈ গ’লে কংগ্ৰেছৰ সৈতে ভুৱনেশ্বৰ কলিতাৰ প্ৰায় ৪২ বছৰীয়া সুদীৰ্ঘ সম্পৰ্ক আছিল। ইয়াৰ পাছতো কলিতাই কিয় ৰাজ্যসভাৰ পৰা পদত্যাগ কৰিলে?
কলিতাই ৰাজ্যসভাৰ সাংসদ পদৰ পৰা পদত্যাগ কৰিছে যদিও এতিয়াও দলৰ পৰা পদত্যাগ কৰা নাই।
সূত্ৰসমূহৰ মতে, ভুৱনেশ্বৰ কলিতাই দলৰ হাইকমাণ্ডৰ কামকাজত সন্তুষ্ট নহয়। সেইটোৱে কলিতাৰ ৰাজ্যসভাৰ পৰা পদত্যাগৰ কাৰণ নেকি?
উল্লেখযোগ্য যে কেইদিনমান পূৰ্বে অসমৰ পৰা ৰাজ্যসভালৈ নিৰ্বাচিত হোৱা সাংসদ সঞ্জয় সিঙে পদত্যাগ কৰিছিল আৰু বিজেপিত যোগদান কৰিব বুলি সদৰী কৰিছে।
জানিব পৰা মতে, ভুৱনেশ্বৰ কলিতাৰো বিজেপিৰ কিছু শীৰ্ষ নেতাৰ সৈতে ভাল সম্পৰ্ক আছে।
সেয়ে ভুৱনেশ্বৰ কলিতাই বিজেপিলৈ যোৱাটো কোনো আচৰিত কথা নহয়।
নিজৰ পদত্যাগৰ কাৰণ সম্পৰ্কে মুখ নোখোলা ভুৱনেশ্বৰ কলিতাই হয়তো অচিৰেই তেওঁৰ পৰৱৰ্তী সিদ্ধান্তৰ কথা ৰাজহুৱা কৰিব।
