মহানগৰীৰ লাচিত নগৰৰ হনুমান মন্দিৰৰ সমীপত অচিনাক্ত লোকে প্ৰহাৰ কৰিলে পদপথত আশ্ৰয় লোৱা দুজনকৈ লোকক।
যোৱা নিশা প্ৰায় ১:৩০ বজাত এই ঘটনা সংঘটিত হোৱা বুলি ভুক্তভোগী ৰাজেন ডেকা(৫৫)ই আমাৰ সাংবাদিকক জানিবলৈ দিয়ে। তেওঁৰ মূৰত আঘাতৰ চিন স্পষ্ট আৰু বৰ্তমানো ৰক্তক্ষৰণ হৈ আছে।
ডেকাই লগতে জনোৱা অনুসৰি তেওঁলোককক আক্ৰমণ কৰা লোকজন সুৰাসক্ত আছিল আৰু পথত থকা প্লাষ্টিকৰ ৰ’ড ডিভাইডাৰৰে দুয়োকে উপৰ্যুপৰি আক্ৰমণ কৰিছিল। সেইসময়ত উক্ত স্থানত বিজুলী নাছিল আৰু আন্ধাৰৰ সুযোগ লৈয়ে এইদৰে আক্ৰমণ কৰা বুলি অভিযোগ কৰে ডেকাই।
আনজন ব্যক্তিৰ অৱস্থা অধিক সংকজনক বুলি জানিব পৰা গৈছে। বহুসময় পদপথত তেজেৰে লুতুৰি পুতুৰি হৈ পৰি আছিল লোকজন। অৱশ্যে বৰ্তমানলৈকে তেওঁৰ পৰিচয় জানিব পৰা হোৱা নাই।
পুৱা প্ৰায় ১০ বজাত দুই এগৰাকী সচেতন স্থানীয় ৰাইজে লোক দুজনক তেনে অৱস্থাত দেখা পাই পল্টনবজাৰ আৰক্ষীক খবৰ দিছিল যদিও বহু পলমকৈহে সেই স্থানত আৰক্ষী আৰু ১০৮ মৃত্যুঞ্জয় সেৱা উপস্থিত হৈ লোক দুজনক জি এম চি এইছলৈ লৈ যায়।
এইদৰে মাজনিশাৰ পৰা ১০ ঘণ্টাতকৈ অধিক সময় ধৰি মহানগৰীৰ সোঁমাজত দুজনকৈ আশ্ৰয়হীন ব্যক্তি দুৰ্বৃত্তৰ হাতত প্ৰহৃত হৈ কাৰোৰে দৃষ্টিৰ অগোচৰে ৰাস্তাত পৰি থকা ঘটনা যেন মানৱীয়তা হেৰোৱাই পেলোৱা মহানগৰৰ এক নিদাৰুণ কিন্তু বাস্তৱ প্ৰতিফলন।
আৰক্ষী-নিৰাপত্তা বাহিনীৰ লোকে গিজগিজাই থকা অসম অসচিবালয় আৰু দিচপুৰ আৰক্ষী থানাৰ নিচেই সমীপতে সংঘটিত এই ঘটনাই মহানগৰৰ নিৰাপত্তাৰ ফোপোলা স্বৰূপ উদঙাই পেলাইছে।
