ইউৰোপ আৰু দক্ষিণ আমেৰিকাৰ দেশবোৰক পিছ পেলাই ভাৰতৰ চুবুৰীয়া ভুটানে পৰ্য্যটনৰ বাবে বিশ্বৰ শ্ৰেষ্ঠ দেশৰ স্থান লাভ কৰিছে ল’নলি প্লেনে’ট নামৰ ট্ৰেভেল গাইড এজেন্সি এটাই চলোৱা সমীক্ষাত।
বিশ্বৰ শীৰ্ষস্থানীয় ট্ৰেভেল গাইড এজেন্সিটোৱে যোৱা সপ্তাহত ২০২০ চনত ভ্ৰমণ কৰিবলৈ আটাইতকৈ উপযুক্ত যেন লগা বিশ্বৰ শীৰ্ষ ১০খন দেশৰ তালিকা প্ৰকাশ কৰিছে।
তালিকাখনত ভুটানৰ পিছতে দ্বিতীয় আৰু তৃতীয় স্থান লাভ কৰিছে ক্ৰমে ইংলেণ্ড আৰু উত্তৰ মেচিডনিয়াই। বগা বালিৰ উপকূলৰ বাবে খ্যাত কেৰিবিয়ান দেশ আৰুবা আছে চতুৰ্থত আৰু দক্ষিণ আফ্ৰিকাৰ দেশ এছৱাটিনি (Eswatini)ই পঞ্চমত স্থান পাইছে।
মধ্য আমেৰিকাৰ দেশ কষ্টাৰিকা, উইণ্ডমিলৰ বাবে জনাজাত নেদাৰলেণ্ড, মধ্য আফ্ৰিকাৰ দেশ লাইবেৰিয়া, উত্তৰ আফ্ৰিকাৰ মৰক্কো আৰু লেটিন আমেৰিকাৰ দেশ উৰুগুৱেই তালিকাৰ ষষ্ঠৰ পৰা দশম স্থানলৈকে ক্ৰমানুসৰি স্থান লাভ কৰিছে।
বহুতো পৰ্য্যটকৰ মত লৈ প্ৰস্তুত কৰা তালিকাখনত ভুটানক এক নম্বৰত স্থান দিয়াৰ সপক্ষে যুক্তি আগ বঢ়াই খ্যাতিমান পৰ্য্যটন প্ৰতিষ্ঠানটোৱে কয়, “ইয়াৰ বহনক্ষম প্ৰয়াস অসাধৰণ। ভুটান প্ৰথমখন সম্পূৰ্ণ জৈৱিক ৰাষ্ট্ৰ হ’বলৈ গৈ আছে”।
ভুটানে বিশ্বৰ পৰ্য্যটন মানচিত্ৰত এইদৰে অভাৱনীয় প্ৰশংসা আদায় কৰাত স্বাভাৱিকতে উৎফুল্ল হৈ পৰিছে পাহাৰীয়া দেশখনৰ চৰকাৰ আৰু জনসাধাৰণ।
কুৱেনছেল অনলাইন নামৰ বাতৰি প্ৰতিষ্ঠানটোৱে ইয়াক দেশখনৰ পৰ্য্যটন নীতিৰ প্ৰভাৱ আছে বুলি মন্তব্য কৰিছে।
