‘বিজেপিয়ে চাৰিখন আসনৰ তিনিখন আসন দখল কৰাটো কোনো ডাঙৰ মেছেজ নহয়।‘ অসমৰ সদ্য সমাপ্ত উপ-নিৰ্বাচনত কংগ্ৰেছৰ বিপৰ্য্যয়ৰ পাছত প্ৰতিক্ৰিয়া প্ৰকাশ কৰি নৰ্থ ইষ্ট নাওৰ সাংবাদিকৰ আগত এইদৰে কয় প্ৰদেশ কংগ্ৰেছৰ সাধাৰণ সম্পাদক দুলু আহমেদে।
‘জনিয়াত বিজেপিয়ে যিধৰণে প্ৰচাৰ কৰিছে তাত তেওঁলোক সক্ষম হৈছে।‘ এইদৰে মন্তব্য কৰি আহমেদে মন্ত্ৰী হিমন্ত বিশ্ব শৰ্মা আৰু সভাপতি ৰঞ্জিত দাসে ষড়যন্ত্ৰ কৰি জনিয়াত এ আই য়ু ডি এফক জয়ী কৰালে বুলিও সদৰী কৰে।
‘মন্ত্ৰী হিমন্ত বিশ্ব শৰ্মা আৰু বিজেপিৰ সভাপতি ৰঞ্জিত দাসে জনিয়াত কংগ্ৰেছৰ ভোট বিভাজনৰ ষড়যন্ত্ৰ কৰিলে। তেওঁলোকে কেন্দ্ৰ আৰু ৰাজ্যত বিজেপি চৰকাৰ গতিকে জনিয়াবাসীয়ে তেওঁলোকক ভোট দিব বুলি চলোৱা প্ৰচাৰ ‘ভুৱা’ আছিল। মুছলমানৰ ভোটখিনি বিভাজন কৰি এআইয়ুডিএফৰ বাট মুকলি কৰি দিলে।‘ দুলু আহমেদে কয়।
তেওঁ লগতে কয় ‘জনিয়া সমষ্টিত তিনিমাহ আগলৈকে ৪২ হাজাৰ ভোটত অগ্ৰগতি লৈ লোকসভাত জয়ী হৈছিলো। কিমান বুথৰ পৰা যোৱাবাৰ আৰু এইবাৰ কিমান ভোট পালো সেইবোৰ বিশ্লেষণ কৰিব লাগিব।‘
‘কি কাৰণে তিনিমাহত মানুহৰ মনত কংগ্ৰেছৰ প্ৰতি বেয়া ভাব আহিল?’ এইদৰে প্ৰশ্ন কৰি তেওঁ কয় ‘সেইবোৰ চালি-জাৰি চাব লাগিব। ভোটাৰে গম নাপালে যে এ আই য়ু ডি এফক জিকাবৰ বাবে বিজেপিয়ে তেনে প্ৰাৰ্থী দিছিল।‘
ইপিনে, বিজেপিয়ে এই উপ নিৰ্বাচনত কেৱল সাম্প্ৰদায়িক ইছুৰে জয়ী হোৱা বুলি দাবী কৰে আহমেদে।
‘বিজেপিৰ কোনো নিৰ্বাচনী ইছু নাই, তেওঁলোকৰ কেৱল সাম্প্ৰদায়িক ইছু। তেওঁলোকে কেন্দ্ৰ-ৰাজ্যত চৰকাৰ থকা বুলি কোৱাতকৈ কি কি ভাল কাম কৰিছে সেইটো ক’ব লাগিছিল। ভোটাৰ ৰাইজক ব্লেকমেইল কৰাৰ দৰে হ’ল।‘ আহমেদে কয়।
ইপিনে, কংগ্ৰেছক শক্তিশালী কৰিবলৈ তৃণমূল পৰ্য্যায়ত কাম কৰিব লাগিব সেই বিষয়েও অৱগত কৰিলে আহমেদে।
‘তৃণমূল কৰ্মীসকল হতাশ হ’ব নালাগে। নেতাসকলেও তৃণমূল কৰ্মীয়ে ক’ত অসুবিধা পাই আছে, সেইটো লক্ষ্য ৰাখিব লাগিব। আমাৰ মাজত থকা মনোমালিন্য আঁতৰ কৰিব লাগিব। লবীকেন্দ্ৰিক হ’লে দলৰ ক্ষতি হ’ব, দলৰ ক্ষতি হ’লে তৃণমূল কৰ্মীয়ে কষ্ট পাব।‘ আহমেদে কয়।
