কেন্দ্ৰীয় গৃহ মন্ত্ৰী অমিত শ্বাহে দুদিনীয়া ভ্ৰমণসূচী লৈ ৮ ছেপ্টেম্বৰত অসমত উপস্থিত হ’ব।
জানিব পৰা মতে, দুদিনীয়া অসম ভ্ৰমণসূচীৰ সময়ত গৃহমন্ত্ৰী শ্বাহে নৰ্থ-ইষ্টাৰ্ণ কমিটিৰ সৈতে পূৰ্ণাংগ অধিবেশনত অংশগ্ৰহণ কৰিব।
পূৰ্ণাংগ অধিবেশনত উত্তৰ-পূবৰ আঠখন ৰাজ্যৰ মুখ্য মন্ত্ৰী আৰু ৰাজ্যপাল সকলেও অংশগ্ৰহণ কৰাৰ সম্ভাৱনা আছে।
৩১ আগষ্টত অসমত চূড়ান্ত ৰাষ্ট্ৰীয় নাগৰিক পঞ্জী প্ৰকাশৰ পাছত উত্তৰ-পূবৰ ৰাজ্যসমূহৰ সামগ্ৰিক আইন-শৃংখলাজনিত পৰিস্থিতি অধ্যায়ন আৰু আৰ্থ-সামাজিক বিকাশৰ বিষয়ে পৰ্যালোচনা কৰাৰ উদ্দেশ্যে শ্বাহে অসম ভ্ৰমণলৈ অহিব বুলি ধাৰণা কৰা হৈছে।
উল্লেখযোগ্য যে, ৰাষ্ট্ৰীয় নাগৰিক পঞ্জী প্ৰকাশৰ পাছত কেন্দ্ৰীয় গৃহমন্ত্ৰী গৰাকীৰ প্ৰস্তাৱিত অসম ভ্ৰমণে যথেষ্ট তাৎপৰ্য্য বহন কৰিছে।
কেন্দ্ৰত বিজেপি নেতৃত্বাধীন চৰকাৰখনে দ্বিতীয়টো কাৰ্যকালৰ বাবে শাসনলৈ অহাৰ পাছত গৃহ মন্ত্ৰী হিচাপে দায়িত্বভাৰ গ্ৰহণ কৰে শ্বাহে।
দেশৰ গৃহ মন্ত্ৰী হিচাপে দায়িত্ব লোৱাৰ পাছত অমিত শ্বাহৰ এয়া প্ৰথটো অসম ভ্ৰমণ হ’ব।
