নাগৰিকত্ব আইন, ১৯৫৫ত কেন্দ্ৰই আনিব খোজা সংশোধনসমূহ।
বিধেয়কখনৰ নাম: নাগৰিকত্ব (সংশোধন) বিধেয়ক, ২০১৯
THE CITIZENSHIP (AMENDMENT) BILL, 2019
ভাৰত গণৰাজ্যৰ সত্তৰসংখ্যক বৰ্ষত তলত দিয়া ধৰণেৰে ইয়াক সংসদৰ দ্বাৰা গৃহীত কৰা হওক–
১. (১) এই আইনক নাগৰিকত্ব (সংশোধন) আইন, ২০১৯ বুলিব পৰা যায়।
(২) কেন্দ্ৰীয় চৰকাৰে গেজেট জাননীযোগে নিৰ্দিষ্ট কৰিব পৰা তাৰিখৰ পৰা ই বলবৎ হ’ব।
২. নাগৰিকত্ব আইন, ১৯৫৫ (ইয়াৰ পিছৰ পৰা মূল আইনখন বুলি বুজোৱা হ’ব)ৰ ২নং ধাৰাৰ, (১) উপধাৰাৰ, (বি) দফাত তলৰ চৰ্তখিনি অন্তৰ্ভুক্ত কৰিব খোজা হৈছে, যথা:–
“এই চৰ্তত যে ২০১৪ চনৰ ডিচেম্বৰৰ ৩১ তাৰিখ বা তাৰ আগতে আফগানিস্তান, বাংলাদেশ বা পাকিস্তানৰ পৰা ভাৰতত প্ৰৱেশ কৰা হিন্দু, শিখ, বৌদ্ধ, জৈন, পাৰ্চি বা খ্ৰীষ্টান সম্প্ৰদায়ৰ অন্তৰ্ভুক্ত যিকোনো ব্যক্তি আৰু যাক কেন্দ্ৰীয় চৰকাৰে পাছপ’ৰ্ট (ভাৰতত প্ৰৱেশ) আইন, ১৯২০-অৰ ৩ ধাৰাৰ (২) উপধাৰাৰ (চি) দফাৰ দ্বাৰা বা ইয়াৰ অধীনত বা বিদেশী আইন, ১৯৪৬ বা তাৰ অধীন যিকোনো বিধি বা নিৰ্দেশ প্ৰয়োগৰ পৰা ৰেহাই দি আহিছে, তেওঁক এই আইনৰ উদ্দেশ্যসাপেক্ষে অবৈধ প্ৰব্ৰজনকাৰী বুলি গণ্য কৰিব নালাগে।”
৩. মূল আইনৰ ৬এ ধাৰাৰ পিছত তলৰ ধাৰাটো অন্তৰ্ভুক্ত কৰিব লাগে, যথা:—
‘৬বি. (১) কেন্দ্ৰীয় চৰকাৰ বা ই নিৰ্দিষ্ট কৰা এক কৰ্তৃপক্ষই, যথাবিহিত চৰ্তাৱলী, প্ৰতিবন্ধকতা আৰু প্ৰণালীৰে, এইক্ষেত্ৰত দাখিল কৰা আৱেদন এখন সন্দৰ্ভত ধাৰা ২ৰ উপধাৰা (১)ৰ দফা (বি)ৰ অধীনত থকা ব্যৱস্থাসাপেক্ষে এগৰাকী ব্যক্তিক এক পঞ্জীয়ন প্ৰমাণপত্ৰ বা দেশীকৰণৰ প্ৰমাণপত্ৰ প্ৰদান কৰিব পাৰে।
(২) ধাৰা ৫ত নিৰ্দিষ্ট কৰা চৰ্তাৱলী বা তৃতীয় সূচীৰ ব্যৱস্থাৱলীৰ অধীন দেশীকৰণৰ যোগ্যতাসমূহৰ পূৰ্তি সাপেক্ষে, উপধাৰা (১)ৰ অধীনত পঞ্জীয়নৰ প্ৰমাণপত্ৰ বা দেশীকৰণৰ প্ৰমাণপত্ৰ পোৱা এগৰাকী ব্যক্তিক তেওঁ ভাৰতত প্ৰৱেশ কৰা দিনৰ পৰা ধৰি ভাৰতৰ এগৰাকী নাগৰিক বুলি গণ্য কৰিব লাগে।
(৩) নাগৰিকত্ব (সংশোধন) আইন, ২০১৯ বলবৎকৰণ হোৱা তাৰিখ আৰু তাৰিখৰপৰা, এগৰাকী ব্যক্তিৰ বিৰুদ্ধে অবৈধ প্ৰব্ৰজন বা নাগৰিকত্ব সন্দৰ্ভত এই ধাৰাৰ অধীনত পৰি থকা যিকোনো কাৰ্য্যব্যৱস্থা তেওঁক নাগৰিকত্ব প্ৰদানৰ জৰিয়তে সীমিতকৰণ হ’ব লাগে:
এই চৰ্তত যে তেওঁৰ বিৰুদ্ধে পৰি থকা কাৰ্য্যব্যৱস্থাৰ ভিত্তিত এনে ব্যক্তি এই ধাৰাৰ অধীনত নাগৰিকত্বৰ আৱেদন কৰাৰ বাবে অযোগ্য হ’ব নালাগে আৰু কেন্দ্ৰীয় চৰকাৰ বা ই এইক্ষেত্ৰত নিৰ্দিষ্ট কৰা কৰ্তৃপক্ষই তেওঁৰ আৱেদন সেই ভিত্তিত নাকচ কৰিব নালাগে যদি অন্য ধৰণে তেওঁ এই ধাৰাৰ অধীনত নাগৰিকত্ব প্ৰদানৰ বাবে যোগ্য:
আৰু এই চৰ্তত যে এই ধাৰাৰ অধীনত নাগৰিকত্বৰ বাবে আৱেদন কৰা ব্যক্তিগৰাকী, তেওঁৰ আৱেদনপ্ৰাপ্তিৰ তাৰিখত তেওঁক দিয়া তেওঁৰ অধিকাৰসমূহ আৰু সুবিধাসমূহৰ পৰা, এনে আৱেদন দাখিল কৰাৰ ভিত্তিত বঞ্চিত হ’ব নালাগে।
(৪) এই ধাৰাৰ একোৱে সংবিধানৰ ষষ্ঠ অনুসূচীত অন্তৰ্ভুক্ত হোৱা ধৰণেৰে অসম, মেঘালয়, মিজোৰাম বা ত্ৰিপুৰাৰ জনজাতীয় এলেকা আৰু দি বেংগল ইষ্টাৰ্ন ফ্ৰণ্টিয়াৰ ৰেগুলেচন, ১৮৭৩ৰ অধীনত জাননীকৃত “দি ইনাৰ লাইন”ৰ অধীনত সামৰি লোৱা এলেকাত প্ৰযোজ্য নহ’ব।’
৪. মূল আইনৰ ৭দি ধাৰাত,—
(i) দফা (দি)ৰ পিছত তলৰ দফাটো অন্তৰ্ভুক্ত কৰিব লাগে, যথা:—
“(দি এ) অ’ভাৰচীজ (বিদেশী) চিটিজেন অৱ ইণ্ডিয়া কাৰ্ডধাৰীয়ে এই আইনৰ যিকোনো ব্যৱস্থাৱলী বা বিভাগীয় গেজেটত প্ৰকাশিত জাননীত কেন্দ্ৰীয় চৰকাৰৰ দ্বাৰা নিৰ্দিষ্ট কৰিব পৰা বলবৎ হৈ থকা অৱস্থাৰ যিকোনো আইনৰ ব্যৱস্থাৱলী উলংঘা কৰিছে; বা”।
(ii) দফা (এফ)ৰ পিছত তলৰ চৰ্ত অন্তৰ্ভুক্ত কৰিব লাগে, যথা:—
“এই চৰ্তত যে অ’ভাৰচীজ (বিদেশী) চিটিজেন অৱ ইণ্ডিয়া কাৰ্ডধাৰীক শুনানিৰ এক যুক্তিসংগত সুযোগ-অন্যথা এই ধাৰাৰ অধীনত কোনো নিৰ্দেশ পাৰিত কৰিব নালাগে।”
৫. মূল আইনৰ ধাৰা ১৮, উপধাৰা (২), দফা (ইই)ত তলৰ দফাটো অন্তৰ্ভুক্ত কৰিব লাগে, যথা:—
“(ই ই আই) ধাৰা ৬বিৰ উপধাৰা (১)ৰ অধীনত পঞ্জীয়নৰ প্ৰমাণপত্ৰ বা দেশীকৰণৰ প্ৰমাণপত্ৰ প্ৰদানৰ চৰ্তাৱলী, প্ৰতিবন্ধকতা আৰু প্ৰণালীসমূহ;”
৬. মূল আইনৰ তৃতীয় সূচী, দফা (দি)ত তলৰ চৰ্ত অন্তৰ্ভুক্ত কৰিব লাগে, যথা:—
‘এই চৰ্তত যে আফগানিস্তান, বাংলাদেশ বা পাকিস্তানৰ হিন্দু, শিখ, বৌদ্ধ, জৈন, পাৰ্চি বা খ্ৰীষ্টান সম্প্ৰদায়ৰ অন্তৰ্ভুক্ত ব্যক্তিৰ বাবে, বসবাস বা ভাৰতৰ চৰকাৰৰ সেৱাৰ মুঠ সময় এই দফাৰ অধীনত প্ৰয়োজন হোৱা অনুসৰি “ন্যূনতম এঘাৰ বছৰ”ৰ ঠাইত “ন্যূনতম পাঁচ বছৰ”ৰূপে পঠিত হ’ব লাগে।”‘।
—সমাপ্ত—
এইখিনি সংশোধনৰ প্ৰস্তাৱসমূহ। বিধেয়কখনত থকা প্ৰস্তাৱনা, ইয়াৰ ঘোষিত উদ্দেশ্য আদি সম্পূৰ্ণকৈ পঢ়িবলৈ তলত ইংৰাজী ৰূপটো দিয়া হৈছে।
অনুবাদত বিভ্ৰান্তি বা ব্যাখ্যাৰ ক্ষেত্ৰত ইংৰাজী ৰূপটোৱেই অগ্ৰাধিকাৰ পাব।
[pdf-embedder url=”https://assam.nenow.in/wp-content/uploads/2019/12/370_2019_LS_Eng.pdf” title=”Citizenship (Amendment) Bill, 2019″]
