ভাৰতীয় সেনাৰ ধাৰাবাহিক অভিযানত অসহায় হৈ পৰা আলফা স্বাধীনৰ একাংশ সদস্যই আত্মসমৰ্পণৰ পথ বাচি ল’বলৈ বাধ্য হৈছে। ৬ আগষ্ট অৰ্থাৎ মঙলবাৰে নিশা তিনিচুকীয়া জিলাত আলফা স্বাধীনৰ তেনে দুজন সদস্যই আত্মসমৰ্পণ কৰে।
স্বাধীনতা দিৱসৰ পূৰ্বে উগ্ৰপন্থীৰ বিৰুদ্ধে ভাৰতীয় সেনাই তিনিচুকীয়া জিলাৰ সীমামূৰীয়া অঞ্চল সমূহত চলাই থকা অভিযানৰ মাজতেই জিলাখনৰ পেঙেৰীৰ টেকেৰী গাঁৱত কালি নিশা প্ৰায় ১২ বজাত দুই দুধৰ্ষ আলফা সদস্যই আত্মসমৰ্পণ কৰিবলৈ বাধ্য হয়।
গোপন সূত্ৰৰ পৰা পোৱা তথ্যৰ ভিত্তিত তিনিচুকীয়া আৰক্ষী, ২১০ বেটেলিয়ন কোব্ৰা, ৬৮ বি এন চি আৰ পি এফ, ২১ পাৰা এছ এফ আৰু সেনাৰ ৩নং গাৰোৱাল ৰেজিমেণ্টে চলোৱা এক যুটীয়া অভিযানত আত্মসমৰ্পণ কৰে আলফা স্বাধীনৰ দুয়োগৰাকী কেডাৰে।
আত্মসমৰ্পণকাৰী আলফা সদস্য দুজন হৈছে ক্ৰমে ধেমাজিৰ প্ৰণৱজ্যোতি বৰা ওৰফে ৰিদীপ অসম আৰু শদিয়া অমৰপুৰৰ ৰোহিত কুলি ওৰফে পল অসম।
আত্মসমৰ্পণকাৰী দুই আলফা কেডাৰৰ পৰা দুটা চাইনিজ হেণ্ড গ্ৰেণেড জব্দ কৰিবলৈ সক্ষম হয় বুলি জানিব পৰা গৈছে।
