এইখন মুলুকতে আছে এনে এখন কাঠৰ দলং। যিখন দলং দেখিলে হয়তো আপোনাৰ চকু কপালত উঠিব।
আপুনি নিজকে সৌভাগ্যবান বুলিও ভাবিব পাৰে, কিয়নো নিতৌ সেই দলং খনৰ ওপৰেদি পাৰ হোৱাৰ দুৰ্ভাগ্য আপোনাৰ হোৱা নাই।
বিধায়ক নুৰুল হুদাৰ গৃহ সমষ্টি ৰূপহীহাটত আছে এই বিশেষ কাঠৰ দলং খন।
নগাঁও জিলাৰ বিখ্যাত ৰূপহীহাট দৈনিক বজাৰৰ পৰা প্ৰায় দুশ মিটাৰ নিলগত জৰাজীৰ্ণ অৱস্থাপ্ৰাপ্ত আছে এই কাঠৰ দলংখন।
ৰূপহীহাটৰ বহু কেইটা অঞ্চলৰ কেইবা সহস্ৰাধিক ৰাইজে নিতৌ অহা-যোৱা কৰাৰ পথত, সোণাই নদীৰ ওপৰত থকা অতি গুৰুত্বপূৰ্ণ কাঠৰ দলং এইখন।
বিগত বহু বছৰ ধৰি দলংখনৰ বিধ্বস্ত অৱস্থাৰ বাবে এতিয়া জীয়াতু ভুগিব লগীয়া হৈছে সোণাইৰ দুয়ো পাৰৰ অজস্ৰ ৰাইজে।
কোনো ৰেলিং নথকা কাঠৰ দলং খনত এতিয়া বৃহৎকায় ফাঁক। নিতৌ নিজৰ জীৱনটো হাতৰ মুঠিত লৈ জৰাজীৰ্ণ দলংখনৰে পাৰ হ’বলৈ বাধ্য হয় নিকটৱৰ্ত্তী কেইবাখনো বিদ্যালয় আৰু মাদ্ৰাছাৰ বহু সংখ্যক কণ-কণ ছাত্ৰ-ছাত্ৰী, কিশোৰ-কিশোৰী।
প্ৰায়ে সংঘটিত হয় সৰু-বৰ দুৰ্ঘটনাও, আঘাতপ্ৰাপ্ত হ’ব লগীয়া হয় শিশু-বৃদ্ধও। কিন্তু ইমানৰ পাছতো কোনো কাণসাৰ নাই সংশ্লিষ্ট বিভাগৰ তথা স্থানীয় জনপ্ৰতিনিধিৰ।
ৰাইজে বহু বছৰ ধৰি স্থানীয় বিধায়ক জনৰ ওচৰত আবেদন নিবেদন কৰিও আজি পৰ্য্যন্ত একো সুফল পোৱা নাই।
বিধায়ক নুৰুল হুদাই কেৱল মাত্ৰ আশ্বাস আৰু প্ৰতিশ্ৰুতিৰ বাহিৰে ৰাইজক কোনো ধৰণৰে সমস্যাটো সমাধানৰ চেষ্টা নকৰাৰ অভিযোগ উত্থাপন কৰিছে ৰাইজৰেএকাংশই।
মাত্ৰ এশ মিটাৰ দৈৰ্ঘ্যৰ অতি গুৰুত্বপূৰ্ণ জৰাজীৰ্ণ কাঠৰ দলং খন মেৰামতি অথবা পকীকৰণৰ বাবে হুদাই দেখুওৱা চূড়ান্ত অৱহেলাৰ বাবে এতিয়া বিধায়ক জনৰ বিৰুদ্ধে স্থানীয় ৰাইজে ক্ষোভ প্ৰকাশ কৰিছে।
ইপিনে,উপায়ন্তৰ হৈ নিজৰ গাঁঠিৰ ধন ভাঙি ৰাইজে কোনোমতে বাঁহৰে দলংখন আংশিক মেৰামতিৰ দিহা কৰিছে।
আনহাতে, এই জৰাজীৰ্ণ কাঠৰ দলং খনৰ বাবে বৃহত্তৰ অঞ্চলটোৰ ৰাইজে ভুগি অহা দুৰৱস্থাৰ বিষয়ে চৰকাৰে এবাৰ সুদৃষ্টি নিক্ষেপ কৰি শীঘ্ৰে বিহিত ব্যৱস্থা গ্ৰহণ কৰিবৰ বাবে কাবৌ-কাকতি কৰিছে ৰূপহীহাট তিনিআলিৰ ভুক্তভোগী ৰাইজে।
