বাংলাদেশৰ বিৰুদ্ধে বেটিঙত ব্যৰ্থ হ’লেও অধিনায়ক হিচাপে পুনৰ সাফল্যৰ শিখৰত স্থান লাভ কৰিলে বিৰাট কোহলীয়ে। বাংলাদেশক টেষ্টত পৰাজিত কৰাৰ পাছতেই কোহলীয়ে গঢ়িলে নতুন অভিলেখ।
হোলকাৰ ষ্টেডিয়ামত সম্পূৰ্ণ তিনিদিনো তিষ্ঠিব নোৱাৰিলে বাংলাদেশী বেটছমেন। তাতেই মায়ংকৰ ৰাণৰ পাহাৰ আৰু ভাৰতীয় বলাৰ চমকৰ আগত বাংলাদেশৰ ক’ত যাও ক’ত লুকাও অৱস্থা।
ঘৰুৱা খেলপথাৰত একেৰাহে ছয়খন টেষ্টত বিজয় সাৱ্যস্ত কৰিলে ভাৰতে। লগতে ভাৰতীয় অধিনায়ক হিচাপে টেষ্টত আটাইতকৈ অধিকবাৰ ইনিংছত বিজয়ৰ অভিলেখ গঢ়িলে কোহলীয়ে।
ইয়াৰ পূৰ্বে এই তালিকাৰ শীৰ্ষত আছিল মহেন্দ্ৰ সিং ধোনী। তেওঁৰ নেতৃত্বত ভাৰতীয় দলে ঘৰুৱা খেলপথাৰত ন’বাৰকৈ ইনিংছ ব্যৱধানত টেষ্টত জয়লাভ কৰিছিল।
বিৰাট কোহলীয়ে ধোনীৰ অভিলেখ ভংগ কৰি দহবাৰকৈ ইনিংছ ব্যৱধানত বিজয়ৰ অভিলেখ গঢ়িলে।
এইক্ষেত্ৰত আঠ আৰু সাতবাৰকৈ বিভিন্ন দলক ইনিংছ ব্যৱধানত পৰাজিত কৰি ক্ৰমে তৃতীয় আৰু চতুৰ্থ স্থানত আছে মহম্মদ আজাহাৰুদ্দিন আৰু সৌৰভ গাংগুলী।
অৱশ্যে,বিশ্ব ক্ৰিকেটত এই তালিকাত কোহলীৰ স্থান সাত নম্বৰত। এইক্ষেত্ৰত সৰ্বাধিক ইনিংছ বিজয়ৰ অভিলেখৰ অধিকাৰী অধিনায়কগৰাকী হ’ল দক্ষিণ আফ্ৰিকাৰ গ্ৰেম স্মিথ। তেওঁৰ নামত আছে ২২বাৰকৈ ইনিংছ ব্যৱধানত বিজয়ৰ অভিলেখ।
বাংলাদেশৰ বিৰুদ্ধে কোহলীৰ অভিলেখৰ উপৰি আন এক অভিলেখৰ অধিকাৰী হ’ল মহম্মদ ছামী। দুৰ্দান্ত প্ৰদৰ্শনেৰে পেচাৰগৰাকীয়ে শনিবাৰে চাৰিগৰাকীকৈ বাংলাদেশী বেটছমেনক পেভলিয়নলৈ পঠিয়ায়।
ইয়াৰ বাবেই যোৱাবছৰ দ্বিতীয় ইনিংছত খেলা শ্ৰেষ্ঠ বলাৰৰ খিতাপ লাভ কৰিলে ছামীয়ে। যোৱা দুবছৰত ২০টা ইনিংছত ৫১টা উইকেট লাভ কৰিছে ছামীয়ে। এই তালিকাত ছামীৰ পাছতেই আছে অষ্ট্ৰেলিয়াৰ পেট কামিন্স।
এক ইনিংছ আৰু ১৩০ ৰাণত বাংলাদেশক হৰুৱাই দুখন টেষ্টৰ ছিৰিজটোত ভাৰত ১-০ব্যৱধানত আগবাঢ়ি থাকিল। ২৪৩ ৰাণৰ মাৰাথন ইনিংছ খেলা মায়ংক আগৰৱালে লাভ কৰে মেন অফ দ্য মেচৰ পুৰষ্কাৰ।
এতিয়া কলকাতাৰ ইডেন গাৰ্ডেনত খেলিবলগীয়া দ্বিতীয়খন টেষ্ট তথা ভাৰতত প্ৰথমখন দিবা-নৈশ টেষ্টৰ বাবে ক্ৰিকেট অনুৰাগীসকলে অত্যন্ত আগ্ৰহেৰে অপেক্ষা কৰিছে।
