‘এন আৰ চি উন্নীতকৰণ প্ৰক্ৰিয়া ভাৰতৰ আভ্যন্তৰীণ বিষয়’ ভাৰতৰ বৈদেশিক পৰিক্ৰমা মন্ত্ৰী সুব্ৰমনিয়াম জয়শংকৰে বাংলাদেশক এনেদৰে নিশ্চয়তা প্ৰদান কৰে।
অবৈধ অনুপ্ৰবেশকাৰী চিনাক্ত কৰণৰ বাবে অসমত চলি থকা নাগৰিকপঞ্জী উন্নীতকৰণ প্ৰক্ৰিয়াৰ প্ৰসংগত বুধবাৰে বাংলাদেশত সংবাদ মাধ্যমৰ আগত উল্লেখ কৰে জয়শংকৰে।
বৈদেশিক পৰিক্ৰমা মন্ত্ৰী হিচাপে দায়িত্বভাৰ গ্ৰহণ কৰাৰ পাছত প্ৰথমবাৰৰ বাবে দুদিনীয়া ভ্ৰমণ সূচীলৈ বাংলাদেশলৈ যোৱা মন্ত্ৰীগৰাকীয়ে বাংলাদেশৰ বৈদেশিক মন্ত্ৰীৰ সৈতে অনুষ্ঠিত হোৱা বৈঠকত ধনাত্মক আলোচনা হয় বুলি মত প্ৰকাশ কৰে।
অক্টোবৰত নতুন দিল্লীলৈ আহিবলগীয়া বাংলাদেশৰ প্ৰধানমন্ত্ৰী শ্বেইখ হাছিনাৰ ভ্ৰমণত এই সম্পৰ্কত অধিক অগ্ৰগতি লাভ কৰিব বুলি বৈদেশিক পৰিক্ৰমা বিভাগৰ মুখপাত্ৰ ৰাবিশ কুমাৰে টুইট কৰে।
বাংলাদেশী বৈদেশিক মন্ত্ৰী এ কে আব্দুল ম’মিনৰ সৈতে অনুষ্ঠিত হোৱা যুতীয়া সংবাদ মেলত জয়শংকৰে অসমৰ এন আৰ চি প্ৰক্ৰিয়া ভাৰতৰ আভ্যন্তৰীণ বিষয় বুলি উল্লেখ কৰি বাংলাদেশৰ ইয়াক লৈ শংকাৰ কাৰণ নাই বুলি কয়।
বৈঠকত জয়শংকৰে ভাৰত-বাংলাদেশৰ মাজত স্বাক্ষৰ হ’বলৈ বাকী থকা তিস্তা জলচুক্তি পূৰ্বৰ দৰে একেই থাকিব বুলিও ভাৰতৰ ফালৰ পৰা স্থিতি স্পষ্ট কৰে।
উল্লেখযোগ্য যে, ২০১১ চনতে ভাৰতৰ প্ৰধান মন্ত্ৰী ড০ মনমোহন সিঙৰ বাংলাদেশ ভ্ৰমণৰ সময়তে তিস্তা জলচুক্তি স্বাক্ষৰ হোৱাৰ কথা আছিল যদিও অন্তিম মুহুৰ্তত পশ্চিম বংগৰ মুখ্য মন্ত্ৰী মমতা বেনাৰ্জীৰ বিৰোধিতাৰ বাবে ইয়াক পিছুৱাই দিয়া হৈছিল।
তিস্তা জলচুক্তি বাংলাদেশৰ বাবে অত্যন্ত গুৰুত্বপূৰ্ণ চুক্তি। বাংলাদেশৰ বহু অংশ তিস্তা নদীৰ পানীৰ ওপৰত নিৰ্ভৰশীল।
বাংলাদেশৰ বৈদেশিক পৰিক্ৰমা মন্ত্ৰী ম’মিনে জয়শংকৰৰ সৈতে হোৱা সফল আলোচনাৰ অন্তত তিস্তা জলচুক্তিক লৈ আশাবাদী বুলি কয়।
