প্ৰতিকূল বতৰকো নেওচি এক গাম্ভীৰ্যপূৰ্ণ অনুষ্ঠানৰ মাজেৰে আজি ষষ্ঠ শিৱসাগৰ গ্ৰন্থ উৎসৱ ২০১৯ৰ লাইখুঁটা স্থাপন কৰা হয়।
চহৰৰ বৰ্ডিং খেল পথাৰত ড০ নিৰ্মলপ্ৰভা বৰদলৈ সাহিত্য ক্ষেত্ৰত স্বেচ্ছাসেৱী অনুষ্ঠান ‘খোজ’ৰ উগ্যোগত আৰু শিৱসাগৰ জিলা প্ৰশাসনৰ সহযোগত আয়োজিত গ্ৰন্থ উৎসৱৰ লাইখুঁটা স্থাপন কৰে উজনিয়াল সত্ৰৰ সত্ৰাধিকাৰ লক্ষ্মীকান্ত মহন্ত, সাহিত্যিক খগেন্দ্ৰনাথ ভূঞাই।
অনুষ্ঠানত ড০ প্ৰকাশ কটকী, আছুৰ শিক্ষা সম্পাদক শৰৎ হাজৰিকা, জয়জ্যোতি গগৈ, প্ৰদীপ বৰগোহাঁই, ৰজনিকান্ত পাংগিং, সমীৰণ ফুকনকে প্ৰমুখ্য কৰি কেইবাজনো বিশিষ্ট ব্যক্তি উপস্থিত থাকে।
অহা ২ নবেম্বৰৰ পৰা ১২ নবেম্বৰলৈ বৰ্ডিং খেলপথাৰৰ ড০ নিৰ্মলপ্ৰভা বৰদলৈ সাহিত্য ক্ষেত্ৰত অনুষ্ঠিত হ’ব ষষ্ঠ শিৱসাগৰ গ্ৰন্থ উৎসৱ।
উক্ত গ্ৰন্থ উৎসৱ খন উদ্বোধন কৰিব ডিব্ৰুগড় বিশ্ববিদ্যালয়ৰ উপাচাৰ্য ড০ ৰঞ্জিত তামুলীয়ে।
দহ দিনিয়াকৈ অনুষ্ঠিত হ’ব লগীয়া গ্ৰন্থ মেলাত অসমৰ লগতে দেশৰ বিভিন্ন প্ৰান্তৰ আগশাৰীৰ প্ৰকাশন প্ৰতিষ্ঠানে যোগদান নিশ্চিত কৰিছে বুলি উদ্যোক্তা সকলে জানিবলৈ দিছে।
উল্লেখ্য যে, গ্ৰন্থ উৎসৱ উপলক্ষে প্ৰতিদিনেই ছাত্ৰ-ছাত্ৰীসকলৰ মাজত কুইজ, তৰ্ক, কবিতা আবৃত্তি, চিত্ৰাংকন, সাধু কোৱা, প্ৰাচীৰ পত্ৰিকা লেখন, পত্ৰ লিখা, বাটৰ নাট, সৃষ্টিশীল নৃত্য, শিশুৰ পৰম্পৰাগত সাজপাৰ, মুকলি তৰ্ক আৰু থিতাতে লিখা কবিতা আদি প্ৰতিযোগিতাৰ লগতে সাংস্কৃতিক অনুষ্ঠান অনুষ্ঠিত হ’ব।
ইফালে উদ্যোক্তাসকলে ষষ্ঠ সংখ্যক শিৱসাগৰ গ্ৰন্থ উৎসৱ সফল কৰি তুলিবলৈ পঢ়ুৱৈ তথা সকলো ৰাইজকে আহ্বান জনাইছে।
