নাগৰিকত্ব বিধেয়কৰ সমৰ্থনেৰে জাতি-মাটি-ভাষাৰ “নতুন সংজ্ঞা” দেৱালত লিখি “কেব” বিৰোধী আছুক প্ৰত্যাহ্বান জনোৱাৰ ধৃষ্টতা কৰিলে এটা সংগঠনে।
মহানগৰীৰ খানাপাৰাস্থিত পশুপালন আৰু পশু চিকিৎসা বিভাগৰ যুটীয়া সঞ্চালকৰ কাৰ্য্যালয় চৌহদৰ দেৱালত দেখা গৈছে এক বিতৰ্কিত দেৱাল লিখন।
“আমাৰ লক্ষ্য- জাতি-হিন্দু বাংলাদেশী, মাটি- ৰামদেৱ, ভাষা- বঙালী” এই বিতৰ্কিত দেৱাললিখনি এ বি ভি পি (অখিল ভাৰতীয় বিদ্যাৰ্থী পৰিষদে)ৰ নামত লিখা হৈছে, যিটো অস্বীকাৰ কৰিছে হিন্দুত্ববাদী সংগঠনটোৱে।
গুৰুত্বপূৰ্ণ কথাটো হ’ল, এই প্ৰচাৰবাণী লিখোঁতাই পূৰ্বে তাত থকা সদৌ অসম ছাত্ৰ সন্থাৰ নাম আৰু সংগঠনটোৰ “কেব” বিৰোধী প্ৰচাৰবাণীবোৰ মচি তাৰ ওপৰতে লিখিছে।
ক’লা ৰঙেৰে মচি ABVP বুলি লিখি দিয়াৰ পূৰ্বে দেৱালকেইখনত লিখা আছিল “AASU, AASU in our blood”.
আছুৰ “কেব” বিৰোধী স্থিতিক স্পষ্টকৈ প্ৰত্যাহ্বান জনাবলৈ কৰা যেন ভাব হোৱা এই কাণ্ডক অস্বীকাৰ কৰিছে এ বি ভি পিৰ ৰাজ্যিক কাৰ্য্যনিৰ্বাহক তথা প্ৰাক্তন ৰাজ্যিক সাধাৰণ সম্পাদক নয়নজ্যোতি শৰ্মাই।
“আমাৰ কাৰ্য্যকৰ্তাই বেলেগৰ লিখনি মচি দেৱাল লিখন কৰা নাই। বৰ্তমান দেৱাল লিখন বন্ধ কৰি ৰখা হৈছে, কেইবাদিনো আগতে দেৱাল লিখন চলিছিল”, কোনো দুষ্ট চক্ৰইহে এই কাম কৰা বুলি মন্তব্য কৰি শৰ্মাই কয়।
শেহতীয়াকৈ ৰাজ্যখনত চকুত পৰাকৈ ভিত্তি আহৰণ কৰা হিন্দুত্ববাদী ছাত্ৰ সংগঠন অখিল ভাৰতীয় বিদ্যাৰ্থী পৰিষদে (এ বি ভি পি) ঘটনাটোক কোনো দুষ্টচক্ৰৰ কাম আখ্যা দিছে।
ঘটনাটোত সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈৰ মত, এয়া অসম বিৰোধী চক্ৰৰ কাম হ’ব।
“এই কামৰ লগত অসম বিৰোধী চক্ৰ জড়িত থাকিব পাৰে। এইবোৰ সংঘাত সৃষ্টি কৰিবলৈ কৰা কাম-কাজ। এইবোৰ কামত কোনো গঠনমূলক কথা-বতৰা নাই। ছাত্ৰ সন্থাৰ শ্ল’গান ক’লা ৰঙেৰে মচিলেও মানুহৰ হৃদয়ৰ পৰা ছাত্ৰ সন্থাক মচি দিব নোৱাৰে”, গগৈয়ে কয়।
অবৈধ হিন্দু বাংলাদেশীক সংস্থাপনৰ বাবে বিজেপি চৰকাৰে আনিব খোজা নাগৰিকত্ব সংশোধনী বিধেয়কৰ পটভূমিত দুয়োটা ছাত্ৰ সংগঠনে বিপৰীত স্থিতি লৈ আহিছে।
দুয়োটা ছাত্ৰ সংগঠনৰ মাজত শেহতীয়াকৈ একাধিক সংঘাতৰ ঘটনা সংঘটিত হৈছে।
