চাৰিবাৰৰ বিশ্ব চেম্পিয়ন ভাৰতীয় দলে ১৯ অনুৰ্দ্ধৰ বিশ্বকাপ ক্ৰিকেটৰ প্ৰথমখন ছেমি ফাইনেলত চিৰ প্ৰতিদ্বন্দ্বী পাকিস্তানৰ সন্মুখীন হ’ব।
পাকিস্তানৰ লক্ষ্য তৃতীয়বাৰৰ বাবে ফাইনেলত প্ৰৱেশ কৰা আৰু ইয়াৰ বিপৰীতে ভাৰতে মুঠতে সপ্তমবাৰৰ বাবে ফাইনেলত প্ৰৱেশ কৰাৰ সুযোগ ল’বলৈ প্ৰস্তুত।
মঙলবাৰে দুপৰীয়া দক্ষিণ আফ্ৰিকাৰ পোটচেপষ্টুমত পাকিস্তানৰ বিৰুদ্ধে ছেমি ফাইনেলত অৱতীৰ্ণ হ’ব ভাৰতীয় দলটো।
বিশ্বকাপৰ ১৯ অনুৰ্দ্ধৰ এইখন আটাইতকৈ ৰোমাঞ্চকৰ মেচ হ’ব বুলি আশা কৰা হৈছে।
দুয়োটা দলেই ছেমি ফাইনেললৈ উপনীত হোৱাৰ সময়ত অপৰাজিত হৈ আছে। কোৱাৰ্টাৰ ফাইনেলত ভাৰতে অষ্ট্ৰেলিয়াক আৰু পাকিস্তানে আফগানিস্তানক পৰাজিত কৰিছে।
পাকিস্তানৰ অধিনায়ক ৰোহেল নজীৰে এই মেচখনক লৈ অধিক গুৰুত্ব দিবলৈ অস্বীকাৰ কৰিছে যদিও বাস্তৱত গোটেই প্ৰতিযোগিতাখনৰ আটাইতকৈ উত্তেজনাপূৰ্ণ আৰু চাপযুক্ত খেল হ’ব বুলি ধাৰণা কৰা হৈছে।
আজিৰ ছেমি ফাইনেলখনতে দুয়োটা দলৰ খেলুৱৈসকলৰ বাবে অগ্নি পৰীক্ষা হ’ব বুলি কোৱা হৈছে।
ইয়াত দুয়োটা দলৰ কোনো খেলুৱৈ নিশাটোৰ ভিতৰতে নায়ক আৰু কোনো খেলুৱৈ নিশাটোৰ ভিতৰতে খলনায়কত পৰিণত হ’ব পাৰে।
টীম ইণ্ডিয়াৰ ছিনিয়ৰ দলটোৰ দৰেই ভাৰতীয় জুনিয়ৰ দলটোৰ শক্তিও অতুলনীয়। যোৱা ছেপ্টেম্বৰত ভাৰতে পাকিস্তানক এছিয়া কাপত পৰাজিত কৰিছিল।
১৯ অনুৰ্দ্ধৰ বিশ্বকাপৰ যোৱা বাৰৰ চেম্পিয়ন ভাৰতে ২০১৮ৰ বিশ্বকাপত পাকিস্তানক ২০৩ ৰাণত পৰাজিত কৰিছিল।
প্ৰিয়ম গাৰ্গ নেতৃত্বাধীন ভাৰতীয় দলটোৱে এইবাৰো নিজৰ শ্ৰেষ্ঠ প্ৰদৰ্শন আগবঢ়াবলৈ সাজু হৈ আছে।
বিস্ফোৰক বেটছমেন যশস্বী জয়ছোৱাল ভাৰতীয় বেটিঙৰ কাণ্ডাৰী হিচাপে আছে আৰু তেওঁ টুৰ্নামেন্টখনৰ চাৰিখন মেচত তিনিটা অৰ্দ্ধশতক অৰ্জন কৰিছে।
ভাৰত-পাকিস্তানৰ যুদ্ধৰ দৰেই উত্তেজনাৰ সৃষ্টি কৰা দুয়োখন দেশৰ ক্ৰিকেট খেলৰ মুখামুখিয়ে স্বাভাৱিকতে ক্ৰিকেট অনুৰাগীসকলক উৎসাহিত কৰি ৰাখিছে।
