বিজেপি নেতৃত্বাধীন অসম চৰকাৰখনে শাসনভাৰ গ্ৰহণ কৰাৰ পাছতেই দুৰ্নীতিৰ বিৰুদ্ধে যি শূন্য সহনশীলতাৰ নীতি গ্ৰহণ কৰিছিল সেইয়া বৰ্তমান ফুটুকাৰ ফেনত পৰিণত হৈছে।
মাৰ্ঘেৰিটা চহৰত কেন্দ্ৰীয় চৰকাৰৰ দ্বাৰা অনুমোদিত এন এল চি পি আৰ(NLCPR) আঁচনিৰ অধীনত ন’লা নিৰ্মাণৰ কাম চলি আছে।
এই ন’লা নিৰ্মাণৰ সম্পূৰ্ণ ঠিকা লাভ কৰিছিল গুৱাহাটীৰ মেচাৰ্ছ গঙ্গোত্ৰী এণ্টাৰপ্ৰাইজৰ ভৃগুনাথ শ্বাহ নামৰ এজন ঠিকাদাৰে।
কিন্তু ৰহস্যজনকভাৱে উক্ত প্ৰকল্পটোৰ ঠিকা কেনেকৈ হেমন্ত শৰ্মা আৰু অশ্বিনী বৰুৱা নামৰ ঠিকাদাৰে লাভ কৰি দুৰ্নীতিৰ অংশীদাৰ হৈছে ই সকলোকে আচৰিত কৰি তুলিছে।
অতি পৰিতাপৰ বিষয় যে কোটি টকীয়া ন’লা নিৰ্মাণৰ কামত ঠিকাদাৰে নিম্ন মানদণ্ডৰ সামগ্ৰী যোগান ধৰি চৰকাৰৰ টকা আত্মসাৎ কৰাৰ অভিযোগ উত্থাপিত হৈছে।
নিৰ্মাণৰ আৰম্ভণিতেই দুৰ্নীতি, অনিয়ম হোৱাত ছাত্ৰ মুক্তি সংগ্ৰাম সমিতিয়ে মাৰ্ঘেৰিটা মহকুমাধিপতিক স্মাৰক পত্ৰ প্ৰদান কৰি এই দুৰ্নীতিৰ তদন্ত কৰিবলৈ দাবী জনাইছিল৷
কিন্তু এই দুৰ্নীতিৰ লগত মাৰ্ঘেৰিটা নগৰ সমিতি জড়িত থকাত এই তদন্ত ভেকো-ভাওনাত পৰিণত হয়।
ছাত্ৰ মুক্তি সংগ্ৰাম সমিতিৰ তিনিচুকীয়া জিলা সমিতিয়ে এক প্ৰেছ বিবৃতিৰ জৰিয়তে এই ন’লা নিৰ্মাণৰ কামটো যি অনুমান আৰু পৰিকল্পনাৰ মতে হ’ব লাগিছিল তেনে ধৰণে হৈ উঠা নাই বুলি অভিযোগ কৰে।
মাৰ্ঘেৰিটা কোষাগাৰ কাৰ্যালয়ৰ আগেদি যোৱা ন’লাটোৰ ওপৰত আজিও সম্পূৰ্ণকৈ কালভাৰ্ট(Culvert) নলগোৱাৰ ফলত ন’লাটো নিৰ্মীয়মান অৱস্থাতেই ভাঙি যোৱাৰ লগতে গছ-গছনি আৰু বালিৰে পোত গৈছে।
প’ল ফিল্ডৰ কাষেদি যোৱা ন’লাটো আজিও সম্পূৰ্ণ নহ’ল যাৰ ফলস্বৰূপে এই ন’লাটোও ভাঙি যোৱাৰ লগতে গছ-গছনিৰে পোত গৈছে।
সেইদৰে,বালুঘাটৰ ন’লা নিৰ্মাণৰ কাম আজিও সম্পূৰ্ণ নোহোৱাৰ ফলত এই ন’লাটোও জহি-খহি গৈছে। ২নং ৱাৰ্ডৰ ন’লাটোৰ কেৱল গাঁত খান্দিয়েই নিজ দায়িত্ব সামৰিছে ঠিকাদাৰে।
দহোটীয়া পথৰ ন’লাটোও পোত যোৱা পৰিলক্ষিত হৈছে। মাৰ্ঘেৰিটা পাব্লিক উচ্চতৰ মাধ্যমিক বিদ্যালয়ৰ কাষেদি যোৱা ন’লাটো আজি পৰ্যন্ত সম্পূৰ্ণ হৈ নুঠাৰ ফলত ন’লাটো পোত গৈছে।
সংগঠনটোৱে’তথ্য জনা অধিকাৰ আইনৰ’ অধীনত আবেদন নং ৩৫ এফ ৪৪৯৬৪১ৰ যোগেদি ন’লা কিমান শতাংশ নিৰ্মাণ হোৱাৰ লগতে বৰ্তমান পৰ্যন্ত কিমান ধন মোকলাই দিয়া হৈছে আৰু ন’লা নিৰ্মাণৰ সম্পূৰ্ণ প্ৰকল্পটোৰ মানচিত্ৰ বিচাৰি আবেদন কৰিছিল৷
কিন্তু মাৰ্ঘেৰিতা নগৰ সমিতিয়ে এই তথ্য আজিলৈকে নিদিলে বুলি জানিবলৈ দি সংগঠনটোৱে যোৱা ২০১৮চনৰ ডিচেম্বৰ মাহতেই আবেদন কৰি তথ্য নোপোৱাত আবেদনৰ তথ্য বিচাৰি দুবাৰকৈ পুনৰ আবেদন কৰিলে যদিও কোনো তথ্য নাপালে৷
সংগঠনটোৱে এই দুৰ্নীতিত জড়িত থকা ঠিকাদাৰ, মাৰ্ঘেৰিটা নগৰ সমিতিৰ একাংশ নেতা, পালিনেতাৰ ওপৰত ৰাইজে সন্দেহৰ গোন্ধ পাইছে বুলি মত প্ৰকাশ কৰে।
ছাত্ৰ মুক্তি সংগ্ৰাম সমিতিয়ে ৰাইজৰ সহযোগত মাৰ্ঘেৰিটা নগৰ সমিতিৰ কাৰ্যালয় ঘেৰাও কাৰ্যসূচী ৰূপায়ণ কৰিব বুলিও হুংকাৰ দিছে ৷
