হংকঙৰ পৰা প্ৰকাশিত চাউথ চাইনা মৰ্নিং প’ষ্ট নামৰ ইংৰাজী ভাষাৰ কাকতখনে অলপতে এটা প্ৰৱন্ধত অৰ্নব গোস্বামীক ভাৰতীয় জনতা দলৰ (বিজেপি)সহযোগী বুলি অভিহিত কৰিছে।
গোস্বামীক অলপতে যোৱা ২৮ জানুৱাৰিত ষ্টেণ্ড আপ কমেডিয়ান কুনাল কাম্ৰাই মুম্বাইৰ পৰা লক্ষ্ণৌলৈ যোৱা অৱস্থাত ইণ্ডিগো বিমানৰ ভিতৰতে প্ৰশ্নৰে আমনি কৰিছিল।
এই কাৰ্যৰ বাবে এয়াৰ ইণ্ডিয়াকে ধৰি কেইবাটাও এয়াৰলাইনে কাম্ৰাক নিষিদ্ধ কৰিছিল।
এই ঘটনাটোৰ বৰ্ণনা কৰি চাউথ চাইনা মৰ্নিং প’ষ্টে বৃহস্পতিবাৰে “ইণ্ডিয়ান কমেডিয়ান কুনাল কাম্ৰা বেনড্ ফ্ৰম ইণ্ডিগ’ এণ্ড এয়াৰ ইণ্ডিয়া আফটাৰ হেকলিং বিজেপি এলাই’’ শীৰ্ষক শিৰোনামৰে এটা বাতৰি পৰিৱেশন কৰে।
“এগৰাকী ভাৰতীয় ষ্টেণ্ড আপ কমেডিয়ান যিয়ে এগৰাকী টেলিভিশ্বন এংক’ৰ তথা ভাৰতৰ শাসকীয় দলৰ সহযোগীক ইণ্ডিগ’ বিমানৰ ভিতৰতে প্ৰশ্ন সুধি আমনি কৰিছিল, তেওঁক দেশৰ ৰাষ্ট্ৰীয় পৰিবহনকে ধৰি কেইবাটাও এয়াৰ লাইনছৰ পৰা নিষিদ্ধ কৰা হৈছে –জানিব পৰা মতে এয়াৰ লাইনছকেইটাক সেয়া কৰিবলৈ চৰকাৰে হেচা দিছে,’’-বাতৰিটোৰ প্ৰথমতে এইদৰে কোৱা হয়।
“গোস্বামী প্ৰধান মন্ত্ৰী নৰেন্দ্ৰ মোদীৰ নেতৃত্বৰ ভাৰতীয় জনতা পাৰ্টিৰ এগৰাকী সৰৱ সমৰ্থক আৰু দলটোৰ সমলোচকসকলক বিশ্বাসঘাতক বুলি অভিহিত কৰি আহিছে,’’-বাতৰিটোৰ আন এঠাইত এইদৰে কোৱা হৈছে।
অৱশ্যে, অৰ্নব গোস্বামীক এগৰাকী বিজেপিৰ সহযোগী বুলি অভিহিত কৰাৰ প্ৰকৃত কাৰণ জানিব পৰা হোৱা নাই যদিও অসমৰ মিডিয়াৰ জ্যেষ্ঠ সাংবাদিকৰ মতে,”তেওঁ বিজেপি আৰু ইয়াৰ নীতিৰ প্ৰতি নমনীয়, চীনৰ কাকতখনে তাকে ক’ব খুজিছে’’ বুলি সদৰী কৰে।
অৰ্নব গোস্বামী ৰিপাব্লিক টিভিৰ সম্পাদক আৰু ইয়াৰ সহযোগী স্বত্ত্বাধিকাৰী হৈছে নেশ্যনেল ডেম’ক্ৰেটিক এলায়েন্স (এন ডি এ)ৰ এগৰাকী প্ৰাক্তন নিৰ্দলীয় বিধায়ক ৰাজীৱ চন্দ্ৰশেখৰ।
