গুৱাহাটী মহানগৰৰ বিভিন্ন অঞ্চলত থকা ভাড়াঘৰবোৰ সম্পৰ্কে আৰু ইয়াত থকা ভাড়াতীয়া সম্পৰ্কে অচিৰেই জৰীপ চলাব মহানগৰ আৰক্ষীয়ে।
৭ ডিচেম্বৰত জিলা পুথিভঁৰালত নগৰ কমিটীসমূহৰ সৈতে এটা মত বিনিময় অনুষ্ঠান কৰাৰ পিছত সাংবাদিকৰ আগত আৰক্ষী সঞ্চালক প্ৰধান ভাস্কৰজ্যোতি মহন্তই এই কথা প্ৰকাশ কৰে।
জৰীপৰ বাবে নিৰ্ধাৰিত প্ৰপত্ৰ থাকিব আৰু জৰীপৰ বাবে সকলোকে একেলগে নাসামৰি প্ৰথমে নিৰ্বাচিত কেইখনমান থানাক বাছি লোৱা হ’ব।
ঘাইকৈ কেতিয়াৰ পৰা ভাড়াতীয়াজন আছে, কি কাম কৰে, কোন ঠাইৰ মূল বাসিন্দা আদিয়েই হ’ব সংগ্ৰহ কৰিব লগীয়া প্ৰধান তথ্য, সঞ্চালক প্ৰধানজনে কয়।
আনহাতে জনসাধাৰণলৈ যাতে ভুল বাৰ্তা নাযায় তাৰ বাবে জৰীপৰ সময়ত অঞ্চলটোৰ স্থানীয় লোকক লগত লোৱা হ’ব বুলিও তেওঁ জানিবলৈ দিয়ে।
মত বিনিময় অনুষ্ঠানটোত সঞ্চালক প্ৰধানৰ উপৰি গুৱাহাটী মহানগৰ আৰক্ষী আয়ুক্ত মুন্না প্ৰসান গুপ্তা, গাওঁৰক্ষী বাহিনীৰ দায়িত্বত থকা শীৰ্ষ আৰক্ষী বিষয়া দিগন্ত বৰাও উপস্থিত আছিল।
উল্লেখ কৰিব পাৰি যে মহানগৰ আৰক্ষীয়ে মহানগৰত ঘৰ ভাড়ালৈ দিয়া বাসিন্দাসকলক তেওঁলোকৰ চৌহদত ভাড়াতীয়া হিচাপে থকা লোকৰ সবিশেষ দিয়াটো এটা নিয়ম হিচাপে নিৰ্ধাৰণ কৰি পূৰ্বেও ইয়াৰ বাবে নিৰ্দেশ জাৰি কৰিছিল।
নিয়মমতে, এজন ভাড়াতীয়াই ঘৰ ভাড়াত লোৱাৰ লগে লগে মালিকে নিৰ্ধাৰিত প্ৰপত্ৰ পূৰ কৰিবলৈ দিব লাগে আৰু তাৰ এটা প্ৰতিলিপি ভাড়াতীয়াৰ ফটো সহ সংশ্লিষ্ট থানাত জমা দিব লাগে।
