দেওবাৰে আকৰ্ষণীয় তথা জাক জমকতাৰ কাৰ্যসূচীৰ মাজেৰে মণিপুৰৰ প্ৰসিদ্ধ অষ্টম ৰেড শ্বীল্ড ডিভিজন পল’ প্ৰতিযোগিতাখনৰ শুভাৰম্ভণী হ’ল। মণিপুৰৰ ইম্ফলস্থিত ঐতিহাসিক পল’ ষ্টেডিয়াম তথা বিশ্বৰ সবাটোকৈ পুৰণি মাপাল কাংজেইবাং খেলপথাৰত অনুষ্ঠিত হয় উদ্বোধনী অনুষ্ঠান।
সেনা বিষয়া, স্থানীয় বাসিন্দা আৰু ইম্ফলৰ সৈনিক বিদ্যালয়ৰ ছাত্ৰ-ছাত্ৰীৰ লগতে ইম্ফলৰ বিভিন্ন বিদ্যালয়ৰ ছাত্ৰ-ছাত্ৰীসকলে ঐতিহ্যপূৰ্ণ খেলবিধৰ উদ্বোধনী অনুষ্ঠানত উপস্থিত থাকে।
উল্লেখযোগ্য যে পল’ প্ৰতিযোগিতাখনত সৰ্বোচ্চ সন্মান তথা শ্ৰেষ্ঠত্বৰ বাবে যুঁজ দিব ১৩টা পল’ দলে।
উদ্বোধনী অনুষ্ঠানৰ সভাপতিত্ব কৰে মণিপুৰ হৰ্ছ ৰাইডিং আৰু পল’ এছোছিয়েশ্যনৰ সভাপতি এইচ দিলীপ সিঙে আৰু মুখ্য অতিথি হিচাপে উপস্থিত থাকে আছাম ৰাইফলছ(দক্ষিণ)ৰ ইন্সপেক্টৰ জেনেৰেল মেজৰ বিৰেন্দৰ সিং।
মণিপুৰ হৰ্ছ ৰাইডিং আৰু পল’ এছোছিয়েশ্যনৰ সভাপতি এইচ দিলীপ সিঙে মণিপুৰৰ ঐতিহ্যপূৰ্ণ খেলবিধক প্ৰচাৰ কৰাৰ ক্ষেত্ৰত বিশেষকৈ সহয় কৰাৰ বাবে উদ্বোধনী অনুষ্ঠানৰ ভাষণ প্ৰসংগত ভাৰতীয় সেনা আৰু ৰেড শ্বীল্ড ডিভিজনক বিশেষভাবে ধন্যবাদ জ্ঞাপন কৰে।
আনহাতে দিলীপ সিঙে ৰাজ্যখনত সেনা বাহিনীৰ সহায়- সহযোগিতাৰ বাবে আইন-শংখলা সম্পূৰ্ণৰূপে সঠিক দিশত পৰিচালিত হোৱা বুলিও মতপোষণ কৰে।
আনহাতে প্ৰতিযোগিতাখনত অংশগ্ৰহণ কৰিবলগীয়া সকলো দলৰে খেলুৱৈ সকলক শুভেচ্ছা প্ৰদান কৰে মেজৰ জেনেৰেল বিৰেন্দৰ সিঙে।
উদ্বোধনী অনুষ্ঠানত ভাৰতীয় সেনাৰ এটা দলে আকৰ্ষণীয় বেণ্ড প্ৰদৰ্শন কৰাৰ লগতে মণিপুৰ জুনিয়ৰ ৰাইদাৰ্ছৰ দলে টেণ্ট পেগিং প্ৰদৰ্শন কৰা পৰিলক্ষিত হয়।
