মণিপুৰৰ ৰজা লেইচেম্বা ছানাজাওবাৰ প্ৰতিনিধি বুলি দাবী কৰা মণিপুৰৰ কেইজনমান নেতাই ২৯ অক্টোবৰত লণ্ডনত মণিপুৰ ষ্টেইট কাউন্সিল (Manipur State Council) নামেৰে স্বাধীন মণিপুৰ ঘোষণা কৰিছে আৰু চৰকাৰ গঠন কৰিছে।
দ্দা হিন্দু নামৰ ভাৰতৰ ৰাষ্ট্ৰীয় বাতৰি কাকতখনৰ উপৰি কিছুমান আন্তঃৰাষ্ট্ৰীয় সংবাদ মাধ্যমতো এই খবৰ গুৰুত্বসহ প্ৰকাশ হৈছে।
ভাৰতৰ পৰা পৃথক হোৱাৰ কথা ঘোষণা কৰি প্ৰতিনিধিসকলে এখন সংবাদমেল সম্বোধন কৰে। স্বাধীন মণিপুৰ চৰকাৰখনক নিৰ্বাসিত চৰকাৰ বুলি কোৱা হৈছে।
সংবাদমেলত মণিপুৰ ষ্টেইট কাউন্সিল চৰকাৰখনৰ মুখ্য মন্ত্ৰী য়েম্বেন বীৰেন আৰু বৈদেশিক পৰিক্ৰমা আৰু প্ৰতিৰক্ষা মন্ত্ৰী নাৰেংগবাম সমৰজিতে ভাগ লয়।
নেতাদ্বয়ে মণিপুৰৰ মহাৰাজাই তেওঁলোকক মণিপুৰৰ ৰাজনৈতিক সমস্যা সমাধানৰ দায়িত্ব অৰ্পণ কৰি ২০১৩ চনৰ ১৮ মাৰ্চত দিয়া এখন নথি প্ৰদৰ্শন কৰে।
ভাৰতত এই স্বাধীনতা ঘোষণা কৰিলে গ্ৰেপ্তাৰ অথবা ভাৰতৰ নিৰাপত্তা বাহিনীবোৰৰ দ্বাৰা হত্যাৰ সন্মুখীন হ’ব পাৰে বুলি ভাবিয়ে লণ্ডনত কৰা হ’ল বুলি দুয়োজনে সংবাদ মাধ্যমক জনায়। তেওঁলোকৰ মতে, নিৰ্বাসিত চৰকাৰখন লণ্ডন ভিত্তিক হ’ব।
সংবাদ মাধ্যমৰ আগত দুয়ো এইটোও নিশ্চিত কৰে যে তেওঁলোকে ভাৰত চৰকাৰৰ দ্বাৰা নিগৃহীত হোৱাৰ ভয়ত ইংলেণ্ডত ২০১৯ চনৰ ছেপ্টেম্বৰত ৰাজনৈতিক আশ্ৰয় বিচাৰিছিল।
“আমি বিশ্বাস কৰো যে মণিপুৰৰ স্বাধীন চৰকাৰখনৰ বিষয়ে আন্তঃৰাষ্ট্ৰীয় সম্প্ৰদায়ক অৱগত কৰা আৰু স্বীকৃতি বিচৰাৰ এইটোৱে উপযুক্ত সময়।” সংবাদমেলত নেতাদ্বয়ৰ বক্তব্যৰ উদ্ধৃতি দ্দা হিন্দুত।
তেওঁলোকে নিজৰ চৰকাৰখনক আইনসন্মত চৰকাৰ (de jure) বুলি দাবী কৰি ইয়াৰ স্বীকৃতি বিচাৰি ৰাষ্ট্ৰসংঘলৈ যাব বুলিও জানিবলৈ দিয়ে।
“তিনি নিযুত মণিপুৰী মানুহে মূল্যৱান স্বাধীন ৰাষ্ট্ৰবোৰৰ এখন হিচাপে স্বীকৃতি বিচাৰে। ভাৰতৰ চৰকাৰৰ সৈতে কথা পতাৰ আমাৰ প্ৰয়াস ঘৃণা আৰু শত্ৰুতাৰ সন্মুখীন হৈছিল”, মণিপুৰ ষ্টেইট কাউন্সিল চৰকাৰখনৰ মন্ত্ৰীদ্বয়ৰ মন্তব্য।
তেওঁলোকে আন্তঃৰাষ্ট্ৰীয় সংবাদ মাধ্যমবোৰৰ উপস্থিতিত সংবাদমেলত কয় যে নৰেন্দ্ৰ মোদীৰ চৰকাৰখন হিন্দুত্ববাদৰ উচ্চাত্মিকা মনোভাবৰ আৰু সৰু সৰু জাতিসত্তা আৰু সম্প্ৰদায়বোৰ নিৰ্মূলকৰণত বিশ্বাসী।
নেতাদ্বয়ৰ দাবী, ষ্টেইট অব মণিপুৰ এখন আইনসন্মত চৰকাৰ, যিখন মণিপুৰ ষ্টেইট কনষ্টিটিউশ্যন এক্ট ১৯৪৭-ৰ অধীনত গঠন কৰা হৈছে। ই ১৯৪৭ চনৰ ১৪ আগষ্টত ব্ৰিটিছৰ পৰা স্বীধানতা লাভ কৰিছিল।
তেওঁলোকে লগতে কয়, ১৯৪৬ চনৰ ২৭ ডিচেম্বৰত অৰ্ডাৰ অব কাউন্সিলৰ দ্বাৰা মণিপুৰ ৰাজ্যখন ভাৰতৰ পৰা বাহিৰত ৰখা হৈছিল আৰু ভাৰত চৰকাৰে মণিপুৰ ৰাজ্যক ১৯৪৯ আইনখন উলংঘা কৰি চামিল কৰিছিল।
নেতা দুজনে মণিপুৰত চৰকাৰী বাহিনীৰ দ্বাৰা সংঘটিত হত্যাকাণ্ডবোৰ সম্পৰ্কেও উল্লেখ কৰে।
পৃথক নাগালেণ্ডৰ দাবীত প্ৰায় অৰ্ধ শতিকাজোৰা নাগা সশস্ত্ৰ বিদ্ৰোহে সামৰণিৰ ঢাপটোত উপস্থিত হোৱাৰ সময়তে উত্তৰ-পূবৰ আন এখন ৰাজ্যই ভাৰতৰ পৰা বিচ্ছিন্নতা ঘোষণা কৰাটো তাৎপৰ্য্যপূৰ্ণ।
উত্তৰ-পূবৰ ৰাজ্যবোৰক ভাৰতৰ পৰা পৃথক আৰু মৌলিক ইতিহাসে স্বাধীনতা দাবীৰ বাবে প্ৰলোভিত কৰি আহিছে, যিটো অসমৰ শক্তিশালী সশস্ত্ৰ বিদ্ৰোহ সংযুক্ত মুক্তি বাহিনী, অসম, চমুকৈ আলফাৰো জন্মৰ এটা প্ৰধান আধাৰ।
