নাগৰিকত্ব (সংশোধন) আইন ২০১৯ৰ বিধি সন্দৰ্ভত কেন্দ্ৰক অসম চৰকাৰে পৰামৰ্শ দাখিল কৰিছে, প্ৰতিবাদৰ মাজতে নতুন বছৰৰ প্ৰথম দিনা মুখ্য মন্ত্ৰী সৰ্বানন্দ সোণোৱালৰ ঘোষণা।
গুৱাহাটীস্থিত সাংবাদিকসকলৰ সৈতে হোৱা এক কথা-বাৰ্তাত সোণোৱালে এই আশ্বাস দি পুনৰ দোহাৰে যে কা-ক লৈ অসমবাসী শংকিত হোৱাৰ কাৰণ নাই।
ভাৰতীয় সংসদে পাছ কৰা আইনখনত ৰাষ্ট্ৰপতিয়ে অনুমোদন জনাইছে যদিও এতিয়াও ইয়াৰ বিধিসমূহ নিৰ্ধাৰণ কৰা হোৱা নাই।
“কা-ক লৈ শংকিত হোৱাৰ কাৰণ নাই। কা এক ৰাষ্ট্ৰীয় আইন। আমি অসমৰ খিলঞ্জীয়া ৰাইজৰ সুৰক্ষাৰ বাবে প্ৰতিশ্ৰুতিবদ্ধ,” সোণোৱালে কয়।
কেন্দ্ৰক কা-ৰ বিধি সন্দৰ্ভত ৰাজ্য চৰকাৰে কি কি পৰামৰ্শ প্ৰদান কৰিছে সেয়া এতিয়াও জানিব পৰা হোৱা নাই।
অসমৰ খিলঞ্জীয়াৰ স্বাৰ্থ সুৰক্ষাৰ বাবে তেওঁৰ চৰকাৰেহে “নিৰৱচ্ছিন্নভাৱে কাম কৰি আহিছে” বুলি দাবী কৰি সোণোৱালে সাংবিধানিক ৰক্ষাকৱচৰ প্ৰসংগ উল্লেখ কৰে।
“অসমৰ আগৰ কোনো চৰকাৰেই খিলঞ্জীয়াক সাংবিধানিক ৰক্ষাকৱচ প্ৰদানৰ বিষয়টো গ্ৰহণ কৰা নাই,” সোণোৱালে কয়।
“অসম চুক্তিৰ ৬নং দফা ৰূপায়ণক লৈ আমাৰ চৰকাৰে ইতিমধ্যে এক সমিতি গঠন কৰিছে। আমি তেওঁলোকৰ প্ৰতিবেদনৰ অপেক্ষাত আছো।”
নিজকে “ভূমিপুত্ৰ” বুলি দাবী কৰি সোণোৱালে কয় যে আইনখনক লৈ কংগ্ৰেছ আৰু বাওঁপন্থী দলসমূহে গুজৱ বিয়পাইছে।
“কা-ক লৈ থলুৱা লোকক শংকিত কৰিবলৈ গুজৱ আৰু অনুপ্ৰৱেশকাৰীৰ কিছু ভুৱা সংখ্যাৰ প্ৰচাৰ চলাই থকা হৈছে,” তেওঁ কয়।
পূৰ্বৰ আঞ্চলিক ৰাজনীতি এৰি বিজেপিত যোগ দিয়া সন্দৰ্ভত তেওঁক কৰি অহা সমালোচনাৰ প্ৰত্যুত্তৰত সোণোৱালে কয় যে এতিয়াও তেওঁৰ “আঞ্চলিক আৱেগ” আছে।
“মই মোৰ আঞ্চলিক আৱেগক বলি নিদিওঁ। যদিও শেহতীয়াকৈ একাংশ মানুহে আমাক বিশ্বাসঘাতকৰূপে অংকিত কৰিছে,” তেওঁ কয়।
