কংগ্ৰেছৰ শীৰ্ষ নেতা তথা প্ৰাক্তন কেন্দ্ৰীয় গৃহ মন্ত্ৰী পি চিদাম্বৰমে তিহাৰ জেইলত শুবলৈ গাৰু আৰু বহিবলৈ চকী পোৱা নাই।
বিগত ১৪ দিন তিহাৰ জেইলত কটোৱাৰ পাছত বৃহস্পতিবাৰে পি চিদাম্বৰম আদালতত হাজিৰ কৰোৱা হয়।
ইয়াতেই তেওঁৰ অধিবক্তাই নেতাগৰাকীয়ে জেইলত পোৱা অসুবিধাৰ তালিকাখন আদালতক দাখিল কৰে।
চিদাম্বৰমৰ ফালৰ পৰা আদালতত উপস্থিত থকা জ্যেষ্ঠ অধিবক্তা কপিল চিব্বালে কয় যে জেইলত চিদাম্বৰক গাৰুও দিয়া হোৱা নাই আৰু চকীও দিয়া নাই। ইয়াৰ বাবে তেওঁ মাটিত বহিবলগীয়া হৈছে।
চিব্বালেকয় যে তিহাৰ জেইলত তেওঁক বিচনাতো দিয়া হৈছে, কিন্তু গাৰু দিয়া হোৱা নাই। কংগ্ৰেছ নেতা চিব্বালে প্ৰশ্ন কৰে যে গোটেই দিনটো কেনেকৈ বিচনাত বহি থাকিব পাৰে?
অধিবক্তাগৰাকীয়ে আদালতক কয় যে গোটেই দিন বিচনাত বহি থকাৰ বাবে চিদাম্বৰমৰ কঁকালৰ বিষ বৃদ্ধি পাইছে। তেওঁৰ পেটতো বিষ হৈছে।
কপিল চিব্বালৰ সৈতে অধিবক্তা অভিষেক মনু সিংভীয়েও চিদাম্বৰমৰ মেডিকেল চেকআপ কৰোৱাৰ বাবে আদালতত আবেদন জনায়।
আনহাতে, চিবিআইৰ ফালৰ পৰা উপস্থিত থকা ছলিচিটৰ জেনেৰেল তুষাৰ মেহতাই কয় যে চিদাম্বৰমক গাৰু আৰু চকী নিদিয়া সম্পৰ্কে তেওঁ অৱগত নহয়। জেইলৰ যি নিয়ম সেয়া পালন কৰা হৈছে।
মেহতাই লগতে কয় যে চিদাম্বৰমৰ অধিবক্তাই গোচৰটো চাঞ্ল্যকৰ কৰি তুলিবলৈ চেষ্টা কৰিছে। যদি চিদাম্বৰমৰ কিবা বস্তুৰ প্ৰয়োজন আছে, তেতিয়াহ’লে তিহাৰ জেইল প্ৰশাসনক জনাব পাৰিলেহেঁতেন।
চিদাম্বৰমে তেনেকুৱা একো কোৱা নাই বুলি উল্লেখ কৰি মেহতাই আদালত এইবোৰ কৈ চিদাম্বৰমে সহানুভুতি ল’ব বিচাৰিছে বুলি কয়।
আনহাতে, আদালতে চিদাম্বৰমৰ স্বাস্থ্য পৰীক্ষা এইমছ, ছফদৰজং বা আৰ এম এল হাস্পাতলত কৰিবলৈ নিৰ্দেশ দিয়ে।
তদুপৰি, তিহাৰ জেইলৰ অধীক্ষকক জেইলৰ নিয়ম অনুসৰি চিদাম্বৰক গাৰু আৰু চকী দিয়াৰ ক্ষেত্ৰত বিবেচনা কৰিবলৈ নিৰ্দেশ দিয়ে।
বৃহস্পতিবাৰে পি চিদাম্বৰমক ১৪ দিনৰ ন্যায়িক জিম্মা সমাপ্ত হোৱাৰ পাছত ৰাওজ এভিনিউ আদালতত হাজিৰ কৰোৱা হয়। ইয়াৰ পূৰ্বে তেওঁ ১৪ দিন চিবিআইৰ জিম্মাতো কটাইছিল।
বৃহস্পতিবাৰে শুনানিৰ পাছত আদালতে চিদাম্বৰক অহা ৩ অক্টোবৰ পৰ্যন্ত পুনৰ জেইললৈ প্ৰেৰণ কৰে।