জোনাই আৰক্ষীয়ে অসম-অৰুণাচল প্ৰদেশ সীমান্তৰ কেমি গাঁৱৰ পৰা দুগৰাকী ড্ৰাগছ সৰবৰাহকাৰীক ৰবিবাৰে আটক কৰে।
গাঁৱখনত পহৰা দি থকা গাঁও ৰক্ষী বাহিনীয়ে সন্দেহৰ ভিত্তিত প্ৰথমতে ড্ৰাগছ সৰবৰাহকাৰী যুৱক দুজনক আটক কৰে আৰু পৰৱৰ্তী সময়ত জোনাই আৰক্ষীক খবৰ দিয়ে।
গাঁও ৰক্ষী বাহিনীৰ খবৰৰ ভিত্তিত জোনাই আৰক্ষী ঘটনাস্থলীত উপস্থিত হয় আৰু নিতিশ পাতিৰ(২৬) আৰু কুং পেগু(৩৭) নামৰ যুৱক দুজনক আটক কৰে।
যুৱক দুজনৰ পৰা আৰক্ষীয়ে ১৫ গ্ৰাম ব্ৰাউন চুগাৰ, দুই পেকেট ভাং আৰু নগদ ৩,১০০ টকা জব্দ কৰে।
জোনাই আৰক্ষীয়ে আটক কৰা ড্ৰাগছ সৰবৰাহকাৰী দুজনে অঞ্চলটোত দীৰ্ঘদিনৰ পৰা সুৰাৰ অবৈধ ব্যৱসায়ো চলাই আছিল বুলি আৰক্ষী সূত্ৰই প্ৰকাশ কৰে।
আনহাতে, আটকাধীন যুৱক দুজনৰ সাক্ষ্যৰ ভিত্তিত আৰক্ষীয়ে জোনাই চহৰৰ সমীপৰ মুৰকংচেলেক গাঁৱৰ পৰা সঞ্জীৱ আগৰৱাল মিৰি(৪০) নামৰ আন এগৰাকী ব্যক্তিক আটক কৰে।
মিৰিৰ পৰা আৰক্ষীয়ে ২০ গ্ৰাম আফিমেৰে সৈতে ২০ গ্ৰাম চাইকোট্ৰ’পিক ঔষধ আৰু ৬৫,০০০ টকা জব্দ কৰে।
আৰক্ষীৰ সূত্ৰই আগৰৱাল মিৰিয়ে দীৰ্ঘদিনৰ পৰা ড্ৰাগছৰ ব্যৱসায়ৰ সৈতে জড়িত হৈ আছিল বুলি অভিযোগ কৰে।
আনহাতে, ঘটনা সন্দৰ্ভত আৰক্ষীয়ে সোমবাৰে এন ডি পি এছ আইনৰ ১৮(এ)/২১(এ)/২১(বি)/২৭/২৯ ধাৰাৰ অধীনত ৮৩/২০১৯ নম্বৰত এটা গোচৰ ৰুজু কৰিছে।
ঘটনা সন্দৰ্ভত আৰক্ষীয়ে পৰৱৰ্তী সময়ত আৰু অধিক এনেধৰণৰ অবৈধ ড্ৰাগছ সৰবৰাহকাৰীৰ তথ্য লাভ কৰিবলৈ সক্ষম হ’ব বুলি মত প্ৰকাশ কৰিছে।
অসম আৰক্ষীয়ে ইতিমধ্যে অৰুণাচল আৰক্ষীৰ সহযোগত সীমান্ত অঞ্চলসমূহত ড্ৰাগছৰ অবৈধ বেহা ৰোধ কৰাৰ বাবে বিশেষ অভিযান চলাই আহিছে।
