নৰেন্দ্ৰ মোদী নেতৃত্বাধীন বিজেপিয়ে শাসনভাৰ দখল কৰাৰ পিছৰে পৰা দেশত অভাৱনীয় হাৰত বৃদ্ধি পাবলৈ ধৰিছে নিবনুৱাৰ সংখ্যা।
শেহতীয়া এক তথ্য মতে দেশত যোৱা বৰ্ষৰ ছেপ্তেম্বৰ মাহৰ পৰা ডিচেম্বৰ মাহৰ ভিতৰত নিবনুৱাৰ হাৰ ৭.৫ শতাংশলৈ বৃদ্ধি পাইছে।
তথ্যটোত প্ৰকাশ পোৱা মতে উক্ত সময়ছোৱাৰ ভিতৰত উচ্চ শিক্ষিত নিবনুৱাৰ হাৰ বৃদ্ধি পাই হৈছে ৬০ শতাংশ।
এই উদ্বেগজনক জৰীপ প্ৰকাশ কৰিছে মুম্বাইস্থিত চেণ্টাৰ ফৰ মনিটৰিং ইণ্ডিয়ান ইক’নমি (CMIE) নামৰ এটা সংস্থাই।
সংস্থাটোৰ জৰীপত কোৱা হৈছে, ‘২০১৭ৰ মে-আগষ্টৰ পৰা ধাৰাবাহিকভাৱে সপ্তমবাৰৰ বাবে নিবনুৱাৰ হাৰ বৃদ্ধি পাইছে। ২০১৭ৰ মে-আগষ্টত নিবনুৱাৰ হাৰ আছিল ৩.৮ শতাংশ’।
ইফালে CMIEৰ তথ্য অনুসৰি, গাঁৱৰ তুলনাত চহৰত নিবনুৱাৰ হাৰ সৰ্বাধিক। এই সময়ছোৱাত চহৰাঞ্চলত নিৱনুৱাৰ হাৰ বৃদ্ধি পাই হৈছেগৈ ৯ শতাংশ আৰু গ্ৰাম্যাঞ্চলত নিবনুৱাৰ হাৰ হৈছে ৬.৮ শতাংশ।
তথ্যটোৰ মতে, ‘২০ৰ পৰা ২৪ বছৰীয়া যুৱপ্ৰজন্মৰ মাজত নিবনুৱাৰ হাৰ হৈছে ৩৭ শতাংশ। ইয়াৰ ভিতৰত ৬০ শংতাংশই হৈছে স্নাতক ডিগ্ৰীধাৰী নিবনুৱা। আচলতে স্নাতক ডিগ্ৰীধাৰী নিবনুৱাৰ হাৰ ২০১৯ বৰ্ষত ৬৩.৪ শতাংশ বৃদ্ধি পাইছে।
উল্লেখ্য যে CMIEৰ মতে যোৱা বছৰৰ আগষ্ট মাহত নিবনুৱাৰ হাৰ আছিল ৮.৪ শতাংশ, যিটো বিগত তিনিবছৰৰ সৰ্বাধিক হাৰ।
