এতিয়াৰে পৰা ছচিয়েল মিডিয়া ব্যৱহাৰ কৰাটো সহজ নহ’ব। যিহেতু ছ’চিয়েল মিডিয়াক নিয়ন্ত্ৰণ কৰিবলৈ আহি আছে নতুন নিয়ম, কেন্দ্ৰীয় চৰকাৰে আৰম্ভ কৰিছে এই নতুন নিয়ম বনোৱাৰ প্ৰক্ৰিয়া।
কেন্দ্ৰীয় চৰকাৰে দেশৰ ছচিয়েল মিডিয়া ফেচুবক, ৱাটচআপ, টুইটাৰ, ইনষ্টাগ্ৰাম আৰু টিকটক আদি একাউণ্ট খোলাৰ ক্ষেত্ৰত কিছু নতুন তথা কঠোৰ নিয়ম অনাৰ প্ৰক্ৰিয়া আৰম্ভ কৰিছে।
এতিয়াৰে পৰা ID verificationৰ অবিহনে কোনো লোকেই ছচিয়েল মিডিয়া ব্যৱহাৰ কৰিব নোৱাৰিব। এই সন্দৰ্ভত নিয়ম বনুৱাৰ বাবে ক্ষিপ্ৰতাৰে আগবাঢ়িছে চৰকাৰ।
আই টি মন্ত্ৰ্যালয় (IT Ministry)ৰ সূত্ৰই জনোৱা অনুসৰি ছচিয়েল মিডিয়াত ভুৱা নিউজ, অপপ্ৰচাৰ, মহিলাৰ ওপৰত অশ্লীল মন্তব্য প্ৰদান কৰা আদি ঘটনা বাঢ়ি গৈছে। আৰু এইবোৰ ছচিয়েল মিডিয়াত ভুৱা একাউণ্ট খুলি একাংশ দুষ্কৃতিকাৰীয়ে কৰি আহিছে।
আৰু ইয়াক ৰোধ কৰিবৰ বাবেই কঠোৰ আইন তৈয়াৰ কৰাৰ চিন্তা কৰিছে চৰকাৰে। লগতে নতুন আইনৰ খচৰা ইতিমধ্যে প্ৰস্তুত হৈছে আৰু ইয়াক অতি শীঘ্ৰেই কেবিনেটৰ সন্মতিৰ পিছত সংসদত উত্থাপন কৰিব বুলি জানিব পৰা গৈছে।
ছচিয়েল মিডিয়াৰ নতুন আইনৰ খচৰা প্ৰস্তুত কৰা এজন বিষয়াই জনোৱা অনুসৰি ছচিয়েল মিডিয়াত যিকোনো একাউণ্ট খোলাৰ আগত ব্যৱহাৰকাৰীজনে নিজৰ সম্পূৰ্ণ তথ্য দিব লাগিব। তাৰোপৰি ইণ্টাৰনেট কোম্পানিসমূহকো ছচিয়েল মিডিয়া ব্যৱহাৰকাৰীৰ অৱস্থান (location) সত্যাপন কৰিবলৈও নিৰ্দেশ দিয়া হৈছে বুলি জানিব পৰা গৈছে।
