তৃতীয় বড়ো শান্তি চুক্তিৰ বিজয় উৎসৱত অংশগ্ৰহণ কৰাৰ উদ্দেশ্যে আজি কোকৰাঝাৰলৈ আহিব প্ৰধান মন্ত্ৰী নৰেন্দ্ৰ মোদী।
আজি দিনৰ ১১.১৫ বজাত লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰত উপস্থিত হ’ব, ইয়াৰ পৰা তেওঁ পোনে পোনে হেলিকপ্টাৰেৰে কোকৰাঝাৰলৈ ৰাওনা হ’ব। প্ৰধান মন্ত্ৰীক আদৰাৰ বাবে ইতিমধ্যে্ কোকৰাঝাৰ চহৰৰ খাৰগাঁও টেঙাপাৰাৰ জাংখ্ৰীথাই পথাৰ সজাই পৰাই তোলা হৈছে।
উক্ত উৎসৱত মুখ্য মন্ত্ৰী সৰ্বানন্দ সোণোৱাল, মন্ত্ৰী হিমন্ত বিশ্ব শৰ্মা, বিটিচি প্ৰধান হাগ্ৰামা মহিলাৰী, এবছু নেতৃত্ব আৰু এন ডি এফ বিৰ চাৰিওটা গোটৰ নেতা-সদস্যকে ধৰি প্ৰায় ৫ লাখ লোকে অংশগ্ৰহণ কৰাৰ কথা।
অনুষ্ঠান সূচাৰূপে পৰিচালনা কৰাৰ উদ্দেশ্যে নিখিল বড়ো ছাত্ৰ সন্থাই ৭ হেজাৰ সদস্য স্বেচ্ছাসেৱক হিচাপে সাজু হৈছে।
বৃহস্পতিবাৰে মন্ত্ৰী হিমন্ত বিশ্ব শৰ্মা জাংখ্ৰীথাই পথাৰত উপস্থিত হৈ প্ৰধান মন্ত্ৰীৰ আদৰণি প্ৰস্তুতিৰ তদাৰক কৰে। ইপিনে মোদীৰ আগমনক লৈ কোকৰাঝাৰত নিৰাপত্তা ব্যৱস্থা কটকটীয়াকৈ গঢ়ি তোলা হৈছে।
