কেন্দ্ৰীয় চৰকাৰৰ সৈতে এন ডি এফ বিয়ে কৰা যুদ্ধ বিৰতিৰ চুক্তিৰ প্ৰতি আস্থা প্ৰদৰ্শন কৰি অৱশেষত মূল সুঁতিলৈ ঘূৰি আহিছে সংগঠনটোৰ দুগৰাকী দুৰ্ধৰ্ষ নেতা ক্ৰমে জি বিদাই আৰু বাথা।
শান্তি আলোচনাত যোগ দিয়াৰ বাবেই বুধবাৰে কোকৰাঝাৰ জিলাৰ গোসাইগাঁৱৰ ৰঙাপাৰাত একত্ৰিত হয় সংগঠনৰ উপাধ্যক্ষ তথা সেনাপ্ৰধানৰ দায়িত্বত থকা জি বিদাই, জ্যেষ্ঠ কমাণ্ডাৰ বাথাসহ এন ডি এফ বিৰ ছয় শতাধিক কেডাৰ।
দীৰ্ঘদিনীয়া সশস্ত্ৰ সংগ্ৰাম এৰি মূল সুঁতিলৈ অহা সদস্য সকলক আদৰণি জনাই সংগঠনটোৰ অধ্যক্ষ বি চাওৰাইগৱৰা আৰু সাধাৰণ সম্পাদক বি আৰ ফেৰেংগাই।
ইয়াৰ পিছতে কটকটীয়া নিৰাপত্তাৰ মাজেৰে সংগঠনটোৰ নেতা দুগৰাকীৰ লগতে সদস্য সকলক ভাৰত-ভূটান সীমান্তস্থিত ধিগিলি ডেজিগনেটেড শিবিৰলৈ লৈ যোৱা হয়।
জানিব পৰা মতে, গৃহ মন্ত্ৰ্যালয়ে শান্তিচুক্তিৰ বাবে এখন খচৰা প্ৰস্তুত কৰি আছে, য’ত সশস্ত্ৰ বিদ্ৰোহী সংগঠনটোৰ তিনিটা গোটক (faction) জড়িত কৰা হৈছে।
হিংসা পৰিহাৰ কৰি শান্তি প্ৰক্ৰিয়াত যোগ দিয়াৰ সিদ্ধান্তৰে এন ডি এফ বিৰ চাওৰাইগৱৰা গোটৰ প্ৰায় ৫০জনীয়া সদস্যৰ এটা দল ম্যানমাৰৰ পৰা অসমত আহি উপস্থিত হৈছিল।
উল্লেখ্য যে বিদাই ধাৰাবাহিক বোমা বিস্ফোৰণ, প্ৰিয়া বসুমতাৰীৰ হত্যাকাণ্ড, ২০১৪ৰ দুটাকৈ ধাৰাবাহিক হত্যাকাণ্ডৰ মূল মাষ্টাৰমাইণ্ড আছিল।
