‘‘কৃষ্ণগুৰু মহাপ্ৰভুৱে আমাক সকলোকে জীৱন সুন্দৰভাৱে পৰিচালিত কৰাৰ বাবে নীতি আৰু আদৰ্শ দেখুৱাই থৈ গৈছে, এই নীতি আৰু আদৰ্শ হৃদয়ংগম কৰি মানৱতাৰ বাণীৰে তথা ভক্তি দৰ্শনেৰে আমি সমাজত শান্তি প্ৰতিষ্ঠাৰ হকে দৃঢ়তাৰে আগুৱাই যাব লাগিব,’’ সৰ্বানন্দ সোণোৱালৰ মন্তব্য।
বিশ্ব শান্তিৰ বাবে সাতদিনীয়াকৈ আয়োজিত কৃষ্ণগুৰু একনাম অখণ্ড কীৰ্তন-২০২০ৰ লগত সংগতি ৰাখি নসত্ৰস্থিত কৃষ্ণগুৰু সেৱাশ্ৰমত ধৰ্মালোচনী সভাত আজি মুখ্য অতিথি হিচাপে উপস্থিত থাকি সোণোৱালে এইদৰে কয়।
মুখ্য মন্ত্ৰী সোণোৱালে লগতে পৰমগুৰু কৃষ্ণগুৰু ইশ্বৰে আধ্যাত্মিকতাৰ জৰিয়তে শান্তিৰ মাৰ্গদৰ্শন সমাজৰ বাবে দি থৈ গৈছে বুলি উল্লেখ কৰি এই মাৰ্গদৰ্শনৰ দ্বাৰা ৰাজ্যৰ সৰু-বৰ সকলো জাতি-জনগোষ্ঠীৰ মাজত থকা সদভাৱ আৰু সমন্বয় শক্তিশালী কৰি ৰাজ্যখনক দেশৰ ভিতৰত শ্ৰেষ্ঠ ৰাজ্য হিচাপে পৰিগণিত কৰাৰ যাত্ৰাত আহোপুৰুষাৰ্থ কৰিব লাগিব বুলি কয়।
কৃষ্ণগুৰু মহাপ্ৰভুৰ আদৰ্শেৰে উদ্বুদ্ধ হৈ সমাজৰ কুসংস্কাৰ আৰু অন্ধবিশ্বাস ইত্যাদিৰ দৰে নেতিবাচক দিশবোৰ আঁতৰ কৰি সমাজ সংস্কাৰৰ যাত্ৰাত ঐক্যবদ্ধভাৱে আগুৱাই যাব লাগিব বুলিও সোণোৱালে কয়।
মুখ্য মন্ত্ৰীয়ে উঠি অহা চামক কৃষ্ণগুৰুৰ ভক্তি মাৰ্গেৰে নিজৰ নৈতিক চৰিত্ৰ সবল কৰি ভৱিষ্যতৰ সুনাগৰিক হিচাপে অৰিহণা আগবঢ়োৱাৰ দিশত উদ্বুদ্ধ হ’বলৈও আহ্বান জনায়।