নগাঁও জিলাৰ চামগুৰি আৰক্ষী থানাৰ অন্তৰ্গত গেন্ধালিত আৰক্ষীয়ে অভিযান চলাই দেওবাৰে চাৰিজন দুৰ্ধৰ্ষ গৰু চোৰক কৰায়ত্ত কৰিবলৈ সক্ষম হয়।
জানিব পৰা মতে কালি পুৱা প্ৰায় ৬মান বজাত চামগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া জীৱন বি মাৰাকৰ নেতৃত্বত আৰক্ষীৰ এটা দলে গোপন সূত্ৰৰ পম খেদি চামগুৰিৰ গেন্ধালিত এজনী গাই গৰুসহ চাৰিজন গৰু চোৰক আটক কৰে।
আটকাধীন গৰু চোৰ কেইজনক খাটোৱাল আৰক্ষী থানাৰ অন্তৰ্গত চপতকাৰাৰ গুলজাৰ হুছেইন (১৭), বাজিয়াগাঁও ভগামুৰৰ মদমদ উল্লাহ (১৮), চামগুৰি পাঁচ আলিৰ নুৰ ইছলাম (২০) আৰু শোণিতপুৰ জিলাৰ জমিৰ উদ্দিন বুলি চিনাক্ত কৰা হৈছে।
তেওঁলোকক বৰ্তমান চামগুৰি আৰক্ষী থানাত জেৰা চলাই থকা হৈছে। আনহাতে শনিবাৰে নিশা চামগুৰি বাজিয়াগাঁৱত নগাঁও জিলাৰ উপ আৰক্ষী অধীক্ষক জুন দাসৰ নেতৃত্বত আৰু চামগুৰি আৰক্ষীয়ে এটা বিদেশী পইন্ট টু টু পিষ্টলসহ গুলজাৰ হুছেইন (২৫) নামৰ এজন দুৰ্ধৰ্ষ ডকাইত আটক কৰিছিল।
