অসমৰ সাংস্কৃতিক ক্ষেত্ৰৰ প্ৰাণস্বৰূপ জ্যোতি চিত্ৰবনৰ পৰিৱেশ দেখি অভিভূত হ’ল বলিউডৰ যশস্বী পৰিচালক সুভাষ ঘাই। এডভাণ্টেজ আছামত অংশগ্ৰহণ কৰাৰ উদ্দেশ্যৰে গুৱাহাটীলৈ আহিছিল এই বিশিষ্ট চলচ্চিত্ৰ পৰিচালকগৰাকী।
পৰিচালক সুভাষ ঘায়ে দেওবাৰে জ্যোতি চিত্ৰবনত উপস্থিত হৈ ইয়াৰ নয়নাভিৰাম পৰিৱেশ দেখাৰ লগে লগে অভিভূত হৈ পৰে।
ইয়াৰ উপৰি ৰাজ্য চৰকাৰৰ সাংস্কৃতিক প্ৰতিষ্ঠানটোৰ ঐতিহ্যৰ বিষয়ে জ্ঞাত হৈ পৰিচালকগৰাকীয়ে আনন্দ প্ৰকাশ কৰাৰ লগতে তেওঁৰ মুখৰ পৰা স্বতঃস্ফুৰ্তভাবে ওলাই আহে ‘সত্যম, শিৱম, সুন্দৰম’।
উল্লেখ্য যে অসমৰ বিনোদন উদ্যোগত বিনিয়োগ, চলচ্চিত্ৰ পৰ্যটনৰ বিকাশ তথা চলচ্চিত্ৰৰ ক্ষেত্ৰত মানৱ সম্পদ সৃষ্টিৰ বাবে মুখ্য মন্ত্ৰী সৰ্বানন্দ সোণোৱালৰ আমন্ত্ৰণক্ৰমে অসমলৈ আহিছে সুভাষ ঘাই।
অসম যিদৰে সৌন্দৰ্যৰ দিশৰ পৰা অতুলনীয় সেইদৰে জ্যোতি চিত্ৰবনৰ মনোমোহা পৰিৱেশো অনন্য বুলি জ্যোতি চিত্ৰবনত উপস্থিত হৈয়ে পৰিচালকগৰাকীয়ে এনদৰে নিজৰ মনৰ ভাব প্ৰকাশ কৰে।
জ্যোতি চিত্ৰবনত সাংবাদিকৰ সৈতে হোৱা বাৰ্তালাপত সুভাষ ঘায়ে কয় ‘অসমত প্ৰতিভাৰ কোনো অভাৱ নাই। আমাক আৰু বহুত ড০ ভূপেন হাজৰিকাৰ দৰে মহান শিল্পীৰ প্ৰয়োজন আছে। অসমত সেই সম্ভাৱণা আছে আৰু তাৰ বাবে প্ৰয়োজন প্ৰণালীবদ্ধ শিক্ষণ-প্ৰশিক্ষণৰ’।
তদুপৰি বিশিষ্ট পৰিচালকগৰাকীয়ে জ্যোতি চিত্ৰবনৰ দৰে মহান প্ৰতিষ্ঠানটোৰ সৈতে জড়িত হৈ অসমত কাম কৰিবলৈ আগ্ৰহ প্ৰকাশ কৰে। লগতে পৱিত্ৰ মাৰ্ঘেৰিটাৰ কৰ্মদক্ষতাৰ বিষয়েও শলাগ লোৱা দেখা যায়।
উল্লেখ্য যে কালিচৰণ, কৰ্জ, হিৰ’, ৰাম লখন, সৌদাগৰ, খলনায়ক, পৰদেশ, তাল আদি বিভিন্ন হিন্দী ছবিৰ নিৰ্মাতা সুভাষ ঘাই এফ টি আইৰ প্ৰথম বৰ্ষৰ ছাত্ৰ।
স্মৰ্তব্য যে হিন্দী ছবি জগতত নতুন নতুন তাৰকা সৃষ্টি কৰাৰ বাবে বিখ্যাত সুভাষ ঘাই। কিয়নো জেকী শ্ৰফ, মহিমা চৌধুৰীকে ধৰি বহুতো অভিনেতা অভিনেত্ৰীক বলিউডত এক সূকীয়া স্থান দিবলৈ সক্ষম হৈছে এই পৰিচালকগৰাকীয়ে। জ্যোতি চিত্ৰবনৰ পৰিৱেশ দেখি অভিভূত হৈ পৰা পৰিচালকগৰাকীয়ে আগন্তুক দিনত অসমৰ পৰাও কোনো শিল্পী বা অসমৰ পটভূমিক লৈ ছবি নিৰ্মান কৰিব বুলি আশা প্ৰকাশ কৰিব পাৰি।
শতবৰ্ষ গৰকা জ্যোতি চিত্ৰবনত পৰিচালক সুভাষ ঘায়ে প্ৰতিষ্ঠানটোৰ অধ্যক্ষ পৱিত্ৰ মাৰ্ঘেৰিটা, সচিব মনীষা বৰগোহাঁই, সাংস্কৃতিক বিভাগৰ অতিৰিক্ত সচিব প্ৰীতম শইকীয়াকে ধৰি আৰ জি এফ টি আই আই আৰু জ্যোতি চিত্ৰবনৰ কৰ্মচাৰীৰ সৈতে প্ৰায় দুঘণ্টা সময় অতিবাহিত কৰাৰ লগতে সমগ্ৰ চৌহদটো পৰিদৰ্শন কৰে।
