যোৰহাটৰ এজন ব্যক্তিক নাবালিকা ভতিজীক “যৌন নিৰ্য্যাতন” চলোৱাৰ অভিযোগত বুধবাৰে গ্ৰেপ্তাৰ কৰা হৈছে।
যোৰহাট আৰক্ষীয়ে গ্ৰেপ্তাৰ কৰা লোকজনৰ ওপৰত ভাৰতীয় দণ্ড বিধিৰ সংশ্লিষ্ট ধাৰা আৰু পক্স’ (Protection of Children from Sexual Offences) আইন, ২০১২ৰ অধীনত এক গোচৰ ৰুজু কৰা হৈছে।
ন বছৰীয়া ছোৱালীজনীক অভিযুক্ত বৰদেউতাকজনে দীৰ্ঘদিনধৰি “যৌন নিৰ্য্যাতন” চলোৱাৰ অভিযোগ উত্থাপিত হৈছে।
অধিবক্তা সুস্মিতা বৰঠাকুৰে যোৱা ২৬ আগষ্টত ঘটনাটো পোহৰলৈ অনাৰ পিছত যোৰহাট আৰক্ষী থানাত এজাহাৰ দাখিলৰ ব্যৱস্থা কৰিছিল।
অধিবক্তাগৰাকীৰ অভিযোগৰ পিছতে চাইল্ডলাইনে থানাত গোচৰটো ৰুজু কৰিছিল।
অধিবক্তাগৰাকীয়ে সাংবাদিক গৌতম শৰ্মাৰ সৈতে লগ হৈ ঘটনাটো সন্দৰ্ভত যোৰহাটত বুধবাৰে এক সংবাদমেল আয়োজন কৰিছিল।
“দীৰ্ঘদিনীয়া যৌন নিৰ্য্যাতন”ৰ ফলত “ট্ৰমা”ত ভোগা নাবালিকাগৰাকী যোৰহাট চিকিৎসা মহাবিদ্যালয় আৰু চিকিৎসালয়ত চিকিৎসালয়ত চিকিৎসাধীন হৈ আছিল।
চিকিৎসালয়খনত উপস্থিত থকা অধিবক্তাগৰাকীয়ে স্ত্ৰী আৰু প্ৰসূতি ৰোগ বিভাগৰ চিকিৎসকৰ পৰা ঘটনাটোৰ বিষয়ে অৱগত হয়।
ঘটনাটোৰ বিষয়ে নিশ্চিত হোৱাৰ পিছতো আৰক্ষীক নজনোৱা বাবে দুজন চিকিৎসকক গ্ৰেপ্তাৰ কৰাৰ বাবেও সাংবাদিক শৰ্মাই দাবী জনাইছে।
