মাংস খাবলৈ আৰু জন্তু বধ কৰাৰ দৰকাৰ নহ’ব। আই আই টি গুৱাহাটীৰ এদল গৱেষকে তেওঁলোকৰ লেবেৰটৰীত কৈষিক সংঘটন ঘটাই কৃত্ৰিম মাংস (tissue engineered meat)উদ্ভাৱন কৰি উলিয়াইছে।
গৱেষকসকলে দাবী কৰা মতে এই মাংস জন্তুৰ মাংসৰ সমানেই পুষ্টিকৰ আৰু সোৱাদযুক্ত হ’ব। ডেকান হেৰল্ডৰ বাতৰিত প্ৰকাশ পাইছে এই খৱৰ।
গুৱাহাটী আই আই টিৰ বায়’চায়েন্স আৰু বায়’ইঞ্জিনিয়াৰিঙৰ এগৰাকী সহযোগী অধ্যাপক বিমান বি মণ্ডলৰ নেতৃত্বৰ দলটোৱে ইয়াৰ উৎপাদন তথা উপভোগৰ বাবে এক স্বত্ত্ব (পেটেন্ট) লাভ কৰিছে।
‘’ইয়াত জন্তুৰ মাংসপেশীৰ আদি কোষ নিলগাই সৰু বায়’পছিৰ জৰিয়তে খোৱাৰ যোগ্য সামগ্ৰী ভিত্তিত বিকশিত কৰা হৈছে। চৰ্বিযুক্ত কোষ, জীৱদেশৰ কোষ বা হাড়ৰ কোষ মাংসপেশীৰ ষ্টেম কোষৰ সৈতে সংযুক্ত কৰি বিভিন্ন পৰ্যায়ত বিকশিত কৰিব পাৰি আৰু বৰ্তমান এইটো কৰি উলিওৱা হৈছে। এই কৃত্ৰিম মাংস (tissue engineered meat) অলপতে আমাৰ লেবেৰটৰীত কম খৰচী উৎকৰ্ষণ মাধ্যমত কৰ্ষণ তথা বিকাশিত কৰি তোলা হৈছে,’’-গৱেষকৰ দলটোৱে জাৰি কৰা এক বিবৃতিত কয়।
কোৱা হৈছে যে এই পদ্ধতি গ্ৰাহকৰ পছন্দ অনুসৰি বিভিন্ন আকাৰ তথা জোখত চৰ্বিযুক্ত মাংস বা সম্পূৰ্ণ শুকান মাংসৰ উৎপাদনলৈ সালসলনি কৰিব পৰা যায়।
মাংসবিধৰ পুষ্টি বৃদ্ধি কৰিবলৈ দৈনন্দিন ব্যৱহৃত খোৱাৰ উপযোগী উপাদান যথোপযুক্তভাৱে ব্যৱহাৰ কৰা হৈছে।
তেওঁলোকে দাবী কৰে যে ইয়াক নীতিগত দিশৰ পৰা সুৰক্ষিত কৰিবলৈ হ’ৰমন, জন্তুৰ চেৰাম (দেহৰস), গঠন বৃদ্ধিৰ বা এন্টিবায়’টেকিছৰ দৰে বাহ্যিক ৰাসায়নিক পদাৰ্থ ব্যৱহাৰ নিষিদ্ধ কৰা হৈছে।
কোৱা হৈছে যে লেবেৰটৰীত বনোৱা এই মাংসই ভাৰতৰ লগতে বিদেশতো সমাদৰ লাভ কৰিব কিয়নো ই পুষ্টিকৰ আৰু বৰ্দ্ধিত ফাষ্ট ফুডৰ উচ্চ চাহিদাৰ প্ৰয়োজনীয়তাৰ বাবে সুলভ হ’ব।
তদুপৰি, ক্ৰয়সাধ্য মাংসবিধ সোৱাদ, আকৃতি,পুষ্টি গুণ প্ৰাকৃতিক মাংসৰ দৰে হোৱালৈ চাই তথা জন্তু হত্যা প্ৰতিৰোধ কৰালৈ চাই ভৱিষ্যতে দেশত ইয়াৰ চাহিদা বৃদ্ধি পোৱাৰ সম্ভাৱনা ব্যক্ত কৰিছে গৱেষকৰ দলটোৱে।
