ৰাষ্ট্ৰীয় নাগৰিকপঞ্জীক লৈ নাগৰিক সভাই দেওবাৰে গুৱাহাটীৰ অসম সাহিত্য সভাৰ ভগৱতী প্ৰসাদ বৰুৱা ভৱনত অনুষ্ঠিত কৰে এখন সজাগতামূলক ঘূৰণীয়া মেজমেল ৷
৩১ আগষ্টত প্ৰকাশ পাবলগীয়া ৰাষ্ট্ৰীয় নাগৰিকপঞ্জীক লৈ ৰাজ্যবাসীৰ মাজত সজাগতা সৃষ্টি কৰাৰ উদ্দেশ্যেই এইদৰে আলোচনাত মিলিত হয় ৰাজ্যৰ বিভিন্ন স্তৰৰ সচেতন লোক, লেখক, সাংবাদিক, অধিবক্তাকে ধৰি একাংশ নাগৰিক৷
অসম সাহিত্য সভা আৰু নন্দ তালুকদাৰ ফাউণ্ডেশ্যনৰ উদ্যোগত অনুষ্ঠিত হোৱা নাগৰিক সভাখনত “NRCৰ পিছৰ অসম জ্ঞানৰ সন্ধানত এক ঘূৰণীয়া মেজমেল” শীৰ্ষক বিষয় লৈ আলোচনা হয়।
দেওবাৰে অনুষ্ঠিত হোৱা সভাখনত অংশগ্ৰহণ কৰে অসম সাহিত্য সভাৰ সভাপতি পৰমানন্দ ৰাজবংশী, ৰাজ্যৰ জ্যেষ্ঠ সাংবাদিক প্ৰশান্ত ৰাজগুৰু, সাংবাদিক মৃণাল তালুকদাৰকে ধৰি বহুসংখ্যক ব্যক্তিয়ে ৷
সভাত ৰাষ্ট্ৰীয় নাগৰিকপঞ্জীৰ প্ৰকাশৰ সময়ত অসমবাসী ৰাইজক শান্তি-শৃংখলা বৰ্তাই ৰাখিবলৈ আহ্বান জনোৱা হয় ৷
জ্যেষ্ঠ সাংবাদিক প্ৰশান্ত ৰাজগুৰুৱে এন আৰ চি প্ৰকাশৰ সময়ত যাতে কোনোধৰণৰ অপ্ৰীতিকৰ পৰিস্থিতি সৃষ্টি নহয় তাৰ বাবে সকলোকে সচেতন হোৱাৰ আহ্বান জনায়।
তদুপৰি, সদৌ অসম ছাত্ৰ সন্থা, গণ সংগ্ৰাম পৰিষদ আৰু অসমবাসী ৰাইজে যি ছবছৰীয়া আন্দোলন গঢ়ি তুলিছিল তাৰ পৰিপ্ৰেক্ষিতত যি নাগৰিকপঞ্জী প্ৰকাশ হ’বলৈ গৈ আছে সেইখন যাতে সকলোৰে গ্ৰহণযোগ্য হৈ উঠে, কোনেও যাতে ইয়াক লৈ বিভ্ৰান্তিৰ সৃষ্টি কৰিব নোৱাৰে তাৰ বাবে তেওঁ সকলোকে আহ্বান জনায়।
‘’উচ্চতম ন্যায়ালয়, নাগৰিকপঞ্জী কৰ্তৃপক্ষ, অসম পাব্লিক ৱৰ্কছৰ অভিজিৎ শৰ্মা, আৰু সদৌ অসম ছাত্ৰ সন্থাই ৰাষ্ট্ৰীয় নাগৰিকপঞ্জীক লৈ নিষ্ঠাৰে কাম কৰি গৈছে,’’- ৰাজগুৰুৱে কয়৷
বিশিষ্ট সাংবাদিকগৰাকীয়ে লগতে ‘’ৰাষ্ট্ৰীয় নাগৰিকপঞ্জীত কিবা ভুল থাকিলেও পৰৱৰ্তী কালত সংশোধনৰ অজস্ৰ পথ আছে ৷ যিসকলৰ নাম প্ৰকাশ নহয় তেওঁলোকে আবেদন কৰিবলৈ আইনী সুবিধা লাভ কৰিব৷ গতিকে ভীতিগ্ৰস্ত হোৱাৰ প্ৰয়োজন নাই’’ বুলি উল্লেখ কৰে ৷
