প্ৰধান মন্ত্ৰী নৰেন্দ্ৰ মোদীয়ে দেশত ফিটনেছৰ মান উন্নত কৰাৰ বাবে ‘ফিট ইণ্ডিয়া মুভমেন্ট’ অভিযানৰ শুভাৰম্ভণি কৰিছে।
প্ৰধান মন্ত্ৰী মোদীয়ে কিছুমান গুৰুতৰ ৰোগৰ বিষয়ে উল্লেখ কৰি জনসাধাৰণৰ ফিটনেছ সম্পৰ্কত উদ্বিগ্নতা প্ৰকাশ কৰিছে।
প্ৰদূষণ তথা জ্যাংক ফুডৰ বাবে দিল্লীত নাগৰিকৰ স্বাস্থ্যৰ মান বহুত নিম্নমানৰ।
কিন্তু দিল্লীৰে দুখন এনেকুৱা গাঁও আছে য’ত বাস কৰা লোকসকলৰ ফিটনেছ অত্যন্ত চকুত লগা।
দক্ষিণ দিল্লীত থকা অ’সোলা আৰু ফতেহপুৰ বেৰী নামৰ এই গাঁও দুখনৰ লোকসকলে নিজৰ অতুলনীয় ফিটনেছৰ কাৰণে প্ৰখ্যাত হৈ পৰিছে।
দুয়োখন গাঁৱকে পালোৱান তথা বাউন্সাৰৰ গাঁও বুলি কোৱা হয়।
ইয়াৰ বেছিভাগ যুৱকে হয়তো বৃত্তিগতভাৱে বাউন্সাৰৰ কাম কৰে নাইবা কোনো জিম বা ফিটনেছ চেন্টাৰত প্ৰশিক্ষকৰ কাম কৰি আছে।
উক্ত লোকসকলৰ দেশীয় খোৱা-বোৱাৰ লগতে ইয়াৰ মাটিৰ প্ৰতি থকা টানেই তেওঁলোকৰ অতুলনীয় ফিটনেছৰ গোপন ৰহস্য।
গাঁৱখনৰ যুৱকসকলৰ খোৱাৰ তালিকাখনো বৰ আকৰ্ষণীয়। এজন বাউন্সাৰে দিনটোত ৪ লিটাৰ গাখীৰ আৰু ২ কিলো দৈ তথা এক ডজন কল আহাৰ হিচাপে গ্ৰহণ কৰে।
তদুপৰি, গাঁৱখনত ডেইৰী সুলভ হোৱা বাবে লোকসকলৰ খোৱাবোৱাৰ বাবে সামগ্ৰীসমূহ সহজতে পোৱা যায়।
গাঁও দুখনৰ প্ৰতিখন ঘৰতে কমেও এজনকৈ পুত্ৰ সন্তানে বাউন্সাৰৰ প্ৰশিক্ষণ গ্ৰহণ কৰে। এই বাউন্সাৰসকলে ক্লাৱ বা হোটেলত ভাল দৰমহাৰ চাকৰিও লাভ কৰে।
গাঁও দুখনত থকা যুৱকসকল বিষয়ে কোৱা হয় যে ইয়াত কাচিৎহে কোনো এজন ওলাব যিয়ে কেতিয়াও জিমলৈ যোৱা নাই বা পালোৱানী আখৰাত যোগ দিয়া নাই।
অ’সোলা গাঁৱৰ কেইবাজনো প্ৰশিক্ষকে নামী জিমৰ প্ৰশিক্ষক হিচাপে কৰ্মৰত হৈ আছে।
ফিটনেছ চেন্টাৰ বা ক্লাৱত বাউন্সাৰৰ কাম নকৰাসকলেও আনকি দিনটো অনুশীলনত ব্যস্ত থাকে।
গাঁও দুখনৰ আন এটা ডাঙৰ বৈশিষ্ট হৈছে যে ইয়াত নিচাযুক্ত পদাৰ্থৰ ব্যৱহাৰ একেবাৰে নাই বুলি ক’ব পাৰি।
গাঁও দুখনৰ যুৱ সমাজ তেওঁলোকৰ ভৱিষ্যতকলৈ খুবেই সচেতন।
