চিৰাং জিলাৰ আই নৈৰ দাঁতিত প্ৰকৃতিৰ মনোমোহা তথা নৈসৰ্গিক দৃষ্টিনন্দন পৰিৱেশৰ মাজেৰে আজিৰ পৰা আৰম্ভ হ’ব চতুৰ্থ সংখ্যক দৈজিং উৎসৱ।
৭ জানুৱাৰি অৰ্থাৎ ১২ দিন ধৰি চলিবলগীয়া এই উৎসৱত প্ৰত্যেক বছৰৰ দৰে এইবেলিও বিভিন্ন পৰম্পৰাগত খাদ্য, সংস্কৃতি আৰু ৰোমাঞ্চকৰ পৰম্পৰাগত খেল-ধেমালিৰ আয়োজন কৰা হৈছে।
উৎসৱৰ প্ৰথম দিনটোত বলিউদৰ জনপ্ৰিয় সংগীত পৰিচালক তথা কণ্ঠশিল্পী বিশাল-শেখৰৰ যুটী, জনিতা গান্ধীৰ লগতে সুগন্ধা মিশ্ৰাৰ সাংস্কৃতিক অনুষ্ঠানে দৰ্শকক আকৰ্ষণ কৰিব।
অহা ৪ জানুৱাৰিৰ সন্ধিয়া আন দুগৰাকী বলিউদৰ জনপ্ৰিয় কণ্ঠশিল্পী ক্ৰমে নীতি মোহন আৰু মিকা সিঙে সংগীতানুষ্ঠান পৰিৱেশন কৰিব।
উত্তৰ-পূবৰ সৰ্বৃবৃহৎ উৎসৱত পৰিণত হোৱা দৈজিং উৎসৱত অংশ লোৱাৰ বাবে ‘বুক মাই শ্ব’ৰ জৰিয়তে টিকট সংগ্ৰহ কৰিব পাৰিব বুলিও জানিব পৰা গৈছে।
বি টি চিৰ পৰ্যটন ক্ষেত্ৰখনক এক অন্য মাত্ৰা প্ৰদানৰ উদ্দেশ্যে ২০১৬-১৭ত প্ৰথমবাৰৰ বাবে ‘আই নদী শীতকালীন উৎসৱ’ হিচাপে আয়োজন কৰিছিল। পাছত ২০১৭-১৮ ইয়াৰ নাম সলনি কৰি ‘দৈজিং’ কৰা হয়।
উল্লেখযোগ্য যে অসম চৰকাৰৰ পৰ্যটন বিভাগৰ উদ্যোগত আৰু বি টি এ ডিৰ পৰ্যটন বিভাগৰ সহযোগত আয়োজন কৰা এই উৎসৱে স্থানীয় লোকসকলৰ জীৱন-জীৱিকাত যোগাত্মক প্ৰভাৱ পেলোৱা পৰিলক্ষিত হয়।
