এজন জ্যেষ্ঠ চিকিৎসকক শ্ৰমিকৰৰ দ্বাৰা মৰিয়াই হত্যা কৰাৰ পিছত এমালগেমেটেড প্লেণ্টেশ্যন প্ৰাইভেট লিমিটেডৰ টীয়ক চাহ বাগিচাখনত আজিৰ পৰা লক-আউট ঘোষণা কৰা হৈছে।
মূল বাগিচা, কলঘৰৰ লগতে বাগিচাখনৰ খনিকৰ-ডালিমী শাখাটোতো লক-আউট ঘোষণা কৰা হৈছে। এই কথা বাগিচাৰ কৰ্তৃপক্ষৰ সূত্ৰই কয়।
৩১ আগষ্টত এটা কৰুণ ঘটনাত বাগিচাখনৰ চিকিৎসক ডাঃ দেবেন দত্তক ক্ৰোধোন্মত্ত শ্ৰমিকে মৰিয়াই হত্যা কৰিছিল। চিকিৎসকজন কৰ্তব্যত উপস্থিত নথকা বাবেই এজন ৰোগীৰ মৃত্যু হোৱাৰ অভিযোগ আনিছিল শ্ৰমিকসকলে।
বাগান কৰ্তৃপক্ষই লক-আউট জাননীত জানিবলৈ দিছে যে এই বৰ্বৰোচিত ঘটনাটোৰ পিছত বাগিচাৰ পৰিচালকৰ জীৱন আৰু সম্পত্তিৰ প্ৰতি নিৰাপত্তাহীনতা আহি পৰিছে। স্বাভাৱিক পৰিস্থিতি ঘূৰি অহা আৰু শ্ৰমিকসকলে অনুশাসন, সদাচাৰ আৰু অভাৱ-অভিযোগবোৰৰ সাংবিধানিক প্ৰতিকাৰ মানি ল’ম বুলি প্ৰতিশ্ৰুতি নিদিয়ালৈকে এয়া বাহাল থাকিব বুলি জাননীখনত কোৱা হয়।
আনহাতে নিৰ্মম হত্যাকাণ্ডটোত অভিযুক্ত ২১জন শ্ৰমিকক আজি টীয়ক আৰক্ষীয়ে সোধা-পোছাৰ বাবে আটক কৰিছে।
আজি আৰক্ষী মহাপৰিদৰ্শক (আইন শৃংখলা)ৰ দীপক কেড়িয়াই যোৰহাটত উপস্থিত হৈ বাগিচাখন ভ্ৰমণ কৰে আৰু পৰিস্থিতিৰ বুজ লয়। কেড়িয়াই যোৰহাট আৰক্ষী থানাত জ্যেষ্ঠ আৰক্ষী বিষয়াসকলৰ সৈতে এখন বৈঠকত মিলিত হৈ ঘটনাটোৰ তদন্ত প্ৰক্ৰিয়াৰ পৰ্য্যালোচনা কৰে।
তেওঁ ঘটনাত জড়িতসকলক চিনাক্ত কৰাৰ বাবে অতি তৎপৰতাৰে ব্যৱস্থা ল’বলৈ নিৰ্দেশ দিয়ে।
ইপিনে যোৰহাটৰ শ্ৰম আয়ুক্তৰ কাৰ্য্যালয়ৰ বিষয়ববীয়াই বাগিচাখনলৈ স্বাভাৱিক পৰিৱেশ ঘূৰাই আনিবৰ চেষ্টাৰে বাগান কৰ্তৃপক্ষ আৰু শ্ৰমিকসকলৰ মাজত আলোচনা অনুষ্ঠিত কৰাৰ চেষ্টা কৰি আছে।
