চাৰি দশক জুৰি চলা নিৰৱছিন্ন আন্দোলন, অপেক্ষা আৰু বহু আশা প্ৰত্যাশাৰ অন্তত মহামান্য উচ্চতম ন্যায়ালয়ৰ প্ৰত্যক্ষ নিৰীক্ষণত প্ৰকাশ পালে ৰাষ্ট্ৰীয় নাগৰিক পঞ্জীৰ চূড়ান্ত তালিকা।
Online যোগে উপলব্ধ হ’ল আবেদনকাৰীয়ে নিজৰ নাম এন আৰ চিত চাব পৰা ব্যৱস্থা
এন আৰ চিৰ চূড়ান্ত তালিকাত মুঠ ৩,১১,২১,০০৪ গৰাকী লোকৰ নাম সন্নিবিষ্ট হোৱাৰ বিপৰীতে দাবী আৰু আপত্তি দাখিল নকৰা সকলকে ধৰি মুঠ ১৯,০৬,৬৫৭ গৰাকী লোকৰ নাম বাদ পৰিল।
এন আৰ চি সেৱা কেন্দ্ৰ, চক্ৰ বিষয়াৰ কাৰ্যালয়, উপায়ুক্তৰ কাৰ্যালয় আৰু ৱেবচাইট যোগে কাৰ্যালয় আৰু ৱেবচাইট যোগে লাভ কৰিব এন আৰ চিৰ এই চুড়ান্ত তালিকা উপলব্ধ হ’ব।
২০১৭ চনৰ ৩১ ডিচেম্বৰত প্ৰকাশিত এন আৰ চিৰ প্ৰথম খচৰাত ৩.২৯ কোটি আবেদনকাৰীৰ ভিতৰত ১.৯৪ কোটি লোকৰ নাম অন্তৰ্ভুক্ত হৈছিল।
আনহাতে, ২০১৮ ৰ ৩১ জুলাইত প্ৰকাশিত চুড়ান্ত খচৰাৰ পৰা বাদ পৰিছিল প্ৰায় ৪০ লাখ লোকৰ নাম।
অৱশ্যে, চূড়ান্ত এন আৰ চিত সকলোৰে নাম চাব পৰাৰ সুবিধা উপলব্ধ নহয়। কেৱল বিশেষ ধৰণৰ স্থিতিৰ নামবোৰহে চাব পাৰিব আবেদনকাৰীয়ে।
চূড়ান্ত এন আৰ চিত অন্তৰ্ভূক্ত সকলোৰে নাম অহা ৭ ছেপ্টেম্বৰৰ পৰাহে অনলাইনযোগে চাব পৰাকৈ উপলব্ধ হ’ব।
তলত উল্লেখ কৰা লোকসকলেহে ৭ ছেপ্তেম্বৰৰ পূৰ্বে এন আৰ চিত নিজৰ নাম অন্তৰ্ভূক্ত হৈছে নে নাই চাব পাৰিব-
ক) যিসকল লোকৰ নাম ২০১৮ চনৰ ৩১ জুলাইত প্ৰকাশ পোৱা চূড়ান্ত খচৰাত অন্তৰ্ভুক্ত হোৱা নাছিল, অথবা ২০১৯ চনৰ ২৬ জুনত প্ৰকাশিত অতিৰিক্ত খচৰাৰ পৰা বাদ দিয়া হৈছে।
খ) যিসকল লোকৰ নাম অন্তৰ্ভুক্তিৰ বিৰুদ্ধে কোনো আপত্তি দাখিল হৈছে।
ইয়াৰ উপৰি, তেওঁলোকে অনলাইনযোগে নিজৰ ARN Search কৰিও এন আৰ চিত নাম চাব পাৰিব। তাৰ বাবে এন আৰ চিৰ ৱেবচাইটৰ Supplementary inclusion / Exclusion list (Final NRC) status লিকংত যাব লাগিব।
যিসকল ব্যক্তিৰ নাম ২০১৮ চনৰ ৩১ জুলাই প্ৰকাশ পোৱা এন আৰ চিৰ চূড়ান্ত খচৰাত অন্তৰ্ভুক্ত আছিল অথৱা ২০১৯ চনৰ ২৬ জুনত প্ৰকাশিত অতিৰিক্ত খচৰাত আছিল, তেওঁলোকক ২০১৯ চনৰ ৫ জুলাইৰ পৰা হোৱা কোনো শুনানিলৈ মতা হৈছিল তেওঁলোকে একেই পদ্ধতিৰে এন আচ চিত নিজৰ নাম চাব পাৰিব।
যদি তেওঁলোকক কোনো শুনানিলৈ মতা নাছিল তেনেহ’লে সেইসকল লোকে নিশ্চিত হ’ব পাৰে যে তেওঁলোকৰ নাম চূড়ান্ত এন আৰ চিত থাকিব।
উল্লেখযোগ্য যে, এন আৰ চি উন্নীতকৰণ প্ৰক্ৰিয়াত ৰাজ্য চৰকাৰৰ প্ৰায় ৫২,০০০ কৰ্মচাৰী সুদীৰ্ঘ সময়ৰ বাবে নিয়োজিত হৈ আছে।
দাবী আৰু আপত্তি প্ৰক্ৰিয়াৰ ফলাফলত কোনো ব্যক্তি অসন্তষ্ট হ’লে বিদেশী ন্যায়াধীকৰণত আপীল কৰিব পাৰিব বুলি এন আৰ চিৰ ৰাজ্যিক সমন্বয়কে প্ৰকাশ কৰা প্ৰেছ বিবৃতিত উল্লেখ কৰা হৈছে।
