‘অগপৰ স্থিতি একেবাৰেই সঠিক নহয়। বিজেপিৰ লগত অগপৰ কোনো অমিল নাই। বিজেপিৰ আচৰণৰ দৰেই অগপৰ আচৰণো একেই।’ বৃহস্পতিবাৰে মহানগৰীৰ গুৱাহাটী ক্লাৱৰ পৰা চানমাৰিলৈকে জাতীয়তাবাদী যুৱ ছাত্ৰ পৰিষদে বাহিৰ কৰা এক প্ৰতিবাদী সমদলত অংশগ্ৰহণ কৰি অগপক এইদৰে সমালোচনা কৰে সংগঠনটোৰ সাধাৰণ সম্পাদক পলাশ চাংমাইয়ে।
‘অগপৰ আচৰণ একেবাৰেই ঠিক নহয়।’ এইদৰে মন্তব্য কৰি চাংমাইয়ে লগতে কয় ‘অগপই আঞ্চলিকতাবাদী চৰিত্ৰ ইতিমধ্যে হেৰুৱাই পেলাইছে।’
ইপিনে, কেন্দ্ৰীয় চৰকাৰে উত্তৰ-পূবৰ ওপৰত জোৰ জৱৰদস্তি জাপি দিয়া কেব কেতিয়াও মানি লোৱা নহ’ব বুলি মন্তব্য কৰি গৃহ মন্ত্ৰীৰে সৈতে কেব সম্পৰ্কত হোৱা আলোচনাক এখন নাটক আখ্যা দিয়ে চাংমাইয়ে।
‘গৃহ মন্ত্ৰী অমিত শ্বাহে আমাক আলোচনালৈ মতাৰ ৬-৭ ঘন্টাৰ পাছতে কেন্দ্ৰীয় চৰকাৰে কেবত অনুমোদন জনাইছিল। অৰ্থ্যাৎ কেব গৃহীত কৰাৰ পৰিকল্পনা কেন্দ্ৰীয় চৰকাৰৰ পূৰ্বৰ পৰাই আছিল। কেবল আলোচনাৰ নামত এক নাটক কৰাৰ বাবে তেওঁলোকক ধিক্কাৰ দিছো।’ চাংমাইয়ে এইদৰে কয়।
তেওঁ লগতে কয় ‘জন মানসত আৰু তললৈ নামিবলগীয়া নহয় তাৰ বাবে এখন নাটক ৰচনা কৰিবলৈ তেওঁলোকে এইদৰে আমাক আলোচনালৈ মাতিলে।’
‘চৰকাৰে এই কথা ভবাটো ভুল যে তেওঁলোকক স্থায়ীভাৱে শাসন চলোৱাৰ দায়িত্ব দিছে।’ এইদৰে কেন্দ্ৰীয়-ৰাজ্য চৰকাৰক সোঁৱৰাই দি চাংমাইয়ে কয় ‘পাঁচ বছৰৰ বাবেহে শাসন চলাবলৈ দিয়ে। চৰকাৰে জনসাধাৰণৰ কথা নুশুনাকৈ স্বেচ্ছাস্বাৰীভাৱে কাম কৰিলে চৰকাৰক স্বাভাৱিকতে মানুহে দলিয়াই পেলাব।’
তাৎপয্যপূৰ্ণভাৱে কেবৰ বিৰুদ্ধে উচ্চতম ন্যায়ালয়লৈয়ো যাব বুলি ঘোষণা কৰি চাংমাইয়ে কয় ‘ঐক্যবদ্ধ আন্দোলনৰ প্ৰয়োজন আছে। আটাইবোৰ সংগঠন কেবৰ বিৰুদ্ধে একেলগে ওলাই আহিব লাগে আৰু চৰকাৰৰ হঠকাৰী সিদ্ধান্ত মষিমূৰ কৰিব লাগে।’
