এ টি এম (ডেবিট) কাৰ্ডমুক্ত ভাৰত গঢ়াৰ পথত আগবাঢ়িছে ষ্টেট বেংক অৱ ইণ্ডিয়া।
ভাৰতৰ সৰ্ববৃহৎ বেংকটোৰ সঞ্চালক ৰজনীশ কুমাৰে সোমবাৰে এই কথা নিশ্চিত কৰিছে।
“…আমি ডেবিট কাৰ্ডসমূহ নোহোৱা কৰিব খুজিছো,” প্ৰকাশিত এক প্ৰতিবেদনত কুমাৰৰ উদ্ধৃতি।
এচ বি আইৰ এই পদক্ষেপে প্লাষ্টিক কাৰ্ড-নিৰ্ভৰ দেশৰ বৃহৎ সংখ্যক লোকৰ ওপৰত প্ৰভাৱ পেলোৱাটো খাটাং। কাৰণ, ভাৰতৰ মুঠ জনসংখ্যাৰ এক পঞ্চমাংশই এচ বি আইৰ গ্ৰাহক।
কুমাৰে সদৰী কৰা মতে, দেশত ডিজিটেল লেনদেনৰ প্ৰসাৰৰ বাবে এচ বি আয়ে কাম কৰাৰ সিদ্ধান্ত লৈছে আৰু সেয়ে ডেবিট কাৰ্ডসমূহ নোহোৱা কৰিব খোজা হৈছে।
প্লাষ্টিক কাৰ্ডৰ বিকল্প কি হ’ব? কুমাৰে জনোৱা মতে, ইতিমধ্যে থকা এচ বি আই “Yono” প্লেটফৰ্মক এইক্ষেত্ৰত ব্যৱহাৰ কৰা হ’ব।
এ টি এম মেচিনসমূহত কাৰ্ডৰ সলনি য়ন’ ব্যৱহাৰ কৰি গ্ৰাহকে ধন উলিয়াব পাৰিব।
তাৰোপৰি, যিকোনো ধৰণৰ অনলাইন/ নগদহীন লেনদেনটো কাৰ্ডৰ সলনি এই য়ন’ প্লেটফৰ্মেই ব্যৱহৃত হ’ব।
য়ন’ই ক্ৰেদিট সেৱাও আগবঢ়াব, ফলত ক্ৰেদিট কাৰ্ডসমূহো অলাগতিয়াল হৈ পৰিব।
তেওঁ জনোৱা মতে, এচ বি আয়ে ইতিমধ্যে সমগ্ৰ ভাৰতজুৰি ৬৮,০০০টা “য়ন’ কেশ্বপইণ্ট” স্থাপন কৰিছে, আৰু পৰৱৰ্তী ১৮ মাহত এই সংখ্যা ১ মিলিয়নলৈ বৃদ্ধি কৰা হ’ব।
ভাৰতত বৰ্তমান প্ৰায় ৯০ কোটি ডেবিট কাৰ্ড আছে। তাৰ বিপৰীতে ক্ৰেদিট কাৰ্ডৰ সংখ্যা হৈছে ৩ কোটি।
সৰ্ববৃহৎ বেংকটোৰ এই পদক্ষেপে ধন লেনদেনৰ সমগ্ৰ ব্যৱস্থাটোৰ আমূল পৰিৱৰ্তন সধাটো নিশ্চিত। আৰু ফলত বাকী বেংকসমূহেও অতি শীঘ্ৰে এই পথেই গ্ৰহণ কৰিব বুলি ধাৰণা কৰা হৈছে।
