দেশজুৰি নাগৰিকত্ব (সংশোধন) আইন বলৱৎ হোৱাৰ পিছত ৰাজ্যজুৰি হোৱা আন্দোলন প্ৰশমিত কৰাৰ স্বাৰ্থত কেন্দ্ৰীয় গৃহ মন্ত্ৰী অমিত শ্বাহে অসম চুক্তিৰ ৬ নং দফা ৰূপায়ণ সমিতিৰ সৈতে ততাতৈয়াকৈ যি বৈঠক আহ্বান কৰিছে তাত উপস্থিত নাথাকে ক্ষুব্ধ সদৌ অসম ছাত্ৰ সন্থা।
ৰাজ্যৰ খিলঞ্জীয়া সাংবিধানিক ৰক্ষা কৱচৰ সৈতে ‘কা’ৰ দৰ-দাম কৰাটো কোনো কাৰণতে মানি লোৱা ন’হব। এই কথা স্পষ্ট কৰি দিছে সদৌ অসম ছাত্ৰ সন্থাই।
উল্লেখযোগ্য যে কেন্দ্ৰীয় চৰকাৰে গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাক অধ্যক্ষ হিচাপে লৈ এখন উচ্চস্তৰীয় সমিতি গঠন কৰি দিছে।
এই সমিতিত আছুৰ উপদেষ্টা সমুজ্জ্বল কুমাৰ ভট্টাচাৰ্য, সভাপতি দীপাংকৰ কুমাৰ নাথ আৰু সাধাৰণ সম্পাদক লুৰিণজ্যোতি গগৈ সদস্য হিচাপে আছে।
সমিতিখনে ৰাজ্যত কেইবাখনো বৈঠক অনুষ্ঠিত কৰাৰ লগতে বিভিন্ন দল-সংগঠনৰ মতামত গ্ৰহণ কৰি প্ৰস্তুত কৰা প্ৰতিবাদেন চৰকাৰক দাখিল কৰিব। আৰু চৰকাৰে সেই প্ৰতিবেদনৰ ওপৰত ভিত্তি কৰিয়েই অসম চুক্তিৰ ৬ নং দফা কাৰ্যকৰী কৰাৰ ব্যৱস্থা কৰিব।
অতদিনে এই ক্ষেত্ৰত গুৰুত্ব প্ৰদান নকৰা চৰকাৰে ১০ জানুৱাৰিত ‘কা’ বলৱৎ কৰাৰ পিছতে আজি তাৎক্ষণিকভাৱে গৃহ মন্ত্ৰী অমিত শ্বাহে ৬ নং দফা ৰূপায়ণ সমিতিৰ সৈতে জৰুৰী বৈঠক আহ্বান কৰিছে।
কিন্তু সমগ্ৰ অসমে ‘কা’ নামানো বুলি প্ৰতিবাদ কৰাৰ পিছতে সেই গণতান্ত্ৰিক প্ৰতিবাদক নেওচি জোৰকৈ ‘কা’ বলৱৎ কৰাৰ বাবে এই বৈঠকত অংশ গ্ৰহণ কৰাৰ বাবে আছুৱে অস্বীকাৰ কৰিছে।
সমুজ্জ্বল ভট্টাচাৰ্যই কয় কেন্দ্ৰীয় চৰকাৰে অসমৰ ৰাইজৰ আৱেগ-অনুভূতিক গুৰুত্ব নিদি ‘কা’ গৃহীত কৰাই নহয় বাস্তৱত কাৰ্যকৰীও কৰিলে। সেয়েহে আমি কাইলৈ অনুষ্ঠিত হ’ব লগীয়া বৈঠকত উপস্থিত থকাৰ প্ৰয়োজন অনুভৱ কৰা নাই।
